သျှမ်းပြည်တောင်ပိုင်း မိုးနဲမြို့တွင် နိုဝင်ဘာလ ၁ ရက်နေ့မှ ၁၆ ရက်နေ့အထိ ကိုဗစ် – ၁၉ ပိုးတွေ့လူနာ စုစုပေါင်း ၁၁၉ ဦးထိ မြင့်တက်လာကြောင်းစုံစမ်းသိရှိရသည်။

မိုးနဲမြို့တွင် နိုဝင်ဘာ ၁ ရက်နေ့မှစပြီး ဒေသခံ ၁၄၃၀ ဦးကို ကိုဗစ် ၁၉ ပိုးစစ်ဆေးပေးခဲ့ပြီး စုစုပေါင်း ၁၁၉ ဦး ပိုးတွေ့ရှိခဲ့ကြောင်း သိရသည်။

“ဒီလထဲမှာဘဲ ကိုဗစ် ကူးစက်တာ တော်တော်လေး များလာတယ်။ ကျနော်တို့ လူဦးရေ ၁၄၃၀ လောက်စစ်ပေးတာ။ ၁၁၉ ယောက်က ပိုးတွေ့လူနာတွေဖြစ်တယ်။ အခြေနေတော့ ဆိုးလာတယ်လို့ပြောလို့ရတယ်” ဟု မိုးနဲမြို့ ဒေသခံ အမျိုသား တစ်ဦးက ပြောသည်။

အဆိုပါ မိုးနဲမြို့ ဒေသခံများကို ကိုဗစ် -၁၉ ပိုး ရှိ မရှိ နေအိမ်ထိ သွားရောက်စစ်ဆေးပေးရာတွင် ဆရာဝန်၊ တာဝန်ရှိသူများနှင့် ဒေသခံတို့အကြားရန်ဖြစ်ပွားမှုများလည်း ရှိခဲ့ကြောင်း သိရသည်။

“ဒီလထဲမှာဘဲ ကျန်းမာရေးပိုင်းတာဝန်ရှိသူတွေက ပြည်သူတွေကို ကိုဗစ်ပိုး သွားစစ်ဆေးပေးကြတယ်။ ကိုဗစ်ပိုးစစ်ရင် နှာခေါင်းထဲ တုတ်ထိုးရတယ်ဆိုတော့ နာကြတယ်တဲ့။ အဲဒါ နှာခေါင်းထဲထိုးခံရလို့ဆိုပြီး ကျန်းမာရေးဝန်ထမ်းနဲ့ ဒေသခံတွေက ရန်ဖြစ်တာတွေလည်းရှိတယ်” ဟု အထက်ပါအမျိုးသားက ပြောသည်။

ကိုဗစ် ၁၉ တတိယလှိုင်းအချိန်တွင် မိုးနဲမြို့မှာ နိုဝင်ဘာ ၁၆ ရက်အထိ ကိုဗစ် ၁၉ ပိုးတွေ့လူနာ စုစုပေါင်း ၃၉၁ ဦးထိရှိနေပြီဖြစ်ကြောင်း သိရသည်။

၂၀၂၁ ခုနှစ်ထဲ မိုးနဲမြို့တွင် ကိုဗစ် ၁၉ ကြောင့်သေဆုံးသူ စုစုပေါင်း (၆)ဦးထိရှိကြောင်းသိရသည်။