မုံးကိုး စစ်ကောင်စီ နှင့် MNDAA တိုက်ပွဲဖြစ် အရပ်သား (၆)ဦး လက်နက်ကြီး ထိ

0

သျှမ်းပြည်မြောက်ပိုင်း မူဆယ်ခရိုင် မုံးကိုးမြို့နယ်ခွဲအတွင်း MNDAA နှင့် စစ်ကောင်စီ တို့ တိုက်ပွဲဖြစ်ပွားခဲ့ပြီး အရပ်သား(၆) ဦး လက်နက်ကြီးကျည် ထိမှန်ခဲ့ကြောင်း စုံစမ်းသိရှိရသည်။

အောက်တိုဘာ (၁၂) ရက်က တိုက်ပွဲဖြစ်ပွားခဲ့ပြီး ဖော်ဂျုံးပါ ကျေးရွာအတွင်း လက်နက်ကြီးကျည် ကျပြီး ဒေသခံ (၆) ဦး ထိခိုက်ဒဏ်ရာ ရခဲ့သည်။

“၆ ယောက်ထဲက (၃) ယောက်တော့ မုံးကိုးဆေးရုံမှာပဲ ထားတယ်။ ထပ် (၃) ယောက်တော့ မူဆယ်ဆေးရုံကို ပြောင်းထားတယ်။ အခြေအနေ နည်းနည်းစိုးရိမ်ရလို့။ တစ်ယောက်က သတိမလည်သေးလို့ ဒီနေ့ပဲ မန္တလေးဆေးရုံကို လွဲထားတယ်လို့ ကြားတယ်” ဟု မုံးကိုးဒေသခံ တစ်ဦး ကပြောသည်။

ထို ထိခိုက်ဒဏ်ရာ ရသူများအနက် အသက် (၂) နှစ်အရွယ် ကလေး ၂ ဦး အပါအဝင် (၆) ဦး ထိခိုက်ဒဏ်ရာ ရရှိခဲ့ကြောင်း သိရှိရသည်။

“တိုက်ပွဲဖြစ်တာ ဟုတ်ပါတယ်။ တိုက်ပွဲက ပြင်းထန်နေပြီး စစ်ရှောင်တွေလည်း ထွက်ပြေးကြရတယ်” ဟု မုံးကိုးဒေသခံ တစ်ဦး ကပြောသည်။

တိုက်ပွဲကြောင့် ဒေသခံ (၄၀၀) ကျော် တရုတ် – မြန်မာ နယ်စပ်အနီးရှိ လယ်ကွင်းများသို့ ထွက်ပြေးတိမ်းရှောင်ခဲ့သည်။

သြဂုတ်လကုန်ပိုင်းမှာလည်း MNDAA နှင့် စစ်ကောင်စီတို့အကြား တိုက်ပွဲကြောင့် ဒေသခံ (၆၀၀) ကျော်သည် ထွက်ပြေးခဲ့ရပြီး လက်ရှိချိန်ထိ မုံးကိုးမြို့ပေါ်ရှိ ကချင်အသင်းတော်ကျောင်း၊ ဘုန်းကြီးကျောင်း နှင့် လီဆူဘုရားကျောင်းတို့မှာ ယခုထက်ထိ နေရပ်သို့ မပြန်နိုင်သေးကြောင်း သိရှိရသည်။

Leave a Comments