သျှမ်းပြည်တောင်ပိုင်း မိုင်းရှူးမြို့ပေါ်ထိ သျှမ်းပြည်တိုးတက်ရေးပါတီ၊ သျှမ်းပြည်တပ်မတော် SSPP/SSA မှ တပ်သားသစ် စုဆောင်းမှုများ ပြုလုပ်နေကြောင်း စုံစမ်းသိရသည်။
သျှမ်းပြည်တောင်ပိုင်း မိုင်းရှူးမြို့ရှိ အမှတ် (၄)ရပ်ကွက်နှင့် မြို့အနီး ကျေးရွာများဖြစ်သည့် နားစံကျေးရွာ၊ ပန်ဆွဲကျေးရွာ၊ ပိန်းဆာကျေးရွာနှင့် ဖိုင်ဆားကျေးရွာတို့တွင် ယမန်နေ့ (အောက်တိုဘာ ၂၇ ရက်) ည ၈ နာရီ ဝန်းကျင်တွင် မိသားစုတစ်စုတွင် အမျိုးသား(၂)ဦးရှိပါက SSPP/SSA တွင် စစ်မှုထမ်းရန် လာရောက်ခေါ်ဆောင်သွားကြောင်း ဒေသခံပြည်သူများက သျှမ်းသံတော်ဆင့်ကို ပြောသည်။
“ဒီတစ်ကြိမ်နဲ့ဆို ၄ ကြိမ်မြောက်ပဲ၊ သူတို့က ရွာထဲကနေ မြို့ပေါ်ကို ပြောင်းပြီးလာနေတဲ့သူတွေကိုလိုက်ယူတာ၊ စာရင်းနဲ့လိုက်ယူတာ၊ ယောင်္ကျားလေး နှစ်ယောက်ရှိတဲ့ မိသားစုပေါ့၊ သားတွေ မသွားရင် အဖေက သွားရတာမျိုးတွေလည်း ရှိတယ်” ဟု မိုင်းရှူးဒေသခံတစ်ဦးက ပြောသည်။
တိုင်းရင်းသားလက်နက်ကိုင် တပ်ဖွဲ့ဖြစ်သည့် SSPP/SSA သည် ယခင်က ကျေးရွာများတွင်သာ တပ်သားသစ်စုဆောင်းမှုပြုလုပ်ခဲ့ကြောင်း၊ စစ်မှုမထမ်းလိုသည့် သူများသည် မြို့ပေါ်သို့ ထွက်ပြေးတိမ်းရှောင် ခဲ့ကြသည်။
သို့သော် ဧပြီလ နောက်ပိုင်းမှ စတင်ကာ မြို့ပေါ် ရပ်ကွက်ထိ ဝင်ရောက်ပြီး တပ်သားသစ်ကောက်ယူမှု ပြုလုပ်လာကြောင်း သိရသည်။
“အခု သူတို့(SSPP/SSA) လာခေါ်သွားတာ အယောက် ၁၀၀ နီးနီးရှိနေပြီ၊ ရွာကနေ မြို့ပေါ်ကို ပြောင်းလာတဲ့ သူတွေကိုပဲ ခေါ်သွားတယ် ဆိုပေမဲ့ မြို့ပေါ်ထိလာကောက်နေမှတော့ ကျနော်တို့လို မြို့ခံအနေနဲ့လည်း လန့်နေရတယ်” ဟု မိုင်းရှူးမြို့ပေါ်တွင်နေထိုင်သည့် ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
ယင်းကဲ့သို့ မြို့ပေါ်ရပ်ကွက်များအထိ တပ်သားသစ်ကောက်ယူနေမှုနှင့် ပတ်သက်ပြီး (SSPP/SSA)၏ ပြောရေး ဆိုခွင့်ရှိသူထံ ဆက်သွယ်မေးမြန်းရာ မိုင်းရှူးမြို့ အပြင် ၎င်းတို့ ထိန်းချုပ်နယ်မြေအတွင်းရှိ တခြားသော မြို့ရွာ များကိုလည်း ကောက်ယူမည်ဖြစ်ကြောင်း သျှမ်းသံတော်ဆင့်ကို ပြောသည်၊၊
“တော်လှန်ရေးလုပ်ဖို့၊ ကျနော်တို့သျှမ်းတပ်မတော်ကြီး တည်တံ့ခိုင်မြဲဖို့က ရွာက တောင်သူလယ်သမားတွေနဲ့ပဲ တပ်မတော်ကို ဖွဲ့စည်းဖို့ မဖြစ်နိုင်ဘူးလေ၊ မြို့ပေါရှိတဲ့ လူငယ်တွေ၊ ပညာတတ်တွေ ပါလာဖို့လည်း လိုအပ်တယ်၊ အဲ့ကြောင့် မိုင်းရှူးမြို့မှ မကဘူး၊ တခြား မြို့ရွာတွေကိုလည်း ကျနော်တို့ ပေါ်လစီအတိုင်း ကောက်သွားဖို့ရှိတယ်” ဟု SSPP/SSA ၏ ပြောရေးဆိုခွင့်ရှိသူ ဗိုလ်မှူး စိုင်းဖုန်းဟန်က ပြောသည်။
မိုင်းရှူးမြို့နယ် အပြင် ပြီးခဲ့သည့် လပိုင်းအတွင်းမှာလည်း တန့်ယန်းမြို့နယ်၊ မိုင်းရယ်မြို့နယ် ကဲ့သို့သော မြို့နယ် များအတွင်း SSPP/SSA မှ တပ်သားသစ် ကောက်ယူစုဆောင်းမှုကြောင့် ကျေးရွာနေ ဒေသခံတချို့က စိုးရိမ် ထိတ်လန့်ခဲ့ရကြောင်းလည်း သိရသည်။
Leave a Comments