သျှမ်းပြည်တောင်ပိုင်းရှိ ဖယ်ခုံမြို့မှ အမျိုးသားဒီမိုကရေစီ အဖွဲ့ချုပ် (NLD) ပြန်ကြားရေးတာဝန်ခံ၏ နေအိမ်ကို စစ်ကောင်စီတပ်ဖွဲ့တို့မှ ဝင်ရောက် ဖျက်ဆီးခဲ့ကြောင်း သတင်းသိရသည်။
ယမန်နေ့ ( အောက်တိုဘာ ၁၂) ရက် နေ့ခင်းပိုင်း ၁၂ နာရီဝန်းကျင် တွင် ဖယ်ခုံမြို့ရှိ NLD ၏ မြို့နယ် ပြန်ကြားရေးတာဝန်ခံ ဦးနိုင်လင်းထွန်း၏ နေအိမ်ကို စစ်မှုထမ်းဟောင်းနှင့် စစ်ကောင်စီ တပ်သားများပါဝင်သည့် လူတစ်စုက လာရောက်ဖျက်ဆီးသွားကြောင်း သတင်းသိရသည်။
“ဦးနိုင်လင်းထွန်းတို့က အိမ်မှာမနေတာ ကြာပါပြီ၊ အရင်တစ်ခေါက်တုန်းကလည်း သော့တွေဖျက်ပြီး တစ်ခေါက် လာစစ်သေးတယ်၊ အိမ်မှာ ရှိနေတဲ့ အဖိုးတန်ပစ္စည်းတွေကိုလည်း ယူသွားတာ၊ ခုတစ်ခေါက်ကျတော့ လာတာက အင်အားပိုများတယ်၊ တံခါးပေါက်တွေကလည်း ဖျက်ဆီး သွားသေးတယ်” ဟု ဒေသခံ ပြည်သူတစ်ဦးက သျှမ်းသံတော်ဆင့်ကို ပြောသည်။
ဦးနိုင်လင်းထွန်းတို့ မိသားစုသည် တော်လှန်ရေးစတင်ပြီး စစ်ကောင်စီမှ ပြည်သူများကို လိုက်လံဖမ်းဆီးခြင်းများ ပြုလုပ်နေကတည်းက တိမ်းရှောင်နေကြပြီး ယခုချိန်ထိ အိမ်သို့ ပြန်မလာသေးသော်လည်း အာဏာသိမ်း စစ်ကောင်စီနှင့် အဖွဲ့သားတို့က ၎င်း၏ အိမ်ကို နှစ်ကြိမ်တိုက်လာရောက်ဖျက်ဆီးသွားကြောင်း သိရသည်။
“စစ်ကောင်စီတပ်သားနဲ့ စစ်မှုထမ်းဟောင်း ပျူစောထီး အဖွဲ့ဝင်တွေပါတယ်၊ လာတဲ့ စစ်သားတွေကလည်း သေနတ်ကြီးနဲ့ ချိန်ထားပြီး ကြိမ်းမောင်းနေကြလို့ ဘယ်သူမှ ထွက်မကြည့်ရဲဘူး၊ ထွက်ကြည့်ရင် ပစ်မယ်ဆိုလို့လေ” ဟု အထက်ပါ ပုဂ္ဂိုလ်က ပြောသည်။
စစ်ကောင်စီတို့သည် နိုင်ငံတော်အာဏာ သိမ်းယူပြီး နောက်ပိုင်းတွင် NLD မှ တာဝန်ရှိသူများနှင့် ပါတီဝင်များ အပါအဝင် အပစ်မဲ့ ပြည်သူများစွာကို မတရားစွပ်စွဲချက်များဖြင့် ဖမ်းဆီးထောင်ချမှုများ ပြုလုပ်နေသည့်အပြင် လက်ရှိ နေအိမ်ဖျက်ဆီးခံလိုက်ရသည့် ဦးနိုင်လင်းထွန်းကိုလည်း အမှုများစွာ ဖြင့် စစ်ကောင်စီတို့က တရားစွဲဆိုထား ကြောင်း သိရသည်။
