သျှမ်းမြောက် သီပေါမြို့နယ်အတွင်း တိုင်းရင်းသားလက်နက်ကိုင်တပ်များ စစ်ရေးတင်းမာနေသဖြင့် တိုက်ပွဲဖြစ်မည်ကို စိုးရိမ်သည့်အတွက် တာတေကျေးရွာဒေသခံ(၂၀၀)ကျော် ထွက်ပြေးတိမ်းရှောင်ခဲ့ကြောင်း သတင်းသိရသည်။

“ခု တုံစင့်ဘက်မှာ လာနေတာ၊ အရင်ကလို တိုက်ပွဲပြင်းထန်မှာ ကြောက်လို့ ကြိုတင်ပြီး တိမ်းရှောင်ခဲ့တာ၊ ရောက်တာ ၃၊ ၄ ရက်လောက်ပဲ ရှိသေးတယ်။ တိုက်ပွဲဖြစ်လို့ ပြေးရတာတော့ မဟုတ်ဘူး။ တိုက်ပွဲဖြစ်မှာကြောက်လို့ စိုးရိမ်လို့ ကြိုပြီး ရှောင်နေတဲ့ အနေအထားပါ” ဟု ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

ထို ထွက်ပြေးတိမ်းရှောင်သူများထဲတွင် မသန်စွမ်း (၆)ဦးနှင့် ကိုယ်ဝန်သည် တစ်ဦး အပါအဝင် ဒေသခံ (၂၀၀)ကျော်သည် သီပေါမြို့ တုံစင့်ကျေးရွာအနီး လာ‌ရောက်နေထိုင်နေတာဖြစ်ကြောင်း သိရသည်။

ထို့အပြင် အခြား ဆွေမျိုးနေအိမ်များတွင် သွားရောက်နေထိုင်သူများလည်း ရှိနေပြီး စားနပ်ရိက္ခာများ ခက်ခဲနေတာဖြစ်ကြောင်း ဒေသခံထံမှ သိရသည်။

“အစားအသောက်တွေ လိုနေတယ်။ ဘာမှကို မရှိသေးဘူး။ ဘယ်လောက် ကြာကြာ နေရမှာလဲ မပြောနိုင်ဘူး။ လက်နက်ကိုင်တွေ တင်းမာနေတယ်လို့ပဲ ကြားတာ။ တိုက်ပွဲသံတော့ မကြားဘူး” ဟု ၄င်းတို့ကို ကူညီပေးနေသည့် အမျိုးသား တစ်ဦးက ပြောသည်။

တာတေ ဒေသခံများအပါအဝင် ချောင်းဆုံ၊ ဟာလျံ၊ ကွန်စံလိတ်၊ မန်မိုင်နှင့် ဆွန်လုံကျေးရွာ‌ဒေသခံတို့သည် ပြီးခဲ့သည့် နိုဝင်ဘာလအတွင်းက တိုင်းရင်းသားလက်နက်ကိုင် တိုက်ပွဲဖြစ်ပွားမှုကြောင့် သီပေါမြို့ပေါ်သို့ တိမ်းရှောင်ခဲ့ရပြီး နေရပ်ပြန်သွားသည်မှာ တစ်လဝန်းကျင်ခန့်သာ ရှိသေးကြောင်း သိရသည်။

ထို့အပြင် နိုဝင်ဘာလအတွင်း တိုင်းရင်းသားလက်နက်ကိုင် တိုက်ပွဲ ဖြစ်ပွားမှုကြောင့် ချောင်းဆုံကျေးရွာမှ ဒေသခံ နေအိမ် တစ်လုံးနှင့် ဂိုဒေါင်တစ်လုံး လက်နက်ထိမှန် ပျက်စီးခဲ့ရကြောင်း သိရသည်။