သျှမ်းပြည်မြောက်ပိုင်း သီပေါမြို့နယ် မန်လွယ်ကျေးရွာတွင် တအာင်းအမျိုးသားလွတ်မြောက်ရေးတပ်မတော် TNLA နှင့် အဆက်အသွယ် လုပ်သူများကို ရွာတွင်းမှထွက်ခွာသွားရန်အတွက် လက်နက်ကိုင် တပ်ဖွဲ့တစ်ခု က ပြောဆိုကြောင်း စုံစမ်းသိရသည်။
လွန်ခဲ့သည့် အောက်တိုဘာ (၈) နှင့် (၉) ရက်တွင် TNLA ကိုသတင်းပေးသူဟုထင်ရသည့် မန်လွယ်ကျေးရွာဒေသခံ မိသားစု (၂) စုသည် ရွာအတွင်းမှာ ပြောင်းရွှေသွားခဲ့ရကြောင်း မန်လွယ်ကျေးရွာဒေသခံများပြောပြချက်အရသိရသည်။
“ သူတို့က TNLA ကိုသတင်းပေးဆိုပြီးတော့ ထွက်သွားခိုင်းတာ။ ထွက်သွားရတဲ့သူတွေက မိသားစု (၂) စုလောက်ရှိပြီး။ ဘယ်နားသွားနေလဲတော့ ကျနော်တို့လည်း အတိကျမသိဘူး” ဟု မန်လွယ်ကျေးရွာခံ ဒေသခံ သျှမ်း အမျိုးသားတစ်ဦးက သျှမ်းသံတော်ဆင့် ကို ပြောသည်။
ရွာအတွင်းမှ ထွက်ခွာသွားရသည့်သူများသည် လက်ရှိတွင် ကျောက်မဲမြို့တို့သွားရောက်နေထိုင်နေလျက် ရှိကြောင်း သီပေါမြို့ ဒေသခံ အသက် (၄၀)ကျော် အမည်မဖော်လိုသည့် သျှမ်းအမျိုးသမီးတစ်ဦးက သျှမ်းသံတော်ဆင့်ကို ပြောသည်။
“ သူတို့ကျောက်မဲမှာ သွားနေပြီးလို့ကြားတယ်။ ဒါပေမယ့် ဘယ်နားမှာသွားနေလဲတော့ မသိရဘူး။ ဘယ်လိုခြေအနေ ရှိနေလဲတော့ ကျမတို့ အသေးစိတ်မသိရဘူး။ ရွာကနေတော့ ပစ္စည်းတွေ သယ်လာကြတယ်တဲ့” သီပေါမြို့ ဒေသခံ အမျိုးသမီးတဦးက ပြောသည်။
သီပေါမြို့နယ် မန်လွယ်ကျေးရွာ တိုင်းရင်းသားလက်နက်ကိုင် တပ်ဖွဲ့ အချင်းချင်း မကြာခဏ ထိတွေ့သည့် နေရာ ဒေသတခုဖြစ်သည်။
“ ရွာထဲမှာ တိုက်ပွဲလာမဖြစ်စေချင်လို့ထင်တယ်။ အဲကြောင့် စစ်တပ်က နှင်းထုတ်လိုက်တာထင်တယ်။ အဲ့နေရာမှာ TNLA သတင်းပေးရှိရင် ပြဿနာ တခုခု ဖြစ်မှာ ကြောက်လို့နေမယ်” ဟု မန်လွယ်ကျေးရွာဒေသခံ သျှမ်း အမျိုးသားတဦးက ပြောသည်။
သီပေါမြို့နယ်တွင်းတွင် သျှမ်းပြည်ပြန်ည်ထူထောင်ရေးကောင်စီ RCSS ၊ သျှမ်းပြည်တိုးတက်ရေးပါတီ SSPP နှင့် တအာင်းအမျိုးသားလွတ်မြောက်ရေးတပ်မတော် TNLA တို့ကသွားလာလှုပ်ရှာနေသည့် ဒေသဖြစ်သည်။
