နိုင်ငံရေး အခြေအနေ ရှုပ်ထွေးနေမှုကို အခွင့်ကောင်းယူကာ တရုတ်နိုင်ငံသည် သျှမ်းပြည်မြောက်ပိုင်း မူဆယ်-နမ့်ခမ်းမြို့ဘက်ခြမ်းသို့ နယ်မြေကျူးကျော်နေရာယူနေကြောင်းသတင်းရရှိသည်။
စစ်အာဏာသိမ်းပြီးနောက်ပိုင်း ဇူလိုင်လကုန်မှစတင်ကာ မြန်မာ-တရုတ်နယ်စပ် သျှမ်းပြည်မြောက်ပိုင်း မူဆယ် နှင့် နမ့်ခမ်းမြို့ နယ်အတွင်းသို့ တရုတ်နိုင်ငံမှ နယ်မြေကျူးကျော် ခြံစည်းရိုးခတ်ခဲ့မှု ပြုလုပ်ခဲ့ကြောင်း ဒေသခံများပြောပြချက် အရသိရသည်။
ထိုနယ်မြေ ကျူးကျော်မှုကိစ္စကို သက်ဆိုင်ရာ ဘက်မှ တစုံတရာ လာရောက်ဖြေရှင်းပေးခြင်းမရှိသည့်အတွက် ပြီးခဲ့သည့် စက်တင်ဘာ (၂၁)ရက်နေ့က မူဆယ်မြို့နယ် ကျားခေါင်း (SNLD) ပါတီအဖွဲ့ဝင်တစ်ချို့နှင့် ဒေသခံတို့ ကွင်းဆင်းမှတ်သားမှု ပြုလုပ်ခဲ့ကြောင်း SNLD ပါတီ အဖွဲ့ဝင် အမျိုးသားတစ်ဦးက သျှမ်းသံတော်ဆင့်ကို ပြောသည်။
“ခု အစိုးရက ကွင်းဆင်းစစ်ဆေးပေးတာ မရှိလို့ ဒီလို ပြဿနာဖြစ်လာတယ်၊ တရုတ်ကလည်း တစ်ဖက်ကို အလေးမထားဘူး၊ လုပ်ချင်တာလုပ်နေတဲ့ သဘောပါပဲ၊ အဲ့ဒါကို သက်သေရှိထားဖို့ ဒေသခံတွေ အကူအညီတောင်းလာတာနဲ့ ကွင်းဆင်းသွားကြည့်တာပါ” ဟု မူဆယ်မြို့နယ် ကျားခေါင်းပါတီ အဖွဲ့ဝင် အမျိုးသားတစ်ဦးက ဆိုသည်။
ထိုဒေသတွင် နယ်စပ်အမှတ်အသား ပြုလုပ်ထားသော်လည်း တရုတ်က ထပ်မံကျူးကျော်လာပြီး ငါးကန်ပြုလုပ်ခြင်း၊ အလံလာစိုက်ပြီး အမှတ်အသားသစ် ထပ်မံပြုလုပ်ထားတာတွေလည်း ရှိနေကြောင်း ဒေသခံများထံမှ သိရသည်။
“နယ်စပ် ခြံစည်းရိုးကို ပထမအဆင့် ခတ်ထားပြီးပြီ၊ အဲ့ဒီ ခြံစည်းရိုး အပြင်မှာ ငါးကန်ထပ်လုပ်ပြီး သူတို့ အလံကို လာစိုက်ထားသေးတယ်၊ ကန့်ကွက်တဲ့သူ မရှိရင် နောက်ထပ်ခြံစည်းရိုး လာခတ်တယ်။ တစ်လံရရင် တစ်လံ ယူတာ” ဟု မူဆယ်ဒေသခံ အမျိုးသားတစ်ဦးက ဆိုသည်။
နမ့်ခမ်းမြို့နယ် ဟတ်ဟင်ကျေးရွာနှင့် မူဆယ်မြို့နယ် မန့်ဟီးရိုးဒေသတွင် နယ်ခြားကျောက်တိုင် (၃)တိုင် ရှိပြီး ထိုနယ်စပ်တစ်လျှောက် တရုတ်ဘက်မှတဲထိုးကာ CCTV တပ်ဆင်ထားပြီး စောင့်ကြည့်မှုများ ရှိနေကြောင်း သိရသည်။
တရုတ်ဘက်မှ လာရောက်စိုက်ထူသည့် ခြံစည်းရိုးတိုင်များကို မန့်ဟီးရိုးမြို့ဒေသခံများက ဇူလိုင် ၂၆ရက် တွင် သွားရောက်ဖြုတ်ပစ်ခဲ့ကြောင်း သိရသည်။
အလားတူ ပြီးခဲ့သည့် ဇွန်လ (၂၃)ရက်နေ့က ကချင်ပြည် မံစီမြို့နယ် မန့်ဝိန်းကြီးဒေသအတွင်းရှိ မြန်မာ − တရုတ်နယ်စပ်မျက်း နယ်ခြားမှတ်တိုင် (၅၃/၁ − ၅၃/၂)မြန်မာပိုင်နက်နယ်မြေကို တရုတ်ဘက်မှ ကျူးကျော်ပြီး ခြံစည်းရိုးလာခတ်သဖြင့် ဒေသခံများနှင့် အငြင်းပွားမှု ဖြစ်ခဲ့သေးကြောင်း သိရှိရသည်။
