သျှမ်းမြောက် ကျောက်မဲမြို့နယ် ဟူးကွက်ကျေးရွာတွင် ယနေ့ (စက်တင်ဘာ ၂၅ ရက်) မနက်အစောပိုင်းမှစပြီး RCSS/SSA နှင့် တပ်ပေါင်းစု ဖြစ်သည့် SSPP/SSA၊ TNLA တို့ တိုက်ပွဲပြင်းထန်ပြီး နေအိမ်မီးလောင်ကြောင်း သတင်းရရှိသည်။
ထို တိုက်ပွဲဖြစ်ပွားသည့် ဟူးကွက်ကျေးရွာတွင် လွန်ခဲ့သည့် ရက်ပိုင်းတွင် RCSS/SSAတပ်စခန်းချထားသည့်နေရာဖြစ်ပြီး၊ ဘေးအနီးပတ်ဝန်းကျင်တွင် တပ်ပေါင်းစု (SSPP/SSA နှင့် TNLA)တို့ တည်ရှိသည့်ဒေသဖြစ်သည်။
“ဒီမနက် တိုက်ပွဲဖြစ်တယ်လို့တော့ ကြားတယ်၊ ရွာကို ဖုန်းဆက်လို့မရတော့ လက်ရှိအခြေနေကို သေချာမသိဘူး၊ နေအိမ်မီးလောင်နေတာရှိတယ်လို့လည်း ကြားတယ်” ဟု ကျောက်မဲမြို့ပေါ်ရောက် ဟူးကွက်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
ထိုတိုက်ပွဲကြောင့် နေအိမ်မီးလောင်မှု ရှိနေသည်ဟု ဒေသခံများထံမှ သိရသော်လည်း လက်ရှိတိုက်ပွဲပြင်းထန်းမှု နှင့် နေအိမ်မီးလောင်သည့် ကိစ္စနှင့်ပတ်သက်ပြီး တိုင်းရင်းသား လက်နက်ကိုင် တပ်ဖွဲ့ အသီးသီးကို ဆက်သွယ်မေးမြန်းရာ ပြန်လည်ဖြေကြားပေးခြင်းမရှိခဲ့ပေ။
ထိုဟူးကွက်ကျေးရွာတွင် RCSS/SSA တပ်စွဲထားသည့်နေရာဖြစ်ကာ ပီးခဲ့သည့် သြဂုတ်လကုန်ပိုင်း တိုက်ပွဲပြင်းထန်ခဲ့သည့်အချိန်မှစပြီး ဒေသခံများအား မိုဘိုင်းဖုန်းဆက်သွယ်မှု ပိတ်ပင်ထားကြောင်း၊ ထို့အပြင် ကျေးရွာအဝင်အထွက်ကိုလည်း ပိတ်ထားသည့်အတွက် ဒေသခံများ အစားအသောက်ခက်ခဲမှုများလည်း ရှိနေကြောင်း စစ်ရှောင်လာသည့် ဒေသခံတချို့များထံသိရသည်။
“ရွာမှာ ကျန်တဲ့သူတွေကတော့ ဖုန်းလည်းဆက်မရ။ ရွာကနေဆက်လာမှ ရတာ။ ကျနော်တို့ အဝင်ဖုန်းကမရဘူး။ နောက်ပြီး ရွာအဝင်အထွက်ကလည်းပိတ်ထားတာဆိုတော့ အခြေအနေ သိရဖို့ခက်တယ်” ဟု ကျောက်မဲရောက် ဟူးကွက်ဒေသခံ တစ်ဦးက သျှမ်းသံတော်ဆင့်ကို ဟူးကွက်ကျေးရွာအကြောင်းပြောပြသည်။
ထိုကျေးရွာတွင် ပြီးခဲ့သည့် (၁၀)ရက် ဝန်းကျင်က ဒေသခံ (၃)ဦး ထိခိုက်ဒဏ်ရာရမှု ရှိခဲ့ကြောင်း သိရသည်။
