သျှမ်းပြည်မြောက်ပိုင်း မူဆယ်ခရိုင်ရှိ ပန်ဆိုင်းမြို့နယ် မန်မိုင်ကျေးရွာတွင် ယနေ့ (စက်တင်ဘာ ၂၂)ရက်မနက်ပိုင်း တွင် ဆိုင်ကယ်ဖြင့် ရွာလှည့်ပြီး တံမြက်စည်း ရောင်းသူတစ်ဦး သေနတ် ပစ်သတ်ခံရကြောင်း သတင်းရရှိသည်။
ယနေ့ (စက်တင်ဘာလ ၂၂) ရက် မနက် ၉ နာရီကျော်တွင် ပန်ဆိုင်းမြို့နယ် မန်မိုင်ကျေးရွာတွင် ဆိုင်ကယ်ဖြင့် တံမြက်စည်းရောင်းသူကို အမည်မသိလက်နက်ကိုင် လူ(၂)ဦးက ဆိုင်ကယ်ဖြင့်ရောက်ရှိလာပြီး ၎င်းကို သေနတ် ၃ချက်ဖြင့် ပစ်သတ်သွားကြောင်း ဒေသခံတစ်ဦးက သျှမ်းသံတော်ဆင့်ကို ပြောသည်။
“ဒီနေ့ ၉ နာရီကျော် ၁၀ မိနစ် လောက်က ဖြစ်တယ်၊ ရွာထဲကို ဆိုင်ကယ်နဲ့ တံမြက်စည်းတင်ပြီး ဝင်လာတဲ့သူကို အရပ်ဝတ်နဲ့ လက်နက်ကိုင် လူနှစ်ယောက်က သေနတ်သုံးချက်နဲ့ ပစ်သွာတာ၊ သူကတော့ အဲ့နေရာမှာတင် ပွဲချင်းပြီးသေသွားတယ်” ဟု ဒေသခံ အမျိုးသား တစ်ဦး က ဆိုသည်။
အဆိုပါ သေဆုံးသွားသူသည် ဗမာလူမျိုးဖြစ်ပြီး ၎င်း၏ နေရပ်လိပ်စာနှင့် အမည်များကို မသိရှိရကြောင်း ၎င်းကို လာရောက်ပစ်ခတ်သွားသူကိုလည်း ဘယ်အဖွဲ့အစည်းမှ ဖြစ်ကြောင်းလည်း အတည်ပြု ပြောဆိုခြင်းများလည်း မသိရကြောင်း ၎င်းက ပြောသည်။
“သေသွားတဲ့သူက ဗမာလူမျိုးလိုပဲ သိရတယ်၊ ကျန်တာတော့ မသိရသေးဘူး၊ သူ့ကို လာပစ်တဲ့သူတွေက လည်း ဘယ်သူဘယ်ဝါမှန်းမသိရဘူး၊ သူသေဆုံးပြီး မကြာဘူး ရွာထဲကို ဌာနဆိုင်ရာတွေ စစ်တပ် ကလူတွေ လာကြည့်ကြတာ များတယ်၊ ၁၁ နာရီလောက်မှာတော့ မီးသတ်တွေ ရဲတွေက သူ့ Dead Body က လာသယ်သွားကြတယ်” ဟု အမည်မဖော်လိုသည့် ဒေသခံတစ်ဦးက သျှမ်းသံတော်ဆင့်ကို ပြောသည်။
ပြီးခဲ့သည့်နှစ်တွင်လည်း ပန်ဆိုင်းမြို့နယ်အတွင်းသို့ ဆိုင်ကယ်ဖြင့် ကုန်စိမ်းလာရောင်းသော ဈေးသည် အယောင်ဆောင် စစ်တပ်ဖက်မှ သူလျှိုတစ်ဦးကိုလည်း အမည်မသိ လက်နက်ကိုင် တစ်ဖွဲ့မှ သေနတ်ဖြင့် ပစ်သတ်မှု ဖြစ်ပွားခဲ့ကြောင်း လည်း သိရသည်။
Leave a Comments