သျှမ်းပြည်တောင်ပိုင်း အောင်ပန်းမြို့ မင်္ဂလာရပ်ကွက်တွင်နေထိုင်သည့် အမျိုးသမီး တစ်ဦးကို စစ်ကောင်စီအုပ်စုက လာရောက်ရှာဖွေစဉ် နေအိမ်ရှိပစ္စည်းများကို ဝင်ရောက်ဖျက်ဆီးပြီး ဖုန်းများကိုလည်း သိမ်းယူသွားကြောင်း စုံစမ်းသိရသည်။
ပြီးခဲ့သည့် အောက်တိုဘာလ ၂ ရက်နေ့ ည ၁၁ နာရီခွဲဝန်းကျင်တွင် အောင်ပန်းမြို့ မင်္ဂလာရပ်ကွက်ရှိ နေအိမ်တစ်ခုအား စစ်ကောင်စီတို့မှ အင်အားအလုံးအရင်းဖြင့် လာပြီး တံခါးကို ဖျက်ဆီးဝင်ရောက်စီးနင်းကာ အမျိုးသမီးတစ်ဦးကို လာရောက် ရှာဖွေခဲ့ကြောင်း သိရသည်။
“၁၁ နာရီခွဲလောက်ရှိနေပြီ ကားနဲ့ ရောက်လာကြတာ၊ ရဲရော စစ်သားရော၊ အရပ်ဝတ်နဲ့ ရပ်ကွက်ထဲက လူတချို့ ကလည်းပါတယ်၊ စုစုပေါင်း ၂၀ ကျော်လောက်ရှိတယ်၊ စာရွက်တစ်ရွက်နဲ့ အိမ်ထဲဝင်လာတယ်၊ သူ့နာမည်ပြောပြီး မေးစရာရှိလို့လာခေါ်တာတဲ့၊ မရှိဘူး၊ ခရီးထွက်နေတယ် ပြောတော့ ပစ္စည်းတွေကို မွှေနှောက်ဖျက်ဆီးပြီး တွေ့သမျှ ဖုန်းတွေ ယူသွားတယ်” ဟု ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
စစ်သားတို့လာရှာသည့် အိမ်မှ အမျိုးသမီးသည် ခရီးထွက်နေတာ တစ်ပတ်ခန့်ရှိနေပြီး မည်သည့်အကြောင်းကြောင့် စစ်ကောင်စီတို့မှ လာရှာသည်ကိုလည်း မသိရကြောင်း မိသားစုဝင်နှင့် နီးစပ်သူများက ပြောသည်။
“သူခရီးထွက်နေတာ တစ်ပတ်ခန့်ရှိနေပြီ၊ အိမ်မှာ သူ့အမေရယ်၊ သူ့သမီးရယ်ပဲ ကျန်ခဲ့တယ်၊ ပြီးတော့ အမေဖြစ် သူကလည်း လူကြီးရောဂါနဲ့ အိပ်ရာထဲလှဲနေတာ၊ အဲ့ညက စစ်သားတွေ လာသောင်းကျန်းသွားလို့ အောက်စီဂျင် တောင် တပ်ပေးလိုက်ရတယ်” ဟု အထက်ပါပုဂ္ဂိုလ်က ပြောသည်။
စစ်ကောင်စီတို့သည် ၎င်းတို့လာရှာသည့် အမျိုးသမီးကို မတွေ့သဖြင့် ယူဆောင်သွားသည့် လက်ကိုင် ဖုန်း(၃) လုံးကို နောက်တစ်ရက်(နိုဝင်ဘာ ၃ရက်) မနက်ပိုင်းအချိန်တွင် ပြန်လည်ယူဆောင်လာပြီး Lock ဖွင့်ခိုင်းကြောင်းလည်း မျက်မြင်တွေ့ရသည့် ဒေသခံများက ပြောသည်။
“အိမ်နီးချင်းတွေ သွားပြီး အိမ်တွင်းသန့်ရှင်းရေး ကူလုပ်နေတဲ့အချိန်မှာ စစ်သားတွေ ပြန်ရောက်လာတယ်၊ ဖုန်း Lock ဖွင့်ပေးပါ၊ မဖွင့်ရင် လက်ဖြတ်ပစ်မယ်ဆိုလို့ တစ်လုံးက ဖွင့်ပေးလိုက်တယ်၊ ကျန်တဲ့ဟာတွေတော့ သူ(အမျိုးသမီး၏ သမီး)လည်းမသိလို့တဲ့” ဟု ဒေသခံတစ်ဦးကလည်း ပြောသည်။
ယခုရက်ပိုင်းတွင် အောင်ပန်းမြို့နယ်အတွင်း ရပ်ကွက်နေပြည်သူများနှင့် လူငယ်များစွာတို့ကို စစ်ကောင်စီတို့မှ အကြောင်းမဲ့ ဖမ်းဆီး ရိုက်နက်ခြင်းများ နေ့စဥ်ရက်ဆက်ရှိလာကြောင်းလည်း သတင်းသိရသည်။
Leave a Comments