သျှမ်းပြည်မြောက်ပိုင်း သီပေါ နှင့် ကျောက်မဲ မြို့ နယ် အတွင်း အရပ်သား ပြည်သူများ ကို အမည်မသိ လက်နက်ကိုင် တပ်ဖွဲ ့များက မကြာခဏ ပစ်ခတ် သေဆုံးမှုတွေ ရှိနေသည်။
ထိုပစ်ခတ်သေဆုံးမှုများ ကြောင့် သီပေါမြို့နယ် နှင့် ကျောက်မဲမြို့နယ် အတွင်း နေထိုင်သည့် ဒေသခံများက လုံ ခြုံရေး အထူး စိုးရိမ်ကြောက်ရွံ့မှုတွေ ရှိနေကြသည်။
ယခုနှစ်အတွင်း သီပေါမြို့နယ် အတွင်း အရပ်သား ပြည်သူ အကြောင်းမဲ့ ပစ်ခတ်ခံနေရတာ ၁၀ဦး ခန့် ရှိကြောင်း သီပေါ နာရေး ကူညီမှု အသင်း ၏ ဖေ့ဘွတ်စ် စာမျက်နှာ တွင် ဖော်ပြထားသည်။
အရပ်သားပြည်သူများ ကို လာရောက်ပစ်ခတ်သည့် လက်နက်ကိုင် အဖွဲ့ဝင်များမှာ ညအချိန် တွင် အရပ်သားနေအိမ်ထိ ဆိုင်ကယ်မောင်းလာပြီး ပစ်ခတ်မှုများ ပြုလုပ်ကြကြောင်း တွေ့ရသည်။
လက်ရှိမှာတော့ သီပေါမြို့နယ် နှင့် ကျောက်မဲမြို့နယ် မှာ တရားဥပဒေ စိုးမိုးမှုတွေ ကင်းဝေး နေပြီး ၊ လက်နက်ရှိရင် မည်သည့် ကိစ္စမဆို ဖြေရှင်းနိုင်မည် ဟု ယူဆနေကြကြောင်း ဒေသခံများက ဝေဖန် ထောက်ပြသည်။
“ ကျနော်တို့နယ်မြေမှာက လက်နက်ကိုင် အဖွဲ့တွေ များပါတယ်။ ပြသနာ တခုခု ဖြစ်လာရင် သေနတ်နဲ့ ဖြေရှင်းမယ်ဆိုတဲ့ ပုံစံမျိုးဖြစ်နေတယ်။ လက်နက်တွေကလည်း အလွယ်ဝယ်နိုင်နေတယ်။ တရားဥပဒေ စိုးမိုးမှု အရမ်းဝေးနေတယ်” လို့ သီပေါမြို့ခံ စိုင်းအိုက် က ပြောသည်။
သီပေါမြို့နယ် အတွင်း က လှုပ်ရှားသည့် လက်နက်ကိုင် အဖွဲ့တွေ များပြီး ၊ အရပ်သားများ ပစ်ခတ်ခံရသည့် အပေါ် ခန့်မှန်းရခက်နေကြောင်း၊ တချို့ ကိစ္စများမှာ ပုဂ္ဂိုလ်ရေး နှင့် ဆက်နွယ်နိုင်ကြောင်းလည်း သီပေါမြို့နယ် ပြည်နယ် မဲဆန္ဒနယ် အမှတ် (၂) လွှတ်တော်ကိုယ်စားလှယ် စိုင်းခမ်းအောင် က ပြောပါတယ်။
“ လက်နက်ကိုင် အဖွဲ့တွေက အရပ်ဝတ်နဲ့ သွားလာ လှုပ်ရှားနေတော့ မသိနိုင် မမြင်နိုင်ဘူး။ ဒီခေတ် ဒီကာလ က လက်နက်တွေ ပေါနေတော့ တရားမဝင် စီးပွားရေးလုပ်နေတဲ့သူတွေကလည်း ရှိနိုင်တဲ့အခြေအနေပါ။ ဒီလို တစစ တွေက ပြောရခက်တယ်။ ခန့်မှန်းရခက်တယ်” ဟု စိုင်းခမ်းအောင် က ဆိုသည်။
