သျှမ်းမြောက် ကျောက်မဲမြို့နယ်တွင် တိုင်းရင်းသားလက်နက်ကိုင်အချင်းချင်းဖြစ်ပွားသည့် တိုက်ပွဲကြောင့် နေရပ်မပြန်နိုင် သေးသည့် စစ်ရှောင် (၄၀၀၀)ကျော် ရှိနေကြောင်း သတင်းရရှိသည်။

ကျောက်မဲမြို့နယ်တွင် ပြီးခဲ့သည့် ဖေဖော်ဝါရီလကတည်းက တိုင်းရင်းသားလက်နက်ကိုင်များဖြစ်သည့် သျှမ်းပြည်ပြည်လည်ထူထောင်ရေးကောင်စီ၊ သျှမ်းပြည်တပ်မတော် (RCSS/SSA)နှင့် မြောက်ပိုင်း မဟာမိတ် တပ်ပေါင်းစုဖြစ်သည့် SSPP/SSA ၊ TNLA တို့ တိုက်ပွဲပြင်းထန်ခဲ့မှုကြောင့် ဒေသခံ ထောင်ချီ ထွက်ပြေး တိမ်းရှောင်ခဲ့ ရကြောင်း သိရသည်။

ထိုစစ်ရှောင်များသည် လက်ရှိတွင် နေရပ်ကို ပြန်ချင်သော်လည်း တိုက်ပွဲပြန်ဖြစ်မှာကို စိုးရိမ်သည့်အတွက် မပြန်ရဲသေးကြောင်း မိုင်းငေါ့မှ စစ်ရှောင်အမျိုးသမီး တစ်ဦးက သျှမ်းသံတော်ဆင့်ကို ပြောသည်။

“အိမ်ကို အရမ်းကို ပြန်ချင်နေပြီ၊ ဒါပေမယ့် ဘယ်ချိန်မှ ပြန်ရမယ်ဆိုတာကိုတောင် မစဉ်းစားရဲတဲ့ အနေအထားဖြစ်နေတာ၊ တကယ်လို့ အိမ်ကို ပြန်ရောက်သွားတယ်ဆိုရင်တောင် ဘယ်လို ရှာဖွေစားသောက်ရမှာလဲ မသိတော့ဘူး” ဟု မိုင်းငေါ့ မန်ပင့်စစ်ရှောင်စခန်းမှ အမျိုးသမီးတစ်ဦး က ဆိုသည်။

မိုင်းငေါ့စစ်ရှောင်စခန်းများတွင် စစ်ရှောင် (၃၀၀)ဝန်းကျင် ရှိနေပြီး ကျောက်မဲမြို့ မန်ခါစစ်ရှောင်စခန်း၊ မိုင်းတင်းကျေးရွာအုပ်စုအတွင်းရှိ စစ်ရှောင်စခန်းများ၊ ကြူရှော(မြောက်ရွာ)ဘုန်းကြီးကျောင်း၊ ပြိန်းခါးကျေးရွာ အမက ကျောင်းနှင့် ဟူးစွန်ကျေးရွာအုပ်စုတို့တွင် စစ်ဘေးရှောင် (၂၀၀၀)ကျော်ထိ ရှိနေကြောင်း စစ်ရှောင်ကူညီသူများထံမှ သိရှိရသည်။

ထို့အပြင် ကျောက်မဲမြို့ပေါ်ရှိ ရပ်ကွက်နှင့် ကျေးရွာ ဆွေမျိုးအိမ်များတွင် လာရောက်နေထိုင်သူနှင့် အိမ်ငှား နေထိုင်ကြ သူများ စုစုပေါင်း (၁၇၀၀)ဦးကျော်ထိရှိနေကြောင်း သိရသည်။

ထို စစ်ရှောင်များသည် နေရပ်ကို ပြန်ချင်သော်လည်း လက်ရှိအချိန်ထိ တိုင်းရင်းသားလက်နက်ကိုင် တပ်များအကြား စစ်ရေးတင်းမာနေဆဲဖြစ်သည့်အတွက် နေရပ်ကိုမပြန်နိုင်သေးပဲ စစ်ရှောင်စခန်းနှင့် လက်ရှိခိုလှုံနေသည့်နေရာများတွင်သာ ဆက်လက်နေထိုင်နေရတာဖြစ်ကြောင်း စစ်ရှောင်ဒေသခံများ ထံမှ သိရှိရသည်။