သျှမ်းပြည်မြောက်ပိုင်း မူဆယ်မြို့ ဟိုမွန်ရပ်ကွက်ရှိ ကချင်ဈေး လမ်းဆုံအနီးတွင် ဆိုင်ကယ်စီးလာသည့် လူငယ်တစ်ဦး သေနတ်ဖြင့် ပစ်သတ်ခံရကြောင်း သတင်းသိရသည်။
ယနေ့ နိုဝင်ဘာလ ၂ ရက်နေ့ မွန်းလွဲပိုင်း ၃ နာရီအချိန်တွင် ကချင်ဈေး လမ်းဆုံအနီးသို့ ဆိုင်ကယ်မောင်းနှင်လာသည့် လူငယ်တစ်ဦးသည် ဦးခေါင်းပိုင်း ချိန်ပြီးပစ်သည့် သေနတ်ဒဏ်ရာ သုံးချက်ဖြင့် သေဆုံးရကြောင်း သိရသည်။
“ကောင်လေးက ဈေးရပ်ကွက်ထဲနေတယ်၊ ကျည်ဆံက ခေါင်းတစ်ချက်နဲ့ လည်ပင်းကို တစ်ချက် ဖောက်ဝင်သွားတယ်၊ အခု Dead body က မူဆယ် ဆေးရုံကို ပို့ထားပြီ” ဟု ရုပ်အလောင်းကို သွားရောက်သယ်ဆောင်ခဲ့သည့် ဂရုဏာ ပရဟိတအသင်းမှ အဖွဲ့ဝင် တစ်ဦးက သျှမ်းသံတော်ဆင့်ကို ပြောသည်။
အဆိုပါ သေနတ်ဖြင့် ပစ်သတ်ခံရသည့် လူငယ်သည် မူဆယ်မြို့ရှိ ဈေးရပ်ကွက်တွင် မိဘများနှင့် နေထိုင်သူ တစ်ဦးဖြစ်ပြီး မည်သည့် အကြောင်းကြောင့် ပစ်သတ်ခံရသည်ကို မသိရကြောင်းလည်း ဒေသခံများက ပြောသည်။
သျှမ်းပြည် မြောက်ပိုင်း မူဆယ်မြို့နယ်အတွင်းတွင် ယခုကဲ့သို့ အကြောင်းရင်းမသိ တရားခံမပေါ်သည့် အသတ်ခံရမှုများ မကြာခဏ ဖြစ်ပွားလေ့ရှိကြောင်းလည်း လူမှုကူညီရေးအသင်းဝင်များက ပြောသည်။
