သျှမ်းပြည်မြောက်ပိုင်း နမ့်ခမ်းမြို့နယ် ဝမ်းဟောင်း(မန့်ဟောင်း)ကျေးရွာတွင် ဗုံးပေါက်ကွဲမှုဖြစ်ပွားခဲ့ပြီး ဒေသခံတဦးသေဆုံးခဲ့ကြောင်း ကနဦးသိရှိရသည်။
ယနေ့ (အောက်တိုဘာ ၅ )ရက် ည ၇ နာရီဝန်းကျင်တွင် ဝမ်းဟောင်းကျေးရွာ ဘောလုံးကွင်းတွင် ဗုံး (၂)လုံးပေါက်ကွဲမှု ဖြစ်ပွားခဲ့ပြီး အရပ်သား တဦးသေဆုံးသွားကြောင်း သိရသည်။
” ဘော်လုံးကွင်းနားပေါက်တာလို့ပြောတယ်။ တချို့ကတော့ Mytelတာဝါတိုင်လို့ပြောတယ်။ ထိခိုက်ဒဏ်ရာရတဲ့သူရှိမရှိတော့ မသိဘူး။ တယောက်တော့ သေသွားပြီ” ဟု နမ့်ခမ်းမြို့ ဒေသခံတဦးက သျှမ်းသံတော်ဆင့် ကိုပြောသည်။
ဗုံးပေါက်ကွဲမှုသည် လွန်စွာကျယ်လွန်သောကြောင့် ယခုချိန်ထိ သေဆုံးသွားသည့်သူသည် မည်သူဖြစ်သည်ကို အသေးစိတ်မသိရှိရသေးကြောင်း ဒေသခံကပြောသည်။
” အသံက ၂ ချက်ကြားတာ အရမ်းကျယ်တယ်။ ကျနော်တို့နေတဲ့နေရာထိတောင်ကြားတယ်။ သေတဲ့သူက ဘယ်သူလဲတော့ သေချာမသိရသေးဘူး။ အခုက ဘယ်သူမှ မနီးနားကို မသွားရဲသေးဘူး။ ထိခိုက်ဒဏ်ရာရသူတဦးရှိတယ်လို့လည်း ပြောတယ်” ဟု နမ့်ခမ်းမြို့ ဒေသခံတဦးက ပြောသည်။
ထိုသို့ ဗုံပေါက်ကွဲမှု ဖြစ်စဥ်ကြောင့် ဒေသခံပြည်သူများက စိုးရိမ်နေကြရကြောင်း သိရသည်။
