သျှမ်းပြည်မြောက်ပိုင်း မူဆယ်ခရိုင် ကုန်သွယ်ရေးဇုန်အတွင်းတွင် ယနေ့ (အောက်တိုဘာ ၇ )ရက် မနက်ပိုင်း အချိန်အတွင်းတွင် ဗုံးပေါက်ကွဲမှု နှစ်ကြိမ်ဖြစ်ပွားခဲ့ကြောင့် သတင်းသိရသည်။
ယနေ့ အောက်တိုဘာလ ၇ ရက် မနက်ပိုင်း ၇ နာရီ ဝန်းကျင်တွင် မူဆယ်မြို့အဝင် နယ်စပ်ကုန်သွယ်ရေးမှ ဝန်ထမ်းရိပ်သာအနီးတွင် ဗုံးပေါက်ကွဲမှု တစ်ကြိမ်ဖြစ်ပွားခဲ့ပြီး ၊ မနက် ၁၀ နာရီဝန်းကျင်တွင်လည်း ၁၀၅ မိုင်ကုန်သွယ်ရေးဇုန်မှ လားရှိုးအဝင်စစ်ဆေးရေးဂိတ် ဒေသအခေါ် လားရှိုးမောင်းတံ အနီးတွင်လည်း ဗုံး ပေါက်ကွဲမှုဖြစ်ပွားခဲ့ကြောင်း ဒေသခံများက ပြောသည်။
“ဒီနေ့ အစောပိုင်း ၇ နာရီဝန်းကျင်မှာ ကုန်သွယ်ရေး ဝန်ထမ်းရိပ်သာနားမှာ ဗုံးတစ်ခါကွဲတယ်၊ နောက်တော့ ၁၀၅ မိုင်အနီးက မူဆယ်ကနေ လားရှိုးအဝင် မောင်းတံနားမှားဗုံးနှစ်လုံးထပ်ပေါက်တယ်၊ ဒီနေ့ တစ်နေ့တည်းကို ဗုံးပေါက်ကွဲမှု နှစ်ကြိမ်ဖြစ်သွားတယ်” ဟု အမည်မဖော်လိုသည့် ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
ယင်းကဲ့သို့ ဗုံးများပေါက်ကွဲမှု ဖြစ်ပွားခဲ့သော်လည်း လူထိခိုက်မှုများ မရှိသော်လည်း ပစ္စည်းများ ထိခိုက်မှု ရှိမရှိကိုတော့ မသိရသေးကြောင်းလည်း အထက်ပါ ပုဂ္ဂိုလ်က ပြောသည်။
“ဘယ်သူ့ကြောင့် ဗုံးပေါက်ကွဲတယ်ဆိုတာတော့ မသိရသေးဘူး၊ လူထိခိုက်မှုတော့ မရှိဘူး၊ ကြည့်ရတာ ဆင်ထားပြီးမှ ချိန်ကိုက်ထားတဲ့ ဗုံး ပေါက်ကွဲတာ ဖြစ်နိုင်တယ်” ဟု၎င်းက ဆိုသည်။
မူဆယ်မြို့နယ်အတွင်းတွင် တိုင်းရင်းသားလက်နက်ကိုင် တပ်ဖွဲ့များ ဖြစ်ကြသည့် TNLA ၊ KIA နှင့် MNDAA တို့ အပါအဝင် စစ်ကောင်စီလက်အောက်ခံ ဌာနေပြည်သူ့စစ်တပ်ဖွဲ့တွေ အဓိကစစ်ရေးလှုပ်ရှားနေပြီး ပြီးခဲ့သည့် ရက်ပိုင်းအတွင်းမှာလည်း မူဆယ်မြို့ နှင့် ကျင်စန်းကျော့နယ်စပ် ဂိတ်နယ်မြေစခန်းအနီးတွင် ရဲအရာရှိ တစ်ဦး ပစ်ခတ်ခံရကာ သေဆုံးရသည့် ဖြစ်စဉ်များလည်း ရှိခဲ့သည်။
Leave a Comments