သျှမ်းပြည်တောင်ပိုင်း၊ရွာငံမြို့နယ် နွားဘန်းကြီး ကျေးရွာအုပ်စုတွင် နေထိုင်သည့် လင်မယားနှစ်ဉီးကို အမည်မသိလက်နက်ကိုင်တပ်ဖွဲ့က သေနတ်ဖြင့်လာရောက်ပစ်သဖြင့် အမျိုးသမီးသေဆုံးပြီး အမျိုးသား ဒဏ်ရာပြင်းထန်ကြောင်း သတင်းရရှိသည်။
အဆိုပါ နွားဘန်းကြီး ကျေးရွာအုပ်စုတွင် နေထိုင်သည့် လင်မယားနှစ်ဉီးကို ပြီးခဲ့သည့် ဖေဖော်ဝါရီ ၂၁ရက်တွင် အမည်မသိလက်နက်ကိုင်တပ်ဖွဲ့က ၎င်းတို့၏ နေအိမ်ကို ရောက်ရှိလာပြီး သေနတ်ဖြင့် ပစ်ခဲ့ကာ အမျိုးသမီး သေဆုံးပြီး အမျိုးသား ဒဏ်ရာပြင်းထန်ရရှိခဲ့ကြော်း ရွာငံ ဒေသခံ အမျိုးသားတစ်ဉီးက သျှမ်းသံတော်ဆင့်ကိုပြောသည်။
“အသတ်ခံရတဲ့ လင်မယားက ရိုးရိုးသားသား အုတ်ရိုက်စားတဲ့သူတွေပဲ၊ PDF တွေ သတ်တာထင်တယ်၊ သူ့မိန်းမက သေပြီး သူ့ယောကျာ်းက တောင်ကြီးဆေး ရုံမှာပါ။ ဘာလို့ သတ်တာလဲမသိဘူး၊ ပုဂ္ဂိုလ်ရေးနဲ့ နိုင်ငံရေး မကွဲပဲ လုပ်ချင်တာ လုပ်နေကြတာလားမသိဘူး။ ”ဟု ၎င်းကဆိုသည်။
ယခုလက်ရှိ နွားဘန်းကြီးကျေးရွာနှင့် ပွေးနဖား ကျေးရွာတွင် စစ်ကော်မရှင်တပ်က ညစဉ် နေအိမ်များကို လူရှိ၊မရှိ လိုက်လံ စစ်ဆေးနေပြီး နေအိမ်၌ လူမရှိလျှင် အိမ်မီးရှီု့ခံရမည်ကို စိုးရိမ်နေကြကြောင်း အဆိုပါ အမျိုးသားက ပြောသည်။
ဆက်လက်ပြီး ပြီးခဲ့သည့် ဖေဖော်ဝါရီလ (၁၉)ရက်နေ့တွင် အင်အား (၃၀) ဝန်းကျင်ရှိသည့် စစ်ကော်မရှင်တပ်က စစ်ကြောင်းထိုးပြီး ပြန်လာချိန်တွင် အုတ်တွင်းရွာနှင့် ကျောက်ငှက်ကျေးရွာကြားတွင် မိုင်းဆွဲတိုက်ခိုက် ခံရပြီး (၁၀)ဦးခန့် ထိခိုက် ဒဏ်ရာ ရရှိခဲ့ကြောင်း သိရသည်။
ထိုသို့ မိုင်းဆွဲခံရပြီး စစ်ကော်မရှင်တပ်နှင့် တော်လှန်ရေးတပ်တို့ကြား ထိတွေ့တိုက်ပွဲ ဖြစ်ပွားခဲ့ပြီး အနီးနား ကျေးရွာ (၁၀)ရွာခန့်ကို စစ်တပ်က ညမထွက်ရ အမိန့် ထုတ်ပြန်ထားကြောင်း သိရသည်။
“အုတ်တွင်းနဲ့ ကျောက်ငှက်ရွာကြားမှာ မိုင်းဆွဲ ခံရလို့ စစ်သား (၁၀)ယောက် ဒဏ်ရာရတယ် လို့ကြားတယ်၊ သူတို့အဲနားမှာ တိုက်ပွဲဖြစ်တာ သေနတ်သံတွေကြားလိုက်တယ်၊ တိုက်ပွဲဖြစ်ပြီး ည (၆)နာရီ နောက်ပိုင်း အပြင်မထွက်နဲ့ ထွက်ရင် ပစ်သတ်မယ် ပြောထားတယ်၊ အဲကြောင့် ဘယ်သူမှ အိမ်ပြင်မထွက်ရဲတော့ဘူး။”ဟု ရွာငံမြို့နယ် ဒေသခံ အမျိုးသမီး တစ်ဉီးက သျှမ်းသံတော်ဆင့်ကိုပြောသည်။
ထို့အပြင် စစ်ကော်မရှင်တပ်က တောနှင့် နီးစပ်သည့် ကျေးရွာများတွင် တပ်စွဲထားပြီး ဒေသခံများ၏ ကားကို ယူဆောင်ကာ နေ့စဉ် စစ်ကြောင်းထိုးမှုများ လုပ်ဆောင်နေကြောင်း ၎င်းက ဆက်ပြောသည်။
ဇန်နဝါရီလ နောက်ဆုံးပတ် ည ၁၀ နာရီခန့်တွင် ရွာငံမြို့နယ် လယ်ကိုင်းကျေးရွာနေ အသက် ၄၀ မှ ၆၀ နှစ်ခန့်ရှိ ပြည်သူ (၄)ဦးကို အမည်မသိ လက်နက်ကိုင်အဖွဲ့မှ အရပ်ဝတ်ဖြင့် လာရောက်ဖမ်းဆီးပြီး နှစ်ပတ်ကျော်ကြာပြီးနောက် ရုပ်အလောင်းသာ ပြန်ရတော့ကြောင်း သိရသည်။
ရွာငံမြို့နယ်တွင် လွန်ခဲ့သည့် ၂၀၂၄ ခုနှစ်မှစ၍ ယခု ၂၀၂၆ ခုနှစ် ဖေဖော်ဝါရီလအတွင်း ဒလန်ဟု စွပ်စွဲကာ အသတ်ခံရသည့် အရပ်သားနှင့် အုပ်ချုပ်ရေးမှူး ၂၁ ဦးအထိ ရှိလာကြောင်း သျှမ်းသံတော်ဆင့် ကောက်ယူထားသည့် စာရင်းအရ သိရသည်။
Leave a Comments