သျှမ်းပြည်မြောက်ပိုင်း နောင်ချိုမြို့ တွင် ကိုဗစ်-၁၉ ကူးစက်မှု ဆက်လက်မြင့်တက်နေသဖြင့် Lockdown ချထားကာ ဈေးများပါ ပိတ်ထားရသဖြင့် ပြည်သူများ အခက်အခဲ ကြုံနေရကြောင်း စုံစမ်းသိရှိရသည်။
နောင်ချိုမြို့နယ်တွင် ကိုဗစ်- ၁၉ မြင့်တက်လာမှုကြောင့် စစ်ကောင်စီ လက်အောက်ခံ ကျန်းမာရေးဝန်ကြီးဌာနမှ Lockdown ချထားခိုင်းပြီး ယနေ့ထိတိုင်း ပြန်ဖွင့်ပေးခြင်းမရှိကြောင်း၊ ဈေးများကိုလည်း ပိတ်ထားရသဖြင့် အလုပ်အကိုင် မရှိကာ ပြည်သူများ စားဝတ်နေရေးအတွက် စိုးရိမ်လာရကြောင်း နောင်ချိုမြို့ ပရဟိတ အဖွဲ့ဝင်တဦးက သျှမ်းသံတော်ဆင့်ကို ပြောသည်။
“ ခုတလောတော့ ပြည်သူတွေက စားဝတ်နေရေးခက်ခဲနေတယ်။ လော့ဒေါင်းလည်း ချထားခံရတဲ့ မြို့ဖြစ်တယ်။ ပြီးတော့ ဈေးလည်းပိတ်ထားတော့ ပြည်သူတွေ ဈေးမရောင်းရတော့ ဈေးသည်မိသားစုတွေ စားဝတ်နေရေးအတွက် ခက်ခဲလာတယ် “ ဟု နောင်ချိုမြို့ ပရဟိတ အဖွဲ့ဝင်တဦးက ပြောသည်။
ထို့အပြင် လက်ရှိကာလမှာ ကုန်ဈေးနှုန်းများ အဆမတန် မြင့်တက်လာသောကြောင့် ပြည်သူများက ရှေ့ရေးအတွက် စိုးရိမ်နေကြရကြောင်း နောင်ချိုမြို့ ဒေသခံတဦးက ပြောသည်။
“ ဟုတ်တယ်။ အခုက ကုန်ဈေးနှုန်းတွေလည်း ဈေးကြီးလာတယ်။ အလုပ်ကိုင်ကလည်း မရှိဘူး။ ဝင်ငွေလည်း မရှိဘူး။ ရှိတာကိုပဲ ချွေးတာပြီးစားသောက်နေရတယ်။ ရှေ့ဒီလိုဆက်ဖြစ်နေရင်တော့ စားဝတ်နေရေးက ပိုခက်ခဲလာမှာကို စိတ်ပူနေရတယ်” ဟု နောင်ချိုမြို့ ဒေသခံ အမျိုးသမီးတဦးက ပြောသည်။
လက်ရှိ နောင်ချိုမြို့ မြို့ပေါ်တွင် ကိုဗစ် ၁၉ ပိုးတွေ့လူနာ လျော့ကျလာသော်လည်း ကျေးရွာဘက်တွင် ပိုးတွေ့လူနာ မြင့်တက်လာနေလျက်ရှိကြောင်း သိရသည်။
“ အရင်ကထက်တော့ လျော့လာတယ်။ အရင်က တရက်ကို ၅၀ ဆို ခုက ၂၀ လောက်ပဲ တွေ့တော့တယ်။ ပြီးတော့ မြို့ပေါ်တော့ နည်းနည်းကျလာပြီး။ ဒါပေမယ့် ကျေးရွာဘက်က ပိုပြီးတက်လာတာတွေရှိတယ်။ အရင်ကဆို ကျေးရွာတခုလုံးကို လော့ဒေါင်းချလိုက်ရတာရှိတယ်” ဟု အထက်ပါ ပရဟိတ အဖွဲ့ဝင်တဦးက ပြောသည်။
နောင်ချိုမြို့တွင် လက်ရှိ ကိုဗစ်- ၁၉ ပိုးတွေ့လူနာ စုစုပေါင်း ၃၀၀၀ ကျော်ရှိနေပြီးဖြစ်ကြောင်း သိရသည်။
Leave a Comments