သျှမ်းပြည်မြောက်ပိုင်း မူဆယ်မြို့နယ် မိုင်းယု (၁၀၅)မိုင် မန့်မော်ကျေးရွာသွားလမ်းပေါ်တွင် တည်ရှိသည့် ဂိမ်းဆိုင်တခု၌ ပစ်ခတ်မှုဖြစ်ပွားခဲ့ပြီး ပြည်သူ့စစ်တဦးနှင့် ဒေသခံ တဦး သေဆုံးသွားကြောင်း စုံစမ်းသိရှိရသည်။
ယမန်နေ့ အောက်တိုဘာ (၂၆)ရက် မနက် ၁၁ နာရီဝန်းကျင်က အမည်မသိလက်နက်ကိုင်တပ်ဖွဲ့က လာရောက်ပစ်ခတ်ခဲ့သောကြောင့် (၂)ဦး သေဆုံးသွားပြီး (၁)ဦး ဒဏ်ရာရရှိခဲ့ကြောင်း သိရသည်။
“၂ ယောက်သေတယ်။ တစ်ယောက် ဒဏ်ရာရတာပေါ့။ သေတဲ့သူက တယောက်က ပြည်သူ့စစ်တပ်ဖွဲ့ထဲကပါ။ ကျန်တာကတော့ ဒေသခံ ပြည်သူပဲ။ ဘယ်သူလာပစ်တာလည်းတော့ ကျနော်တို့လည်း အတိကျ မသိရဘူး” ဟု မိုင်းယု(၁၀၅) မိုင်တွင် နေထိုင်သူက ပြောသည်။
ထိုသေဆုံးသွားသူ ရုပ်အလောင်းများကို မူဆယ်မြို့ ပါရမီ လူမှုကူညီရေးအသင်းက သွားရောက်သယ်ယူပြီး သင်္ဂြိုလ်ပေးခဲ့ကြောင်း သိရသည်။
ထိုဂိမ်းဆိုင်ကို မကြာသေးခင်ကမှ ဖွင့်လှစ်ထားတာဖြစ်ပြီး ဒေသခံများနှင့် ပြည်သူ့စစ် အများအပြားက သွားရောက်ကစားလေ့ရှိကြောင်း သိရသည်။
“ဂိမ်းဆိုင်က ဖွင့်ထားတာ မကြာသေးဘူးလေ။ အများကြီးသွားဆော့ကြတယ်။ ဒေသခံကော။ ပြည်သူ့စစ်တွေကော အများကြီး လာဆော့ကြတယ်။ မနေ့ကဆို ပြည်သူ့စစ် ၁၀၀ လောက်ရှိမယ်ထင်တယ်။ အဲဂိမ်းဆိုင်မှာ လာဆော့ကြတာ” ဟု ဒေသခံတဦးက ပြောသည်။
မူဆယ်မြို့တွင် ယမန်နေ့က (၁၀၅)မိုင်အထွက် မော်တောင်းကျေးရွာအနီးတဝိုက်တွင်လည်း စစ်ကောင်စီတပ်နှင့် အမည်မသိလက်နက်ကိုင်တပ်ဖွဲ့တို့ တိုက်ပွဲဖြစ်ပွားခဲ့ကြောင်း သိရသည်။
Leave a Comments