သျှမ်းမြောက် ကျောက်မဲမြို့နယ်တွင် တိုင်းရင်းသားလက်နက်ကိုင်တိုက်ပွဲဖြစ်ပွားမှုကြောင့် ထွက်ပြေးနေရသည့် ပြည်သူများ မိုးကာနှင့် စားနပ်ရိက္ခာများ လိုအပ်နေကြောင်း သိရသည်။

လက်ရှိတွင် မိုးအဆက်မပြတ်ရွာသွန်းမှုကြောင့် စစ်ရှောင်စခန်းတစ်ချို့တွင် မိုးကာများလုံလောက်မှု မရှိခြင်းနှင့် စားနပ်ရိက္ခာ ခက်ခဲမှုများ ဖြစ်နေကြောင်း စစ်ရှောင်ကူညီသူများထံမှ သိရသည်။

“ဟူးစွန်စစ်ရှောင်စခန်းမှာက မိုးကာတွေ မရှိလို့ မိုးရွာရင် ဒုက္ခရောက်နေကြတယ်၊ စားနပ်ရိက္ခာတွေလည်း လိုအပ်နေတယ်၊ စစ်ရှောင်တွေကလည်း များတော့ ရှိထားတာတွေက မလုံလောက်တော့ဘူး” ဟု ကျောက်မဲ သျှမ်းစာပေနှင့်ယဉ်ကျေးမှုအသင်း ဥက္ကဌ လုင်းလျန်းဟန်က သျှမ်းသံတော်ဆင့်ကို ပြောပါ တယ်။

ဟူးစွန်ကျေးရွာအုပ်စုတွင် စစ်ဘေးရှောင် (၁၅၀၀)ဝန်းကျင်ရှိနေပြီး ကျန်းမာရေးမကောင်းသူများလည်း ရှိနေကြောင်း၊ ထို့အပြင် ကျောက်မဲမြို့ပေါ်တွင် ရောက်ရှိခိုလုံနေကြသည့် ဟူးကွက်ကျေးရွာဒေသခံများလည်း စားနပ်ရိက္ခာခက်ခဲနေကြောင်း စစ်ရှောင်ကူညီသူများထံမှ သိရသည်။

ကျောက်မဲမြို့နယ် မိုင်းငေါ့မြို့ရှိ မန်ပင့်စစ်ရှောင်စခန်းတွင်လည်း အစားအသောက်နှင့် ထင်းများ လိုအပ်နေကြောင်း ဒေသခံများထံမှ သိရသည်။

“ဒီမှာက လူအများအတွက် နေ့တိုင်းချက်ပြုတ်နေရတော့ ထင်းတွေ အစားအသောက်တွေက မလုံလောက်တော့ဘူး” ဟု မိုင်းငေါ့ ဒေသခံတစ်ဦးက ပြောသည်။

ထိုစစ်ရှောင်စခန်းတွင် စစ်ရှောင် (၁၀၀)ကျော်ရှိပြီး တိုင်းရင်းသားလက်နက်ကိုင်တပ်များ တိုက်ပွဲဖြစ်ပွား မှုကြောင့် လွန်ခဲ့သည့် (၂)လဝန်းကျင်ကတည်းက ထွက်ပြေးတိမ်းရှောင်ခဲ့ရတာဖြစ်ကြောင်း၊ ကောင်းဝေါင်း၊ နားလန့်နှင့် တော့ဆန်ကျေးရွာဒေသခံတို့ဖြစ်ကြောင်း သိရသည်။

ကျောက်မဲမြို့နယ်တွင် ပြီးခဲ့သည့် (၂)လကျော်က တိုင်းရင်းသားလက်နက်ကိုင်များဖြစ်သည့် RCSS/SSA နှင့် SSPP/SSA ၊ TNLA တပ်တို့ တိုက်ပွဲပြင်းထန်ခဲ့မှုကြောင့် ဒေသခံ ထောင်ချီ ထွက်ပြေးတိမ်းရှောင်နေရကြောင်း၊ ထိုစစ်ရှောင်များတွင် စားနပ်ရိက္ခာခက်ခဲမှုများရှိနေသည့်အပြင် ကိုဗစ်ရောဂါပိုး ကူးစက်ခံရသည့် စစ်ရှောင် (၁၅၀)ဝန်းကျင် ရှိနေကြောင်း သိရသည်။