သျှမ်းပြည်မြောက်ပိုင်း သီပေါမြို့နယ် နမ့်လန်အုပ်စုတွင် မူးယစ်ဆေးဝါး သုံးစွဲသူများက ညအချိန်တွင် ရပ်ရွာ အတွင်းနှင့်ဘုန်းကြီးကျောင်းများပါမကျန် ၀င်ရောက်ရမ်းကားသောကြောင့် ဒေခံများ စုပေါင်းဖမ်းကြရ သည်ဟု သိရသည်။
“ရပ်ရွာထဲမှာ လူတွေကိုလိုက်နှောင့်ယှက်နေတယ်။ အဖွဲ့လိုက်လည်းရှိတယ်။ တယောက်ချင်းလည်းရှိတယ်။ ရွာသားတွေကို လောက်လေးဂွတွေနဲ့ပစ်တယ်။ သူများတွေနေအိမ်တွေထဲကို၀င်ပြီး ခိုးတယ်။ ဘုန်းကြီးကျောင်း တွေထဲဝင်ပြီး ဦးဇင်းတွေကိုပါမကျန် ဓါးပြ ခြိမ်းခြောက်တယ်။ အဲလောက်ဆိုးရွားနေပြီ ။ တခြားရွာတွေ က လာတဲ့ မျက်နှာစိမ်းတွေလည်းရှိတယ်။ ကိုယ့်ဒေသကလူတွေလည်းပါတယ်။ ရဲတွေကဖမ်းဆီးအပြစ်ပေးတာ ပြုပြင်ပေးတာမရှိတော့ ရွာသားတွေက ကိုယ့်ဟာကိုသတိ၀ိရိယကြီးကြီးထားပြီးနေနေရတယ်။ “– ဟု နမ့်လန်ဒေသခံ စိုင်းအောင် ကပြောသည်။
သြဂုတ်လ ရ ရက်ယနေ့မနက်ပိုင်းက မန်လီအုပ်စု ကုန်းဝါရွာမှ ဦးအောင်လူ ဆိုသည့် မူးယစ်ဆေးကြောင်သူ မှာ နမ့်လန်အုပ်စုသို့ဝင်ရောက်ကာ ရမ်းကားသဖြင့် ဒေသခံလူထု ၀န်းရံ ဖမ်းဆီးခဲ့ကြောင်း သိရသည်။
“ကုန်းဝါရွာက လုံးမောင် ပါအုံတို့ရဲ့သားပေါ့။ သူဆေးစွဲနေတာကြာပြီ။ ပြောမရလို့ မိဘကလွှတ်ထား တာ။ သူကညတုန်းက မန်လီရွာဘုန်းကြီးကျောင်းမှာသွားသောင်းကျန်းနေတာတဲ့။ ကျောင်းအတွင်း ပန်ကာတွေ၊ ၀ထ္ထုပစ္စည်းတွေ ရိုက်ချိုးတယ်။ ဒီိမနက်မှ ရူးမူးပြီး နမ့်လန်ထဲကို၀င်လာတာ။ အဲတာ ၀ိုင်းဖမ်းကြတာ။ နမ့်လန်ထဲမှာသောင်းကျန်းနေတဲ့သူတွေကိုတော့ မဖမ်းမိသေးဘူး “– ဟုလည်း ဒေသခံစိုင်းဆိုင်ကပြောသည်။
လူထု ၀ိုင်းဖမ်းသည့် မူးယစ်ဆေးသုံးသူများအား ရဲစခန်းသို့ အပ်နှံကြောင်း သို့သော်လည်း ရဲစခန်းက တာဝန်ယူ ချုပ်နှောင်ထားခြင်း၊ အကျင့်စာရိတ္တပြုပြင်ပေးရန် တခြားဆိုင်ရာသို့ လွှဲအပ်ခြင်းမပြုဘဲ မိဘဆွေမျိုးများထံပြန်လည်အပ်နှံလေ့ရှိကြောင်း ဒေသခံများပြောပြချက်အရသိရသည်။
“မူးယစ်ဥပဒေက ရောင်းသူကိုဘဲဖမ်းတယ်လေ။ သောက်စားသူကိုတော့မဖမ်းဘူးလေ။ မနေ့ကဖမ်းလိုက်တဲ့ ကုန်းဝါရွာသားကိုလည်း ပြန်လာယူသွားဖို့ သူ့မိဘတွေဆွေမျိုးတွေကို ရဲဘက်ကအကြောင်းကြားထားတယ် “– ဟုလည်း စိုင်းဆိုင် ကပြောသည်။
မူးယစ်သုံးစွဲသူများ များပြားလာသဖြင့် ရပ်ရွာတွင်း ခိုးဆိုး ဓါးပြတိုက်မှု၊ ရပ်ရွာအတွင်းသောင်းကြမ်း မှု များလည်း မြို့နယ်တိုင်းနီးပါး ရှိနေကြောင်း သျှမ်းပြည်တောင်ပိုင်း မှကုန်သည် နန်းလီကပြောသည်။
“လင်းခေးမြို့မှာလည်း သူခိုးတွေသောင်းကြမ်းနေတယ်ဒီ ၂ လ ၃ လအတွင်းမှာ။ မဖမ်းမိသေးဘူး။ ဒါပေမယ့် ရိုးတိုးရိပ်တိတ်တော့ကြားနေရတယ်။ ဒေသခံမဟုတ်ဘူး။ လင်းခေးမြို့ဟာ တရားဓမ္မအရမ်းယုံကြည် ကိုးကွယ်တဲ့မြို့။ အရင်တုန်းက ဘာသူခိုးမှမရှိဘူး။ ရှုပ်ရှုပ်ယှက်ယှက်မရှိခဲ့ဖူးဘူး။ ခုမှဘဲ လောဘသား တွေများလာတယ်။ လူငယ်တွေဆေးသုံးတာတွေများလာတယ်။ ပြသနာတွေလည်းများလာတယ် “– ဟု နန်းလီ ကပြောသည်။
သျှမ်းပြည်နယ်အတွင်း ဘိန်းစိုက်ပျိုးမှုဧရိယာ လျော့ပါးလာသည်ဟု ကုလသမဂ္ဂ၏ အစီရင်ခံစာတွင် ပါရှိသော်လည်း သျှမ်းပြည်၏မြို့နယ်တိုင်းနီးပါးတွင် ယာဘ မူးယစ်ဆေးဝါးမှာ ပေါများနေပြီး သောက်သုံးသူလည်း တနေ့တခြား ပိုမိုများပြားလာနေကြကြောင်း သျှမး်ပြည်မှုယစ်ဆေးဝါး စောင့်ကြည့်ရေးအဖွဲ့ကလည်းပြောဆိုသည်။
