သျှမ်းပြည်မြောက်ပိုင်း မူဆယ်ခရိုင် မုံးကိုးမြို့ရောက် စစ်ရှောင် နှင့် စစ်ရှောင်များကို ကူညီသူ စုစုပေါင်း (၄၅)ဦး ကိုဗစ် – ၁၉ ကူးစက်ခံ နေရကြောင်း သတင်းရရှိသည်။

မုံးကိုးမြို့နယ်အတွင်းတွင် ကိုးကန့်လက်နက်ကိုင်တပ်ဖွဲ့ (MNDAA) နှင့် စစ်ကောင်စီတပ် တို့ တိုက်ပွဲများကြောင့် တိမ်းရှောင်နေရသည့် မုံးကိုးမြို့နယ် ကောင်လုံကျေးရွာ ပြည်သူများနှင့် ၎င်းတို့ကို ကူညီပေးနေသည့် သူများ ကိုဗစ်-၁၉ ကူးစက်ခံရကြောင်း မုံးကိုးမြို့ခံ စစ်ရှောင်ကူညီသူ တစ်ဦးက သျှမ်းသံတော်ဆင့်ကိုပြောသည်။

“အရင်က ကောင်းလုံရွာကို စစ်ကောင်စီတွေက ဝင်ထွက်သွားလာမှုတွေ လုပ်တယ်လေ၊ ရိက္ခာတွေအတွက် နဲ့ တခါတလေတော့ လာလှည့်ကြည့်တာ၊ သူတို့တွေအဲ့လိုလာပြီး တစ်ပတ်ကြာလောက်နေတော့ ကောင်းလုံ ရွာသားတွေက အနံ့စပျောက်တယ်၊ စဖျားတယ်၊ သူတို့ကနေ ကူးတာလို့ ပြောရမှာပေါ့” ဟု ၎င်းကပြော သည်။

ကျေးရွာအတွင်း အဝင်အထွက်ပြုလုပ်နေသည့် စစ်ကောင်စီ စစ်သားများမှ ကူးစက်ခံနေရခြင်းဖြစ်ကြောင်း နှင့် လက်ရှိတွင် မုံးကိုးမြို့ပေါ်သို့ စစ်ရှောင်များကို ကူညီသယ်ဆောင် လက်ခံပေးသူများကိုလည်း ကိုဗစ် – ၁၉ ကူးစက်ခံနေရမှုများရှိနေကြောင်း သိရသည်။

“စစ်ဘေးရှောင် ပြည်သူတွေအပြင် ကျနော်တို့မှာ စစ်ရှောင်တွေကို ကူညီလက်ခံကြတဲ့ မုံးကိုးမြို့က ကူညီသူ တချို့လည်း ပြန်ကူးစက်ခံနေကြတယ်၊ အခု ကျွန်တော်တို့ စစ်ရှောင်ဒေသအတွင်းမှာ ကိုဗစ် – ၁၉ ဖြစ်တာ ၄၅ ယောက်လောက်ရှိတယ်” ဟု ၎င်းက ပြောသည်။

လက်ရှိတွင် မုံးကိုးမြို့နယ်အတွင်း စစ်ကောင်စီတပ်ဖွဲ့များက ၎င်းတို့ တပ်သားအင်အား တိုးချဲ့ မှုများ အဆက် မပြတ်ပြုလုပ်နေသည့်အပြင် ၎င်းတို့၏ လက်နက်ကြီးများရမ်းသမ်းပစ်ခတ်ကာ ထိုးစစ်ဆင်မှုများ ကြောင့် နေအိမ်စွန့်ခွာပြီး ထွက်ပြေးတိမ်းရှောင်နေရသည့် ဒေသခံပြည်သူများ တစ်ထောင်ကျော် ရှိနေပြီ ဖြစ်ကြောင်းသိရသည်။