Friday, June 14, 2024

တပ်ပေါင်းစုကို ထမင်းသွားပို့သူတစ်ဦး သေနတ်ထပ်မံပစ်ခံရ

Must read

သျှမ်းပြည်မြောက်ပိုင်း ကျောက်မဲမြို့နယ် ပန်လင်ကျေးရွာ ဒေသခံ အမျိုးသားတဦး တပ်ပေါင်းစုကို ထမင်းသွားပို့စဉ် လမ်းတွင် သေနတ်ပစ်ခံရကြောင်း စုံစမ်းသိရှိရသည်။

ဖြစ်စဉ်မှာ စက်တင်ဘာ ၂၁ ညနေ ၃ နာရီခွဲက တပ်ပေါင်းစု (TNLA , SSPP) တို့ စခန်းချထားသည့်နေရာကို ထမင်းသွားပို့ပေးသည့် စိုင်းသန်းနိုင်သည် လွယ်ကုန်ရွာအဝင်တွင် သေနတ် ပစ်ခံရပြီး လက်တွင် ဒဏ်ရာရရှိခဲ့ကြောင်း ပန်လင်ကျေးရွာ ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။

“ လွယ်ကုန်ရွာအဝင်မှာ သေနတ်ပစ်ခံရတာ။ ဘယ်အဖွဲ့စည်းက ပစ်လည်းတော့ ကျနော်တို့မသိဘူး။ လက်ကို ပစ်မိတာ။ ထမင်းကိုသွားပို့ပေးရင် လမ်းမှာ ခြောင်းပစ်ခံရတာ။ ဒါနဲ့ဆို (၂) ခါရှိပြီ” ဟု ပန်လင်ကျေးရွာ ဒေသခံ တဦးက ပြောသည်။

ပန်လင်ကျေးရွာဒေသခံ ပြည်သူများက တပ်ပေါင်းစုများကို နေ့စားအဖြစ် ထမင်းဟင်းချက်ပြီး ပို့ဆောင်ပေးနေရပြီး၊ ထိုသို့ ထမင်းဟင်းချက်ပြီး ပို့ဆောင်ရန်သွားစဉ် လမ်းတွင် ပစ်ခတ်မှုများခံနေရသောကြောင့် ဒေသခံများက စိုးရိမ်မှုများ ရှိနေကြာင်း သိရသည်။

“ စိုးရိမ်တာပေါ့။ ကျနော်တို့က ပြည်သူလေ။ သူတို့က လက်နက်ရှိတယ်။ ကျနော်တို့က လက်နက်အောက်မှာပဲ နေရတယ်။ ဘယ်အဖွဲ့စည်းကိုမှလည်း မလွန်ဆန်ရဲဘူး။ ဒီလိုဖြစ်လာတာ ကျနော်တို့ အသက်အတွက် အရမ်းကို စိုးရိမ်ရတယ်” ဟု ပန်လင်ကျေးရွာ ဒေသခံ အမျိုးသားတဦးက ပေသည်။

လွန်ခဲ့သည့် စက်တင်ဘာ ၁၈ ရက်တွင်လည်း ကျောက်မဲမြို့နယ် တပ်ပေါင်းစုစခန်းချထားသည့် နောင်ဆင်ကျေးရွာအနီး တွင် ထမင်းသွားပို့ပေးသည့် အမျိုးသားတဦးလည်း ရင်ဘတ်တွင် သေနတ်ပစ်ခံ ရကြောင်းသိရသည်။

ကျောက်မဲဒေသတွင် တိုင်းရင်းသားလက်နက်ကိုင်များ ဖြစ်သည့် RCSS နှင့် တပ်ပေါင်းစု (TNLA, SSPP) သွားလာ လှုပ်ရှားနေသည့် ဒေသဖြစ်ပြီး မကြာခဏ တိုက်ပွဲဖြစ်ပွားသည့်နေရာဖြစ်ကြောင်းသိရသည်။

လက်ရှိမှာ တိုင်းရင်းသားလက်နက်ကိုင် အချင်းချင်းဖြစ်ပွားသည့် တိုက်ပွဲကြောင့် ပြည်သူ ၂၅၀၀ ဝန်းကျင် စစ်ဘေးရှောင်နေကြရကြောင်းသိရသည်။

Leave a Comments

- Advertisement -spot_img

Latest article