သျှမ်းပြည်အတွင်းမှ ကိုဗစ် – ၁၉ ကူးစက်မှုနှုန်း မြင့်နေဆဲဖြစ်သည့် မြို့နယ် ၉ ခုကို Stay at Home အစီအစဥ်မှ ပယ်ဖျက်ကြောင်း သိရသည်။
ယမန်နေ့ နိုဝင်ဘာလ ၂၄ ရက် ညပိုင်းတွင် စစ်ကောင်စီလက်အောက်ခံ ကျန်းမာရေးဌာနက လွန်ခဲ့သော ၁၄ ရက်အတွင်း ဓါတ်ခွဲအတည်ပြုလူနာသစ် ထပ်မံတွေ့ရှိရမှု လျော့နည်းလာခြင်း၊ အစုလိုက်ကူးစက်ဖြစ်ပွားမှု လျော့နည်းလာခြင်းတို့ကြောင့် သျှမ်းပြည်မှ မြို့နယ် ၉ ခုအား ယနေ့ နိုဝင်ဘာလ ၂၅ ရက်မှ စတင်၍ Stay at Home မှ ပယ်ဖျက်ကြောင်း ထုတ်ပြန်ကြေညာထားသည်။
အဆိုပါ Stay at home ပယ်ဖျက်သည့် သျှမ်းပြည်မှ မြို့နယ်များမှာ နောင်ချိုမြို့နယ်၊ သီပေါမြို့နယ်၊ ကျိုင်းတုံမြို့ နယ်၊ ညောင်ရွှေမြို့နယ်၊ တောင်ကြီးမြို့နယ်၊ ရပ်စောက်မြို့နယ်၊ မူဆယ်မြို့နယ်၊ လားရှိုးမြို့နယ် နှင့် လောက်ကိုင်မြို့နယ်တို့ဖြစ်ကြောင်း သိရသည်။
ယင်းကဲ့သို့ Stay at Home ပယ်ဖျက်ပေးခြင်းနှင့် ပတ်သက်ပြီး လားရှိုးမြို့နေ ပြည်သူတစ်ဦးက ဝမ်းရေးအတွက် လုပ်ကိုင်စားသောက်ရန် လွယ်ကူသွားပေမယ့်လည်း ရောဂါများ ပြန်လည်မြင့်တက်လာမည်ကို စိုးရိမ်ကြောင်း ၎င်းက ပြောသည်။
“စစ်ကောင်စီတို့ ကျနော်တို့မြို့ကို Stay at Home ဖြုတ်ပေးပေမယ့် ကျနော်တို့ ပြည်သူတွေအနေနဲ့လည်း သတိနဲ့နေ သတိနဲ့ သွားဖို့ လိုပါတယ်၊ ကျနော်တို့ လားရှိုးမြို့မှာဆို ရောဂါကူးစက်ခံရတဲ့သူ မရှိတဲ့နေ့ ဆိုတာ မရှိဘူး၊ အဲ့ကြောင့်လည်း များများဂရုစိုက်ဖို့ လိုပါသေးတယ်” ဟု အထက်ပါ ပုဂ္ဂိုလ်က ပြောသည်။
ယခင်က သျှမ်းပြည်အတွင်းမှ မြို့နယ် ၁၀ ခုတို့ကို Stay at Home အစီအစဉ်တွင် အကျုံးဝင်ကြောင်း ကြေညာထားခဲ့သော်လည်း ယခု ၉ မြို့နယ်ကို ပယ်ဖျက်ပြီးဖြစ်သည့်အတွက် သျှမ်းပြည်အတွင်း Stay at Home အစီအစဉ် အကျုံးဝင်သည့်မြို့နယ်အနေဖြင့် တာချီလိတ် တစ်မြို့နယ်သာ ကျန်ရှိတော့ကြောင်း သိရသည်။