အပစ်ခတ်ခံရသည့် ပြည်သူများ၏ နောက်ကြောင်းရာဇာဝင် ကို သေချာ မသိရှိ သကဲ့သို့ လာရောက် ပစ်ခတ်သည့် လက်နက်ကိုင် အဖွဲ့ဝင် များနှင့် မည်ကဲ့သို့ ဆက်နွယ်သည်ကို မသိရှိသဖြင့် ပြောဆိုရ ခက်ခဲ့ သည်ဟုလည်း စိုင်းခမ်းအောင် က ပြောသည်။
သီပေါမြို့ ပြည်သူများ ၏ စိုးရိမ်ပူပန်မှုက နေ့စဉ် အမြဲ ရှိနေပြီး၊ အရပ်သားများကို သေနတ်ပစ်သတ်ခြင်း ကလည်း ဒေသခံများကို ခြိမ်းခြောက်မှု တခု ဖြစ်ကြောင်း သီပေါမြို့နယ် နယ်စည်းမခြား ပရဟိတ အသင်း မှ ကိုမျိုးက ပြောသည်။
“ ဒီနှစ် သေနတ်ပစ်သတ်ခံရတာ ပိုများတယ်။ အခြေအနေက လည်း ပိုဆိုးလာတယ်။ ပြည်သူတွေရဲ့ ဘဝလုံခြံုမှု မရှိတော့ဘူးလို့ ” ကိုမျိုးက ဆိုသည်။
သီပေါမြို့နယ်နှင့် ကျောက်မဲမြို့နယ် ကြား မကြာခဏ ပစ်ခတ်မှုတွေများလာသည့် ကိစ္စသည် စစ်ရေးပစ်မှတ်များ မဟုတ်ကြောင်း၊ အရပ်ဖက် ပြည်သူများကို ပစ်မှတ်ထားနေကြောင်း ကျောက်မဲမြို့နယ် ဇိဝိတ လူမှု ကူညီရေး အသင်းမှ ဦးတင်မောင်သိန်း က ပြောသည်။
“ နွားကားတို့ နေအိမ်ထဲဝင်ပစ် ပြီး ပြည်သူတွေသေဆုံးတာ ကိုကြည့်ရင် လက်နက်ကိုင်အဖွဲ့တွေရဲ့နည်းဗျူဟာ ဘာလဲဆိုတာ စဉ်းစားစရာဖြစ်လာတယ်။ နွားကားကို ပစ်တာ က အခွန်လို့ခေါ်တဲ့ ဆက်ကြေးမပေးလို့ ။နေအိမ်ထဲဝင်ပစ်တာကတော့ စဉ်းစားစရာဘဲ” လို့ ကျောက်မဲ မြို့နယ် ဇိဝိတ လူမှု ကူညီရေး အသင်းမှ ဦးတင်မောင်သိန်း က ပြောပါသည်။
သေနတ်ပစ်ခံရသူတွေ ဟာ စစ်တပ်ရဲ့ သတင်းပေးတွေ မဟုတ်ဘဲ သာမာန် အရပ်သားတွေ သာဖြစ်ကြောင်း၊ သတ်ခံရတဲ့ သူအများစု က သျှမ်း နဲ့ ပလောင် (တအာန်း) လူမျိုးတွေ ဖြစ်ကြောင်း၊ သတ်ခံရတဲ့ သူတွေမှာ လက်နက်မရှိကြောင်း ဦးတင်မောင်သိန်းက ဆိုပါသည်။
“ စကားတခုခုကြေင့် အထင်လွဲပြီး ပစ်ခတ်ခံရတာမျိုးဖြစ်ပါလိမ့်မယ်။ဖြေရှင်းခွင့်မရှိ။ရန်ငြိုးမရှိဘဲ ပစ်လိုက်တာပဲ။ တနည်းအားဖြင့် အရပ်သူအရပ်သားတွေကို ခြိမ်းခြောက်လိုက်တာပဲ” လို့ ဦးတင်မောင်သိန်း က ထပ်လောင်း ပြောပါသည်။
အရပ်သား ပြည်သူ ပစ်သတ်ခံရသည့် မှာ ယခုနှစ်အတွင်း ဖြစ်ပွားမှု များခဲ့ပေမယ့် တကြိမ်မျှ အမှုမှန် မပေါ်ပေါက် ကြောင်း၊ လာရောက်ပစ်ခတ်သည့် လက်နက်ကိုင် အဖွဲ့ကိုလည်း သေချာ ဖော်ထုတ်ပြောဆိုခြင်း မရှိကြောင်း သီပေါမြို့နယ် မှ ဒေသခံများက ပြောဆိုကြသည်။
