သျှမ်းပြည်တောင်ပိုင်း အောင်ပန်းမြို့တွင် စစ်ကောင်စီတပ်ဖွဲ့သည် နှစ်ရက်ဆက်တိုက် ရပ်ကွက်တွင်းလှည့်ပြီး သေနတ်ဖြင့် ပစ်ခတ်ခြောက်လှန့်မှုများ ပြုလုပ်ကြောင်း ဒေသခံများက ပြောသည်။
ယမန်နေ့ အောက်တိုဘာလ ၉ ရက် ည ၁၀ နာရီဝန်းကျင်တွင် အောင်ပန်းမြို့ရှိ ဟိုက်ဒရိုက်ကားကွင်းမှ စတင်ကာ ရပ်ကွက်များဘက်အထိ စစ်ကောင်စီတို့မှ သေနတ်ဖြင့် ပစ်ခတ်ခြောက်လှန့်ခြင်းများ ပြုလုပ်ခဲ့ကြောင်း အောင်ပန်းမြို့နေ ပြည်သူတစ်ဦးက သျှမ်းသံတော်ဆင့်ကို ပြောသည်၊၊
“မနေ့ညက ကားကွင်းဘက်မှာ ကုန်တင်ကားကြီးကို စစ်သားတွေက တားတာ ချက်ချင်းမရပ်ပေးလို့ ပစ်တာတဲ့၊ အဲ့ကနေ ကားမောင်းပြေးတဲ့အသံတွေရော၊ သေနတ်သံတွေရော ကြားရတယ်၊ ပြီးတော့ စစ်သားတွေက ရပ်ကွက် တွေဘက်ကို လှည့်ပြီးပစ်တာ” ဟု အထက်ပါ ပုဂ္ဂိုလ်က ပြောသည်။
ထို့ပြင် နိုဝင်ဘာလ ၁၀ ရက် ည ၉ နာရီဝန်းကျင်တွင်လည်း စစ်ကောင်စီတို့သည် အောင်ပန်းမြို့ အပေါ်ဈေး ခန်းမအနီးမှ စတင်ကာ အခြားရပ်ကွက်များကိုဘက် လှည့်လည်ပစ်ခတ် ခြောက်လန့်မှုများ ပြုလုပ်ခဲ့ကြောင်း သိရသည်။
“စပစ်တာက မိန်းလမ်းဘက်ကနေ သေနတ်သံ ငါးချက် စကြားတယ်၊ ခနငြိမ်ပြီးတော့ သေနတ်သံတွေ ထပ်ကြားရပြန်တယ်၊ ရပ်ကွက်လှည့်ပြီး ပစ်တာ၊ တစ်နေရာကို သေနတ်သံ ၄/၅ ချက်နဲ့ ပစ်တာ၊ ညအချိန်ဆိုတော့ ဘယ်သူမှ ထွက်မကြည့်ရဲဘူး၊ ထိခိုက်မှု ရှိ မရှိလည်း မသိရပါဘူး၊ မနက်ရောက်တော့ အားလုံးပုံမှန်လိုပဲ သွားလာကြတယ်” ဟု ၎င်းက ပြောသည်။
ယခုရက်ပိုင်းအတွင်းတွင် စစ်ကောင်စီတို့သည် အောင်ပန်းမြို့တွင်းရှိ NLD ပါတီဝင်များနှင့်ထောက်ခံသူများကို နောက်ယောင်ခံ စုံစမ်းဖမ်းဆီးခြင်းများရှိနေသည့်အပြင် လူငယ်များကိုလည်း ဖမ်းဆီးနေကြောင်း သိရသည်။
Leave a Comments