သျှမ်းမြောက် သီပေါမြို့နယ် ချောင်းဆုံကျေးရွာတွင် တိုက်ပွဲကြောင့် တိမ်းရှောင်နေရသည့် ဒေသခံ နေအိမ် လက်နက်ကြီးကျကာ ထိခိုက်ပျက်စီးသွားကြောင်း စုံစမ်းသိရသည်။

ချောင်းဆုံကျေးရွာအတွင်း နှစ်ထပ်အိမ်တစ်လုံးနှင့် ဂိုဒေါင်တစ်လုံး ပျက်စီးသွားသည့်အပြင် အချို့ နေအိမ်များလည်း လက်နက်ကျည်ထိမှန်မှုများ ရှိနေကြောင်း သိရသည်။

“အိမ်တစ်အိမ်နဲ့ ဂိုဒေါင်တစ်လုံးထိသွားတယ်၊ လက်နက်ကြီးထိသွားတဲ့ အနေအထားပါ၊ အိမ်က တော်တော်ပျက်စီးသွားတယ်၊ အိမ်ထဲက လှေကားဆိုလည်း တစ်ခုလုံးကို ပျက်စီးသွားတယ်၊ အိမ်ရှင်ကတော့ အရမ်းဝမ်းနည်းပြီး ငိုနေတော့တာ” ဟု ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

သီပေါမြို့နယ်အတွင်း ပြီးခဲ့သည့် နိုဝင်ဘာ (၇)ရက်က သျှမ်းတပ် (၂)တပ် တိုက်ပွဲပြင်းထန်ခဲ့မှုကြောင့် ချောင်းဆုံ၊ ဟာလျံ၊ မိုးတေ၊ ကွန်စံလိတ်၊ မန်မိုင်နှင့် ဆွန်လုံကျေးရွာဒေသခံ (၄၀၀)ကျော်တို့သည် မြို့ပေါ်ရှိ အောင်မင်္ဂလာဘိုးတော်ကျောင်းသို့ စစ်ရှောင်ထွက်ပြေးခဲ့ရပြီး နိုဝင်ဘာ (၁၄)ရက်နေ့တွင် နေရပ်သို့ ပြန်သွားခဲ့ကြောင်း သိရသည်။

ချောင်းဆုံကျေးရွာ ဒေသခံတို့သည် နေရပ်ပြန်သွားသော်လည်း ၄င်းတို့ ကျေးရွာတွင် ပြန်လည်နေထိုင်ရဲခြင်း မရှိသေးကြောင်း ဒေသခံများထံမှ သိရသည်။

“ချောင်းဆုံဒေသခံတွေက သူတို့ရွာမှာ ပြန်မနေရဲသေးဘူး၊ လက်နက်ကိုင်တပ်တွေ စစ်ရေးတင်းမာနေသေးတော့ ဘယ်သူမှ ရွာထဲ ပြန်ပြီး မနေရဲဘူး၊ လက်နက်ကြီးကျတာရှိတယ် ကြားလို့ ခဏ ပြန်ကြည့်တာ၊ ခုက တစ်ခြားရွာတွေမှာ နေနေတာ၊ တစ်ချို့က ဆွေမျိုးအိမ်မှာ နေတယ်၊ တိုက်ပွဲကတော့ ငြိမ်နေတယ်” ဟု အထက်ပါ ဒေသခံက ပြောသည်။
ချောင်းဆုံကျေးရွာတွင် အိမ်ခြေ (၁၃)အိမ်နှင့် လူဦးရေ (၄၀)ဝန်းကျင်ခန့် ရှိနေပြီး ရေလမ်းကြောင်းကိုသာ အဓိက အားထားကာ သွားလာရသည့် ဒေသဖြစ်ကြောင်း သိရသည်။

ထိုပြည်သူများ၏ နေအိမ်၊ ဂိုဒေါင် ထိခိုက်ပျက်စီးမှုများနဲ့ပတ်သက်ပြီး နှစ်ဖက်တပ်များအနေနဲ့ တာဝန်ယူ ဖြေရှင်းပေးစေချင်ကြောင်း၊ ထို့အပြင် တိုက်ပွဲများ အမြန်ဆုံး ရပ်တန့်ပေးရန် ဒေသခံတစ်ဦးက ပြောသည်။

“အိမ်တစ်အိမ်ရဲ့ တန်ဖိုးက မနည်းဘူးလေ၊ ပြည်သူတွေရဲ့ ချွေးနဲ့ ကြိုးစားပြီး ဆောက်ခဲ့ရတာ၊ လွယ်လွယ်နဲ့ ဆောက်လို့ ရတာမဟုတ်ဘူး၊ ပြည်သူတွေဘက်ကို ပြန်ကြည့်ပေးစေချင်တယ်၊ ငဲ့ညာပေးစေချင်တာပေါ့၊ နှစ်ဖက်တပ်တွေအနေနဲ့ တာဝန်ယူပြီး ဖြေရှင်းပေးစေချင်တယ်၊ နောက်ပြီး တိုက်ပွဲ အမြန်ဆုံး ရပ်တန့်ကြဖို့ ထပ်ပြီး တောင်းဆိုပါတယ်” ဟု ဒေသခံ အမျိုးသမီး တစ်ဦးက ပြောသည်။

သီပေါမြို့နယ်တွင် လက်နက်ကိုင်တပ်တိုက်ပွဲ ငြိမ်သွားပြီး စစ်ရှောင်များ နေရပ်ပြန်သွားသော်လည်း ကျောက်မဲမြို့နယ်တွင် စစ်ရှောင် (၁၀၀၀)ကျော်၊ မိုင်းကိုင်မြို့နယ်တွင် စစ်ရှောင် (၃၀၀)ကျော် ဆက်လက်ကျန်ရှိနေဆဲဖြစ်ကြောင်း သိရသည်။