“ ရန်ကုန်လေဆိပ် လူများတဲ့ နေရာ မှာတောင် ရှေ့နေ ဦးကိုနီ လုပ်ကြံ ပစ်သတ်ခံရတာ အရေးမယူနိုင်သေးတာ။ ကျနော်တို့ လို နယ်မြေဆို တရားဥပဒေ စိုးမိုးမှု က ပိုဝေးပါတယ်” ဟု စိုင်းခမ်းအောင်က မှတ်ချက်ပြုလိုက်သည်။
သေနတ်ပစ်သတ်ခံရသည့် အမှု များ ကို လူသတ်မှုဖြင့်အမှုဖွင့်ပြီး၊ အချိန်တန်ကာ စုံစမ်း ထောက်လှမ်း မရပါက အမှုများ ပိတ်သိမ်းလိုက်ကြောင်းလည်း ဦးတင်မောင်သိန်းက ဝေဖန် ထောက်ပြလိုက်သည်။
သီပေါမြိုု့နယ် အတွင်း နေထိုင်သည် ပြည်သူများအတွက် တဖက်လှည့် ခြိမ်းခြောက်လိုက်ပြီး၊ လက်နက်ကိုင် တပ်ဖွဲ့များဖြင့် အဆင်မပြေမှုများရှိ လက်နက်ဖြင့် သာ ဖြေရှင်းမည် ဆိုသည့် ပုံစံ မျိုးဖြစ်နေကြောင်းလည်း သီပေါဒေသခံများက ပြောဆိုကြသည်။
“ လက်နက်ကိုင် တွေက သူတို့နဲ့ အဆင်မပြေရင်သေနတ်နဲ့ ပစ်သတ်မယ် ဆိုပြီး ခြိမ်းခြောက်နေသလိုပါပဲ။ သီပေါမှာ နေရတာ ကိုယ့် အလှည့် ဘယ်တော့လဲ ဆိုတာ စဉ်းစားနေရသလိုပါပဲ။ လုံခြံုရေးကတော့ ကိုယ့် ဘာသာကိုပဲ ပြန်ယူနေရပါတယ်” လို့ သီပေါမြို့ဒေသခံ စိုင်းအိုက် ကပြောသည်။
သီပေါမြို့နယ် အတွင်း တရားဥပဒေမဲ့ ပစ်ခတ်မှု များရပ်တန့်နိုင်ရေး အတွက် တရားဥပဒေ စိုးမိုးရေး လိုအပ်နေ ကြောင်း ဒေသခံများက ပြောဆိုကြသည်။
သီပေါမြို့နယ် အတွင်း အစိုးရ တပ်မတော် ရှိနေသော်လည်း ပစ်ခတ်ခံရမှုများ တဖြည်းဖြည်းများလာသည့်အတွက် မည်သည့်လက်နက်ကိုင် အဖွဲ့ကို မှ အားမကိုးရကြောင်းလညး် သီပေါ ဒေသခံများ ကဝေဖန်ပြောဆိုနေကြပါသည်။
“ ကျနော်တို့ သီပေါမြို့ က လုံခြံုရေး လုံးဝ မရှိတဲ့ အနေအထားဖြစ်နေတယ်။ လက်နက်ကိုင်တဲ့သူတိုင်း ကြောက်နေရတယ်။ ကိုယ့်လုံခြံုရေး က ကိုယ့် ဘာသာ တာဝန်ယူနေရတယ်” လို့ သီပေါမြို့ဒေသခံစိုင်းအိုက် က ဆိုသည်။
သျှမ်းပြည် မြောက်ပိုင်း သီပေါမြို့နယ် နှင့် ကျောက်မဲ မြို့နယ် အတွင်း အစိုးရ တပ်မတော်၊ အစိုးရ တပ်မတော် လက်အောက်ခံပြည်သူ့စစ် များ အပြင် သျှမ်းပြည် ပြန်လည်ထူထောင်ရေး ကောင်စီ( RCSS/SSA)၊ သျှမ်းပြည် တိုးတက်ရေး ပါတီ၊ သျှမ်းပြည် တပ်မတော် ( SSPP/SSA ) ၊ တအာင်း (ပလောင်) အမျိုးသား လွတ်မြောက်ရေး တပ်မတော် TNLA တို့ လှုပ်ရှားသည့် နေရာ ဖြစ်ကြောင်း သိရသည်။
Leave a Comments