သျှမ်းပြည်တောင်ပိုင်း ကလောမြို့နယ် အတွင်း ယမန်နေ့ (နိုဝင်ဘာ ၄)ရက်စွဲဖြင့် ပုဒ်မ ၁၄၄ ထုတ်ပြန်လိုက်သည့် အတွက် ဒေသခံများ စိုးရိမ်ပူပန်နေကြကြောင်း စုံစမ်းသိရသည်။

ယမန်နေ့ နိုဝင်ဘာလ ၄ ရက်နေ့ ရက်စွဲပါ ကြေညာချက်တွင် တောင်ကြီးခရိုင်၊ ကလောမြို့နယ်အား မြို့နယ် အထွေထွေအုပ်ချုပ်ရေးဦးစီးဌာနက ရာဇဝတ်ကျင့်ထုံး ဥပဒေပုဒ်မ ၁၄၄ အမိန့် ထုတ်ပြန်သည့်အတွက် အဖမ်းအဆီးကြမ်းလာမည်ကို စိုးရိမ်ရကြောင်း ကလောမြို့ ဒေသခံ တစ်ဦးက ပြောသည်။

“နဂိုကတည်းက နယ်မြေလုံခြုံမှုမရှိတဲ့ ကျနော်တို့ကလောမှာသွားရေးလာရေးကအစ ကျနော်တို့ သတိထားပြီး သွားရတယ်၊ အခု ၁၄၄ ထုတ်လိုက်တော့ စစ်ကောင်စီကလွဲရင် ကျနော်တို့ ပြည်သူတွေ အခွင့်အရေးတွေဆုံးရှုံးရတယ်။ အဖမ်းအဆီးတွေလည်းများလာနိုင်တယ် ” ဟု ကလောမြို့ခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

ကလောမြို့နယ်အတွင်းတွင် ထုတ်ပြန်လိုက်သည့် ပုဒ်မ ၁၄၄ သည် လူ ၅ ဦးထက်ပိုပြီး စုဝေးခြင်း၊ ဟောပြော ခြင်း၊ ယာဉ်တစ်မျိုးမျိုးကို အသုံးပြု၍ ဖြစ်စေ၊ လူကိုယ်တိုင် ဖြစ်စေ စီတန်းလှည့်လည်ခြင်း၊ လှုံ့ဆော်ဆန္ဒ ပြခြင်း၊ ဖျက်ဆီးခြင်း၊ ရုန်းရင်းဆန်ခတ် ပြုခြင်းများကို မပြုလုပ်ရန်တားမြစ်သည်ဟုလည်း အမိန့်စာတွင် ပါရှိသည်။

“ကျနော်တို့ မြို့မှာက စစ်ကောင်စီက လူလိုက်ဖမ်းတာ နေ့တိုင်းလိုလိုရှိနေတယ်၊ အရင်ကလည်း ညမထွက်ရ အမိန့်တွေရှိနေပြီးသားဆိုတော့ မသိရဘဲနဲ့ အဖမ်းခံရတဲ့သူတွေလည်းရှိတယ်၊ အခုကလည် ပုဒ်မ ၁၄၄ ထပ်ထုတ် တာဆိုတော့ ပြည်သူတွေပိုပြီး အပြင်မထွက်အောင်ရဲအောင် ခြောက်နေတယ်လို့ ကျနော်မြင်တယ်” ဟု အထက် ပါ ပုဂ္ဂိုလ်က ပြောသည်။

ထို့အပြင် လူ ၅ ဦး သို့မဟုတ် လူ ၅ ဦးထက် ပိုသောသူများသည် မြို့နယ်အတွင်း လမ်းမကြီးများ၊ အများ ပြည်သူများ သွားလာလမ်း၊ လမ်းသွယ်လမ်းကြား၊ ဥယျာဉ် သို့မဟုတ် အများပြည်သူနှင့် ဆိုင်သော နေရာများတွင် စုဝေးခြင်း မပြုရန်နှင့် ည ၁၀ နာရီမှ နံနက် ၄ နာရီအတွင်း အပြင်မထွက်ရဟု ထည့်သွင်းရေးသားထားသည်။

ယခုရက်ပိုင်းအတွင်း ကလောမြို့နယ်အတွင်း ရပ်ကွက်နေပြည်သူများနှင့် လူငယ်များစွာတို့ကို စစ်ကောင်စီတို့မှ အကြောင်းမဲ့ လိုက်လံ ဖမ်းဆီးခြင်းများ ပြလုပ်နေသည့် အတွက် နံနက်ပိုင်းအချိန်နှင့် နေ့ခင်းပိုင်းအချိန်မှ လွဲရင် အပြင်ထွက်သူ မရှိသလောက် မြို့ကြီးက ငြိမ်သက်နေကြောင်းလည်း ဒေသခံများက ပြောသည်။