သျှမ်းပြည်တောင်ပိုင်း မိုင်းကိုင်မြို့နယ်အတွင်း ရက်ပိုင်းရောက်ရှိလာသည့် စစ်ရှောင်များ (၂၀၀၀) ကျော် စားနပ်ရိက္ခာ မကြာခင် ပြတ်လတ်မှု ရှိနိုင်ကြောင်း စုံစမ်းသိရှိရသည်။
လက်ရှိ မိုင်းကိုင်မြို့နယ် ပန်ကေတုကျေးရွာအုပ်စုမှာ စစ်ရှောင် (၁၄၃၆) ဦး၊ တုံလောကျေးရွာအုပ်စုမှာ (၆၀၀) ခန့်၊ ဟမ်းငိုင်းကျေးရွာအုပ်စုမှာ (၁၀၃) ဦး နှင့် မိုင်းကိုင်မြို့တွင်းရှိ ဆွေမျိုးများ နေအိမ်မှာလည်း အနည်းငယ် သွားရောက်ခိုလှုံနေသည့် သူများလည်း ရှိကြောင်း စုံစမ်းသိရှိရသည်။
“စားသောက်ပိုင်းတွေ လိုအပ်တယ်။ဘာလို့လဲဆိုတော့ မနေ့က ဆန်တွေကို ခွဲဝေပေးတာ အိတ်ပေါင်း (၁၃၀) ကျော် လောက် တစ်အိမ်ကို (၃) ပြည်လောက်ပဲရတယ်။ အဲ့ကြောင့် အစားအသောက် ဆန် ဆီဆားတွေ လိုအပ်တယ်” ဟု စစ်ရှောင်များ ကို ကူညီပေးနေသည့်သူ တစ်ဦး ကပြောသည်။
ဆန်ကို အဓိက လိုအပ်သော်လည်း မိုးရွာသီဖြစ်သဖြင့် ချက်ပြုတ်စားသောက်ရန် အခက်ခဲဖြစ်သောကြောင့် ရိက္ခာခြောက်များလည်း လိုအပ်ကြောင်း သတင်းရရှိသည်။
“ကျမတို့ ဆန် နဲ့ ဆား ရှိရင် စားလို့ရပြီ။ အဓိက ဆန် တွေ လိုအပ်တာပေါ့” ဟု ပန်ကေတုမှာ ရောက်ရှိနေသည့် စစ်ရှောင် အမျိုးသမီး တစ်ဦး ကပြောသည်။
ကိုဗစ် -၁၉ ကာလလည်း ဖြစ်သည့်အတွက် ယခုလို စစ်ရှောင်များ စုပေါင်းပြီး နေထိုင်သည်ကိုလည်း ကူးစက်ရောဂါအတွက်လည်း စိုးရိမ်ရကြောင်း သိရှိရသည်။
“ကိုဗစ် -၁၉ ကူးစက်ရောဂါကိုလည်း စိုးရိမ်ရတယ်။ လူတွေက စုပြီး နေထိုင်ရတယ်ဆိုတော့ နှာခေါင်းစည်းတွေလည်း သိပ်မတပ်ကြဘူး။ ကိုဗစ် – ၁၉ အသိပညာပေးဖို့ အားနည်းနေသေးတယ် အသိပညာများများလာပေးဖို့ မျှော်လင့်တယ်” ဟု ပန်ကေတု ကျေးရွာမှာ စစ်ရှောင်များကို ကူညီပေးနေသည့် အမျိုးသား တစ်ဦး ကပြောသည်။
မိုင်းကိုင်မြို့နယ် ဟိုခဲကျေးရွာအုပ်စုအတွင်း စက်တင်ဘာ (၁၉) ရက်မှစတင်ပြီး သျှမ်းတပ် (၂) တပ် တိုက်ပွဲပြင်းထန်သောကြောင့် စစ်ရှောင်များ ထွက်ပြေး တိမ်းရှောင်ခဲ့ရကြောင်းသိရသည်။
စစ်ရှောင်များ ထွက်ပြေးတိမ်းရှောင်လာစဉ်လည်း မိုးသည်းထန်စွာ ရွာသွန်းမှုကြောင့် စီးလာသည့် ထော်လဂျီ (လေးလုံးထိုး) လည်း တိမ်းမှောက်မှုများဖြစ်ပွားခဲ့ပြီး ထိခိုက်ဒဏ်ရာ ရခဲ့သူများလည်း ရှိခဲ့ကြောင်းသိရသည်။
