သျှမ်းပြည်မြောက်ပိုင်း လားရှိုးမြို့နယ်တွင် အရက်မူးနေသည့် လူတဦးက အိမ်နီးချင်းလင်မယားအား ၀င်ရောက် ခုတ်ထစ်သဖြင့် ဇနီးဖြစ်သူ ဒဏ်ရာပြင်းထန်စွာရရှိပြီးမန္တလေးဆေးရုံသို့ပို့ဆောင်ဆေးကု နေရကြောင်း သိရ သည်။
လားရှိုးမြို့ ရပ်ကွက် ၁၂ နေ စိုင်းဆန်ပန် နှင့် နန်းခမ်းစံ လင်မယားအား သြဂုတ်လ ၅ ရက်နေ့မွန်းလွဲပိုင်းက အိမ်နီးချင်းနေ စိုင်းအိုအေး (အသက် ၄၀ ကျော်) ဆိုသူက ၄င်းတို့နေအိမ်ခြံဝင်းအတွင်း ဓါးဖြင့်ဝင်ရောက် ခုတ်ဖြတ်သဖြင့် နန်းခမ်းစံတွင် ဒဏ်ရာအပြင်းအထန်ရရှိပြီး ၀င်ကယ်သော ၄င်း၏အမျိုးသား စိုင်းဆန်ပန်မှာ ခေါင်းတို့တွင် ဒဏ်ရာရရှိခြင်းဖြစ်ကြောင်း လားရှိုးမြို့နယ် ကျားခေါင်းပါတီ SNLD ဒုဥက္ကဌ စိုင်းလျန် က သျှမ်းသံတော်ဆင့်အားပြောပြသည်။
“ သူ့မိန်းမက ဒဏ်ရာပြင်းထန်တော့ မန္တလေးဆေးရုံကို အဲ့နေ့မှာဘဲ ပို့ဆောင်ဆေးကုပေးလိုက်ရတယ်။ ခေါင်း ရဲ့ဘယ်ဖက်ခြမ်းရော ညာဘက်ခြမ်းရော ခုတ်ရှဒဏ်ရာရရှိတယ်။ လက်တွေမှာလည်းခုတ်မိတယ်။ ခေါင်းက ဒဏ်ရာ ပြင်းထန်တယ်။စိုးရိမ်ရတဲ့အခြေအနေလို့တောင်ပြောနေတယ်။ သူ့ယောက်ကျားကတော့ လားရှိုး ဆေးရုံမှာ ဘဲဆေးကုသမှုခံယူနေတယ်။ ခေါင်း ၂ ဖက်ခြမ်းလုံးမှာခုတ်ရှိဒဏ်ရာရမိတယ်။ သူ့မိန်းမ လောက် ဒဏ်ရာမဆိုးဘူး။ စိုင်းအိုအေးက ဓါးနဲ့ခုတ်ချိန်မှာအရက် ၊မူးယစ်ဆေးကြောင်နေတယ်လို့ အိမ်နီးချင်းတွေ ကပြောတယ် ”- ဟု လူနာအားသွားရောက် အားပေးမေးမြန်းကြည့်ရှုလာသည့် လားရှိုးမြို့နယ် SNLD ပါတီ ဒုဥက္ကဌ စိုင်းလျန် ကပြောသည်။
လားရှိုးမြို့တွင် မူးယစ်ဆေးဝါး ရောင်းဝယ်သုံးစွဲမှုများ တနေ့တခြားများပြားလာသည်ဖြစ်ရာ ဓါးခုတ်မှုတရားခံ စိုင်းအိုအေးမှာလည်း အရက်နှင့် မူးယစ်ဆေးဝါးအလွန်အကျွံသုံးစွဲမှုကြောင့် စိတ်မူမမှန်ကာ ယခုတလော ရမ်းကားပြီး လူတကာအားလိုက်လံပြသနာရှာနေလေ့ရှိကြောင်း ၊ ထို့အတွက် ၄င်း၏ ဇနီးနှင့်သားသမီးများမှာ ၄င်းအားထားခဲ့ကာ ရွာသို့ ပြန်သွားနေကြကုန်ပြီဖြစ်ကြောင်း၊ ဓါးခုတ်မှုဖြစ်ပြီးနောက် ရဲတပ်ဖွဲ့က ၄င်းအားဖမ်းဆီး ချုပ်နှောင်ထားကြောင်း လားရှိုးမြို့ရပ်ကွက် ၁၂ မှ နန်းနု ကပြောသည်။
“စိုးရိမ်စရာလို့ပြောရင်မှားမယ်မထင်ပါဘူး။ မူးယစ်ဆေးတွေက သုံးစွဲတဲ့လူတွေအတွက် ဟင်းရွက်စျေး လိုဘဲရှာရလွယ်နေတဲ့ခေတ်။ မျိုးဆက်သစ်လူငယ်တွေအတွက်စိုးရိမ်ဖွယ်ဖြစ်နေတယ်။ ” – ဟုစိုင်းလျန်က ပြောသည်။
မူးယစ်ဆေးဝါး ဥပဒေသစ်တွင် ဆေးသုံးစွဲသူများအား မူးယစ်လက်ဝယ်မဖမ်းမိပါက ချုပ်နှောင် ခြင်းမပြု ၊ ရောင်းဝယ်သူများကိုသာ ဖမ်းဆီးမည်ဟု ဆိုသောကြောင့် မူးယစ်ဆေးကြောင်သူများ ရမ်းကားပြသနာရှာခြင်း နေ့စဉ်ဖြစ်ပေါ်နေကြောင်းလည်း ဒေသခံများကပြောဆိုပါသည်။
မူးယစ်စိတ်ကြွသုံးစွဲမှုပြဿနာက လွှတ်တော်မှာ အကြိမ်ကြိမ် အကျယ်တဝံ့ ဆွေးနွေးနေပေမယ့် လည်း ဒီနေ့ထိ ၎င်းရဲ့ဆိုးမွေက လူထုကိုခြိမ်းခြောက်နေဆဲပါပဲ – ဟု ၄င်းနှင့်ပတ်သက်၍ အမျိုးသားလွှတ်တော်ကိုယ်စားလှယ် စိုင်းဝမ်းလျန်းခမ်းက ၄င်း ဖေ့စ်ဘုစာမျက်နှာတွင် ရေးသားဖော်ပြထားသည် ။
