သျှမ်းပြည် နောင်ချိုမြို့နယ်ရှိ နေရပ်မပြန်နိုင်သေးသည့် စစ်ဘေးရှောင်များသည် တိုက်ပွဲဆက်လက် ပြင်းထန်နေခြင်းကြောင့် အချိန်မီ စိုက်ပျိုးနိုင်ရန် အခက်အခဲ ကြုံတွေ့နေရကြောင်း စုံစမ်းသိရသည်။
သင်္ကြန်ကာလနောက်ပိုင်း ဧပြီလ ဒုတိယပတ်မှ စ၍ သျှမ်း-မန္တလေး နယ်စပ်ရှိ နောင်ချိုမြို့နယ်တွင် စစ်ကောင်စီတပ်နှင့် မန္တလေး-PDF တပ်ဖွဲ့တို့အကြား နှစ်ဘက်တိုက်ပွဲများမှာ ဆက်လက်ပြင်းထန်နေခြင်းကြောင့် နေရပ်မပြန်နိုင်သေးသည့် စစ်ဘေးရှောင်များမှာ မိုးဦးရာသီတွင် အချိန်မီ စိုက်ပျိုးနိုင်ရန် အခက်အခဲ ကြုံတွေ့နေရကြောင်း ဒေသခံများက ပြောသည်။
“တိုက်ပွဲဆက်ဖြစ်နေတုန်းပဲ၊ လက်နက်ကြီးကတော့ စစ်ကောင်စီက နေ့တိုင်းပစ်နေတာ။ အခုက စိုက်ပျိုးရာသီ ရောက်တော့မယ်ဆိုတော့ မျိုးစေ့တို့၊ ဓာတ်မြေဩဇာတို့ ဒီဟာတွေပေါ့ တိုက်ပွဲဖြစ်ပြီး လမ်းပိတ်ရင် ဈေးတက်မှာလည်း စိုးရိမ်ရတယ်။ အဓိကတော့ အချိန်မီ မစိုက်နိုင်လို့ အထွက်နှုန်းကျရင် ဝင်ငွေလည်း ထိခိုက်တာပေါ့”ဟု နောင်ချိုမြို့မှ စစ်ဘေးရှောင်တစ်ဦးက သျှမ်းသံတော်ဆင့်ကို ပြောသည်။
လက်ရှိတွင် ပြောင်းမျိုးစေ့များမှာ တစ်ထုပ်လျှင် ကျပ်ငွေ ၈ သောင်းမှ ၁ သိန်းကျော်အထိ ရှိပြီး ဓာတ်မြေဩဇာမှာ အညံ့စား တစ်အိတ်ကို ကျပ်တစ်သိန်းမှ စတင်ကြောင်း ဒေသခံများထံမှ သိရသည်။
ထို့အပြင် တိုက်ပွဲထပ်မံ ပြင်းထန်လာနိုင်ပြီး ကားလမ်းပိတ်ပါက ပြောင်းမျိုးစေ့နဲ့ ဓာတ်မြေဩဇာဈေးမှာ ယခုထက်ပို၍ မြင့်တက်လာနိုင်ပြီး ထွန်ယက်စိုက်ပျိုးရန်အတွက် စက်သုံးဆီဈေးများလည်း မြင့်တက်လာမည်ကို စိုးရိမ်နေရကြောင်း နောင်ချိုဒေသခံများက ပြောသည်။
“အခုမိုးကျပြီလေ တောင်ယာထွန်ယက်ဖို့ကလည်း စက်နဲ့ဆိုတော့ ဆီဈေးတက်မှာလည်း စိုးရိမ်တယ်။ စစ်ဘေးရှောင်တွေက စာသင်ကျောင်းတို့၊ ဘုန်းကြီးကျောင်းတို့မှာ ရှောင်နေရတော့ ခြံပြန်စိုက်ဖို့လည်း စိတ်ပူတာပေါ့။ အိမ်ပြန်ဖို့ကလည်း တိုက်ပွဲဖြစ်နေသေးတော့ စိတ်မချရတာတွေ ရှိတယ်။ တချို့နေရာဆိုရင် စားနပ်ရိက္ခာနဲ့ ဆေးဝါးတွေလည်း မလောက်တာရှိတယ်”ဟု နောင်ချိုမြို့နယ်မှ စစ်ဘေးရှောင်အမျိုးသားတစ်ဦးက သျှမ်းသံတော်ဆင့်ကို ပြောသည်။
နောင်ချိုမြို့နယ်တွင် ထွက်ပြေးတိမ်းရှောင်နေရသည့် စစ်ဘေးရှောင်များကို လာရောက်ကူညီ သူများလည်း နည်းပါးလာပြီး အင်းဝိုင်း၊ ခြေမြစ်ပင်၊ ဘန့်ဘွေး၊ ကုန်းကြီး၊ ကုန်းသာနှင့် လွယ်တောင်းကျေးရွာရှိ ဘုန်းကြီးကျောင်းများတွင် မန်နား၊ ဆီဆုံ၊ ပါဟက်၊ ကြူအင်း စသည့် ကျေးရွာများမှ စစ်ဘေးရှောင် ၁ ထောင်ကျော် ရောက်ရှိနေပြီး နောင်ချိုမြို့နယ်နှင့် ပြင်ဦးလွင်မြို့ရှိ စစ်ဘေးရှောင် စုစုပေါင်း ၂၀၀၀ ကျော်မှာ နေရပ်မပြန်နိုင်သေးကြောင်း စစ်ဘေးရှောင်ကူညီနေသူများထံမှ သိရသည်။
အလားတူ နောင်ချိုမြို့နယ်ရှိ ရွှေညောင်ပင်နှင့် ဘန့်ဘွေးကျေးရွာတို့တွင် တပ်စွဲထားသည့် စစ်ကောင်စီတပ်မှ သုံးဆယ်၊ ဆမ္မဆယ်နှင့် ကြူအင်းကျေးရွာဘက်သို့ လက်နက်ကြီးဖြင့် နေ့စဉ်ပစ်ခတ်နေပြီး မေလ ၁၀ ရက် ညပိုင်းကလည်း သုံးဆယ်ကျေးရွာမှ အမျိုးသမီးတစ်ဦး အပါအဝင် (၂)ဦး သေဆုံးခဲ့ပြီး ၄ ဦးမှာ ဒဏ်ရာပြင်းထန်ခဲ့ကြောင်း နောင်ချိုဒေသခံများက ပြောသည်။
Leave a Comments