သျှမ်းပြည်အရှေ့ပိုင်း မိုင်းတုံမြို့နယ် နားကောင်းမူးတွင် ပျံကျဈေးသည်များကို ယခင်ထက်ပိုပြီး အခွန်ကောက်ယူ သွားမည်ဖြစ်ကြောင်း စုံစမ်းသိရှိရသည်။

နားကောင်းမူးဈေးတွင် စက်တင်ဘာ (၁) ရက်မှ စပြီး ပျံကျဈေးသည်များကို ယခင်ထက် (၂) ဆ ဆိုင်ခန်းခ အခွန်များကို ပိုကောက်ယူလာကြောင်း၊ ယခင်ကပျံကျဈေးသည်များအတွက် (၁၀) ဘတ် (မြန်မာငွေ ၅၀၀ကျပ်) သာပေးရပြီး အာဏာသိမ်းပြီးနောက် ဘတ်(၃၀) မြန်မာငွေ (၁၅၀၀ကျပ်) ထိတိုးမြင့်ပေးလာရကြောင်း ဈေးသည်များထံ သိရသည်။

“ အရင်က ကျမတို့ (၁၀) ဘတ် ပဲပေးရတယ်။ အခုက ဘတ်( ၃၀) ပေးရမယ်တဲ့။ တစ်ချို့ရက်တွေက ဈေးသွားရောင်း တာတောင်း ဘာမှပြန်မရလာဘူး။ သူတို့ ဒီလို ဈေးမြင့်တက်ကောက်လာတော့ ကျမတို့ အတွက် ခက်ခဲလာတယ်” ဟု နားကောင်းမူးဈေးတွင် ဈေးသွားရောင်းသည့် အမျိုးသမီးတဦးက ပြောသည်။

ထိုသို့ ဈေးမြင့်တက်ကောက်လာသောကြောင့် ပြည်သူများ တချို့က စားဝတ်နေရေးအတွက်ပါ ခက်ခဲလာကြောင်း၊ ရောင်းရသည့် ငွေကို အခွန်ပြန်ဆောင်ရသောကြောင့် တစ်ချို့ပြည်သူများ တနေရာကို နှစ်ယောက်ပေါင်းပြီး ဈေးထိုင်ရောင်းနေကြရကြောင်း သိရသည်။

“ ကျမတို့က အသီးအရွက်ပဲ ရောင်းတာလေ။ ဘာမှမမြတ်ဘူး။ တစ်ချို့ရက်တွေဆို မရောင်းရတာတွေလည်းရှိတယ်။ အခုက ရှာစားရတာလည်း ခက်တယ်။ စားဖို့သောက်ဖို့တောင်း မနည်းရှာစားရတာ။ တစ်ချို့ဆို တနေရာထဲမှာ ပေါင်းပြီးတော့ပဲ ရောင်းကြတာ” ဟု အထက်ပါ ဈေးသည် အမျိုးသမီးက ပြောသည်။

မြန်မာနိုင်ငံတွင် ကိုဗစ်- ၁၉ ဒဏ် နှင့် နိုင်ငံရေး‌ ရှုပ်ထွေးမှုဒဏ်ကြောင့် ပြည်သူများ တချို့ စားဝတ်နေရေး ခက်ခဲလာသောကြောင့် ဈေးဆိုင်ခန်းများကိုပါရောင်းချရပြီး စီးပွားရေး အခက်ကြုံနေရကြောင်းသိရသည်။