သျှမ်းပြည်မြောက်ပိုင်း လားရှိုးမြို့မှ စီးဆင်းလာသည့် ခန့်မှန်းခြေ ကျပ် ၉ ဒသမ ၈၅ ဘီလီယံ တန်ဖိုးရှိ ဘိန်းဖြူနှင့် စိတ်ကြွဆေးပြားများကို သိမ်းဆည်းရမိခဲ့ကြောင်း မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့က သတင်းထုတ်ပြန်သည်။

ဧပြီလ ၁၂ ရက်မှ ဧပြီလ ၃၀ ရက်အတွင်း ဘိန်းဖြူ ၇၇ ကီလိုဂရမ်နှင့် စိတ်ကြွဆေးပြား ၄ သန်းကို သိမ်းဆည်းရမိခဲ့ပြီး သျှမ်းပြည်၊ စစ်ကိုင်းတိုင်းနှင့် မန္တလေးတိုင်းတို့မှ ကွန်ရက်ချိတ်ဆက်ထားသူ ၈ ဦးထက်မနည်းကို ဖော်ထုတ်ဖမ်းဆီးနိုင်ခဲ့ခြင်း ဖြစ်ကြောင်း သိရသည်။

ဖြစ်စဉ်မှာ ဧပြီလ ၁၂ ရက်တွင် စစ်ကိုင်းတိုင်း ကလေးမြို့အဝင်၌ မော်တော်ယာဉ်များကို ရှာဖွေရာမှ ဘိန်းဖြူ ၇၇ ကီလိုဂရမ်ကို ကနဦး ဖမ်းဆီးရမိခဲ့ခြင်း ဖြစ်ကြောင်း ထုတ်ပြန်ချက်တွင် ဖော်ပြထားသည်။

စစ်ဆေးချက်များအရ အဆိုပါဆေးဝါးများကို လားရှိုးမြို့မှနေ၍ ကလေးမြို့သို့ သယ်ဆောင်ရန် စေခိုင်းသူ နိုင်ဝင်း(ခ)ရုပ်ဆိုးအား ထိုနေ့ညနေပိုင်းတွင် ပဲခူးတိုင်း ပြည်မြို့နယ်အတွင်း၌ မော်တော်ယာဉ်တစ်စီးနှင့်အတူ ဖမ်းဆီးရမိခဲ့သည်။

ထို့အပြင် မန္တလေးတိုင်း စဉ့်ကိုင်မြို့နယ်၌ တရားခံတစ်ဦးကို ထပ်မံဖမ်းဆီးရမိခဲ့ပြီး ၎င်း၏ ထွက်ဆိုချက်အရ ပြည်ကြီးတံခွန်မြို့နယ်အတွင်း ရပ်တန့်ထားသည့် ခြောက်ဘီးတပ်ယာဉ်တစ်စီးပေါ်မှ ကာလတန်ဖိုး ကျပ် ၆ ဘီလီယံခန့်ရှိ စိတ်ကြွရူးသွပ်ဆေးပြား ၄ သန်းကို ထပ်မံသိမ်းဆည်းရမိခဲ့ခြင်းဖြစ်သည်ဟု ဆိုသည်။

ယခုဖြစ်စဉ်တွင် ဖမ်းဆီးရမိသူများကို မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာ ဥပဒေဖြင့် အရေးယူထားကြောင်း ထုတ်ပြန်ချက်တွင် ဖော်ပြထားသည်။

ထို့အပြင် ၎င်းတို့၏ မတရားရရှိထားသော ငွေကြေးအကျိုးအမြတ်နှင့် ပိုင်ဆိုင်မှုများကို ပြည်သူ့ဘဏ္ဍာအဖြစ် သိမ်းဆည်းနိုင်ရန် ငွေကြေးခဝါချမှု တိုက်ဖျက်ရေးဥပဒေဖြင့်ပါ ပူးတွဲအရေးယူဆောင်ရွက်နေကြောင်း ဆိုသည်။

လက်ရှိတွင် အာဏာပိုင်များသည် ထွက်ပြေးလွတ်မြောက်နေသည့် ဆက်စပ်တရားခံများကို ဆက်လက်ရှာဖွေနေဆဲဖြစ်ကြောင်း သိရသည်။