သျှမ်းပြည်မြောက်ပိုင်း လားရှိုးမြို့ အခြေစိုက် ရွှေဖီမြေသတင်းအေဂျင်စီ ရုပ်သံသတင်းထောက်ဟောင်း လွေးအမ်ဖောင်( ၂၀) နှစ်သည့် လွန်ခဲ့သည့် စက်တင်ဘာ ၂၆ ရက်အကူး မနက် ၁၂ နာရီ ဝန်းကျင်တွင် စစ်ကောင်စီတပ်ဖွဲ့က ဖမ်းဆီး သွားကြောင်း သတင်းရရှိသည်။
လွေးအမ်ဖောင်ကို စစ်ကောင်စီ က စက်တင်ဘာ ၂၆ ရက်တွင် လာရှိုးမြို့ ရပ်ကွက် (၁) နယ်မြေ (၃)ရှိ နေအိမ်ထဲသို့ စစ်အင်အား (၃၀) ခန့်က ခြံစည်းရိုးကို ကျော်တက်ပြီး လာရောက်ဖမ်းဆီးသွားကြောင်းသိရသည်။
“ ရွှေဖီမြေသတင်းဌာနဟောင်းကို ဖမ်းသွားတယ်။ အင်းအားကတော့ (၃၀) လောက်တော့ ရှိတယ်။ ည အချိန်မှာလာဖမ်းသွားတာ။ ဘာကြောင့်လာဖမ်းသွားလဲတော့ ကျနော်တို့လည်း မသိရဘူး” ဟု တအာင်း ဥပဒေ အထောက်ကူပြု အဖွဲ့ဝင်တဦးက သျှမ်းသံတော်ဆင့်ကို ပြောသည်။
ဖမ်းခံရပြီးနောက်ပိုင်း လွေးအမ်ဖောင်သည် စက်တင်ဘာ ၂၆ ရက်နေ့မှ ၃၀ ရက်နေ့အထိ စစ်ကြောရေးစစ်ခန်းတွင် ရှိနေပြီး အောက်တိုဘာ ၁ရက်နေ့မှစပြီး လာရှိုးမြို့ အမှတ် (၂) ရဲစခန်းတွင် တိုင်ချက်ဖွင့်ထားကြောင်းသိရသည်။
လွေးအမ်ဖောင်ကို ရွှေဖီမြေ သတင်းအေဂျင်စီမှ မတ်လ ၁ ရက်နေ့မှ စတင်ပြီး သတင်းလုပ်ငန်း တာဝန်မှ ရပ်စဲခိုင်းခဲ့ ကြောင်းသိရသည်။
ထိုသို့ ရွှေဖီမြေ ရုပ်သံသတင်းထောက်ဟောင်းကို ဖမ်းဆီးမှုမပြုပ်လုပ်ခင်က စစ်ကောင်စီ တပ်ဖွဲ့မှ ရွှေဖီမြေ သတင်းခန်းကို ဖျတ်ဆီးရန်အတွက် ကြိုးပမ်းခဲ့ကြောင်း ရွှေဖီမြေသတင်းအေဂျင်စီအယ်ဒီတာ အဖွဲ့ဝင်တဦး က သျှမ်းသံတော်ဆင့် ကို ပြောသည်။
“ ရွှေဖီမြေသတင်းအေဂျင်စီကို စစ်ကောင်စီက ဖျတ်ဆီးချင်နေတာကြာပါပြီ။ အခ ရုပ်သံအမျိုးသမီး သတင်းထောက်ဟောင်း မဖမ်းခံရခင် မေလကတည်းက ရုံးသော့ ဖျက်ပြီး ဝင်မွှေခံရဖူးပါတယ်” ဟု ရွှေဖီမြေ သတင်းအေဂျင်စီ အယ်ဒီတာ အဖွဲ့ဝင်တဦး က ပြောသည်။
စစ်ကောင်စီ ၏ အကြမ်းဖက်မှုကို ဆက်တိုက်ထုတ်လွှင့်မှုကြောင့် စစ်ကောင်စီမှ ရွှေဖီမြေ သတင်းခန်းကို ဝင်ရောက် မွှေနှောက်ပြီး သတင်းထောက်များကို လိုက်လံဖမ်းဆီးမှုများပြုလုပ်နေခြင်းဖြစ်ကြောင်း ရွှေဖီမြေအေဂျင်စီ အယ်ဒီတာ အဖွဲ့ဝင် တစ်ဦး က ပြောသည်။
“ အဓိကတော့ သတင်းဌာန အနေနဲ့ လူထုတွေအပေါ် စစ်ကောင်စီ ရဲ့ အကြမ်းဖက်မှု မတရားမှု ညှင်းပန်းနှိပ်စက်မှုကို တောက်လျှောက်ရေးတာကြောင့် လိုက်ဖမ်း၊ ဖျက်ဆီးနေတယ်လို့ မြင်ပါတယ်။” ဟု ရွှေဖီမြေအယ်ဒီတာ အဖွဲ့ဝင်တဦးက ပြောသည်။
မေလ (၅) ရက် ည ၁၀ နာရီ ဝန်းကျင်အချိန် လာရှိုးမြို့ အခြေစိုက် ရွှေဖီမြေအေဂျင်စီ သတင်းခန်းကို စစ်ကောင်စီ တပ်ဖွဲ့ဝင်များ က ဝင်ရောက်မွှေနှောက်ခဲ့ကြောင်းသိရသည်။
