သျှမ်းပြည်တောင်ပိုင်း ဖယ်ခုံမြို့ အေလာကွင်းအနီး ယနေ့ (ဒီဇင်ဘာ ၂ ရက်) မနက် ၉ နာရီဝန်းကျင်က ပြောင်းအငှားလိုက်သွားချိုးသည့် အမျိုးသမီးတစ်ဦး မြေမြှုပ်မိုင်းနင်းမိပြီး ခြေထောက်ပြင်းထန်ဒဏ်ရာရရှိခဲ့ကြောင်း စုံစမ်းသိရသည်။
“ဒီနေ့ မနက်လောက်ဖြစ်မယ်။ ပြောင်းဖူးခင်းမှာ မြေမြှုပ်မိုင်း နင်းမိတာ။ ခြေထောက်တစ်ဖက် ပြတ်သွားတယ်လို့ပြောတယ်။ အတိကျတော့ မသိရသေးဘူး။ အခုတော့ လွိုင်ကော် ဆေးရုံကိုခေါ်သွားလိုက်ပြီ” ဟု ဖယ်ခုံမြို့ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
ဖယ်ခုံမြို့တွင် ယခုရက်ပိုင်း စစ်ကောင်စီတပ်နှင့် ပြည်သူ့ကာကွယ်ရေးတပ်ဖွဲ့ PDF တို့ တိုက်ပွဲ ငြိမ်နေသောကြောင့် ဒေသခံများက ပြောင်းဖူးကို အလျင်အမြန်သွားရောက်ချိုးယူလျက်ရှိကြောင်း သိရသည်။
“တိုက်ပွဲက ငြိမ်နေတယ်။ အဲဒါနဲ့ ပြည်သူတွေလည်း ပြောင်းဖူးသွားချိုးကြတာ။ တချို့ကလည်း အငှားခေါ်ကြတာလေ။ လူအများကို တစ်ရက်ထဲနဲ့ ပြီးအောင် အငှားခေါ်ယူ သွားချိုးကြတာ။ အလုပ်အကိုင်မရှိတော့ လိုက်သွားတဲ့သူလည်းများပါတယ်။” ဟု အထက်ပါ အမျိုးသားက ပြောသည်။
ထို မိုင်းပေါက်ကွဲသည့် နေရာတွင် စစ်ကောင်စီ တပ်စခန်းနှင့် နီးစပ်ကြောင်း၊ မိုင်းပေါက်ကွဲပြီးနောက်ပိုင်း စစ်ကောင်စီတပ်သားများ အများအပြာက လုံခြုံရေးတင်းကြပ်ထားကြောင်း သိရသည်။
“အဲဒီနေရာကတော့ စစ်ကောင်စီတွေရဲ့ တပ်နဲ့ သိပ်မဝေးဘူး။ သူတို့ မိုင်းဘဲဖြစ်နိုင်တယ်။ မိုင်းပေါက်ကွဲပြီးတော့ လမ်းမှာ စစ်သားတွေအများကြီးဘဲ။ အခုချိန်ထိရှိသေးတယ်“ ဟု ဖယ်ခုံမြို့ ဒေသခံ တစ်ဦးက ပြောသည်။
လက်ရှိ မြေမြှုပ်မိုင်းနင်းမိသည့် အမျိုးသမီးကို လွိုင်ကော်ဆေးရုံသို့ ခေါ်ဆောင်သွားကြောင်း သိရသည်။
Leave a Comments