စစ်ပွဲသည် ပြဿနာဖြေရှင်းသည့် နည်းလမ်းမဟုတ်ကြောင်း၊ စစ်ပွဲအမြန်ဆုံးရပ်စဲပြီး ဆွေးနွေးညှိနှိုင်းသောနည်းလမ်းဖြင့် ပြဿနာကို အမြန်ဖြေရှင်းကြရန် သျှမ်းပြည် သံဃာနှင့် ပြည်သူ ငြိမ်းချမ်းရေး ပူးပေါင်းဆောင်ရွက်ရေး ကော်မတီက တိုက်တွန်းလိုက်သည်။

ထိုတိုက်တွန်း တောင်းဆိုမှုကို သျှမ်းပြည် သံဃာ နှင့် ပြည်သူငြိမ်းချမ်းရေး ပူးပေါင်းဆောင်ရွက်ရေး ကော်မတီက နိုဝင်ဘာ ၁၃ ရက်တွင် ထုတ်ပြန်ခဲ့သည်။

နိုဝင်ဘာ ၁၃ ရက်တွင်လည်း အဆိုပါ ကော်မတီသည် သျှမ်းပြည်မြောက်ပိုင်း ကျောက်မဲမြို့နယ်အတွင်းသို့သွားရောက်ကာ စစ်ဘေးရှောင်များကို စားနပ်ရိက္ခာအပြင် ဆေးဝါးများကိုလည်း ကူညီထောက်ပံ့ခဲ့သည်။

လက်ရှိမှာ စစ်ပွဲကြောင့် ဒေသခံမိဘပြည်သူများနှင်း ၎င်းတို့ပိုင် အိုးအိမ် တိုက်တာ အဆောက်အဦးများ၊ လယ်ယာများ၊ သာသနာ့အဆောက်အအုံများ ထိခိုက်မှုရှိပြီး ခြိမ်းခြောက်ခံရမှုနှင့် လူ့အခွင့်အရေး ချိုးဖောက်မှုများရှိလာသောကြောင့် ဒေသခံမိဘပြည်သူများ ဘေးကင်းလုံခြုံရေးနှင့် လိုအပ်သော အကူအညီများ ကူညီပံ့ပိုးပေးနိုင်ရေးအတွက် ကော်မတီမှ သျှမ်းစစ်တပ် ၂ တပ်နှင့် ၎င်းတို့၏ မဟာမိတ်များကို မေတ္တာရပ်ခံတောင်းဆိုထားသည်။

ထို့အပြင် ရဟန်းသာမဏေများနှင့် ကလေးများအပါအဝင် ပြည်သူများကို အတင်းအဓမ္မတပ်သားသစ်များစုဆောင်ခြင်း စသည် အခြေခံ လူ့အခွင့်အရေးကို ချိုးဖောက်ရာရောက်သဖြင့် ထိုလုပ်ရပ်များကို ပြုလုပ်သော မည့်သည့်အဖွဲ့အစည်းမဆို အလျင်အမြန် ရပ်စဲပေးရန်လည်း ကော်မတီက တိုက်တွန်းပြောဆိုထားသည်။

သျှမ်းပြည်နယ်အတွင်း တိုင်းရင်းသားလက်နက်ကိုင်အချင်းချင်း တိုက်ပွဲဖြစ်ပွားမှုကြောင့် စစ်ရှောင်များ ထောင်ချီ နေရပ်စွန့်ခွာ ထွက်ပြေးတိမ်းရှောင်နေကြရသည်။