သျှမ်းပြည် မြောက်ပိုင်းရှိ လားရှိုးနှင့် သိန္နီကြားတွင် စစ်ကောင်စီတပ်ဖွဲ့နှင့် တပ်ပေါင်းစုတို့ ပစ်ခတ်မှု ဖြစ်ပွား ခဲ့ကြောင်းသတင်းသိရသည်။
ယမန်နေ့ (စက်တင်ဘာလ ၂၀)ရက် ညနေပိုင်း ၄ နာရီဝန်းကျင်တွင် စစ်ကောင်စီတပ်နှင့် တပ်ပေါင်းစုဖြစ်သည့် ကိုးကန့်တပ်မတော် (MNDAA)၊ တအာင်းတပ်မတော် (TNLA)တို့သည် သျှမ်းပြည်မြောက်ပိုင်းရှိ လားရှိုး – သိန္နီကြား တွင် တိုက်ပွဲဖြစ်ပွားခဲ့ကြောင်း သိန္နီမြို့နေ ကားမောင်းသူ တစ်ဦးက သျှမ်းသံတော်ဆင့်ကို ပြောသည်။
“ထိပ်တိုက်တွေ့ကြလို့ ပစ်ခတ်မှု ဖြစ်ပွားခဲ့တယ်လို့ ယူဆပါတယ်၊ ပစ်တာကလည်း ခဏလေးပဲ အသံကြားရတယ်၊ နာရီဝက်လောက်ပေါ့၊ လမ်းမှာကားတွေရပ်စောင့်ရပြီး အသံတွေငြိမ်သွားတော့ ပုံမှန်အတိုင်းပဲ ဆက် ပြီးသွားလာနိုင်ပါတယ်၊ ထိခိုက်မှုတွေ ရှိတယ်လို့လည်း မကြားမိဘူး” ဟု အထက်ပါ ပုဂ္ဂိုလ်က ပြောသည်။
အဆိုပါ ပစ်ခတ်မှုသည် ညနေပိုင်း ၄ နာရီဝန်းကျင်အချိန်တွင် ပစ်ခတ်မှုအသံများ စကြားရခြင်းဖြစ်ပြီး ၄ နာရီ ကျော်အချိန်တွင် ပစ်ခတ်သံများ ငြိမ်သွားကြောင်း နှင့် အဆိုပါ ပစ်ခတ်မှုများသည် စစ်ကောင်စီနှင့်တပ်ပေါင်း စု တို့ ထိပ်တိုက်ထိတွေ့မှုကြောင့်ဟု ကြားသိရသော်လည်း အတည်ပြုချက်များ မရှိသေးကြောင်းလည်း ၎င်းက ပြောသည်။
“တပ်ပေါင်းစုနဲ့ စစ်ကောင်စီတွေရဲ့ ပစ်ခတ်မှုလို့တော့ ကြားရတယ်၊ ဒါပေမဲ့ အတည်ပြုချက်တော့ မရသေး ဘူး၊ ဒီနေ့ဆို မြို့ထဲမှာ ပုံမှန်အတိုင်းသွားလာနေကြပါပြီ” ဟု သိန္နီမြို့ခံ အမျိုးသားတစ်ဦးက ပြောသည်။
သျှမ်းပြည် မြောက်ပိုင်းတွင် စစ်ကောင်စီတပ်နှင့် တိုင်းရင်းသားလက်နက်ကိုင်များဖြစ်ကြသည့် MNDAA, TNLA, KIA တို့အကြား တိုက်ပွဲဖြစ်ပွားနေလျက်ရှိပြီး ပန်ဆိုင်း၊ မုံးကိုး ဒေသများမှာလည်း ဒေသခံ ကျေးရွာ ပြည်သူ နှစ်ထောင်ကျော်တို့က နေရပ်ကို စွန့်ခွာပြီး စစ်ဘေးတိမ်းရှောင်နေကြသည်။
Leave a Comments