သျှမ်းပြည်မြောက်ပိုင်းတွင်ဖြစ်ပေါ်နေသော စစ်ဘေးကြောင့် ဒေသခံလူထု ဆင်းရဲဒုက္ခ ရင်ဆိုင်နေရ သည့်အပေါ် သျှမ်းပြည်တပ်မတော် ခေါင်းဆောင် ၂ ဦး ပူးပေါင်းဖြေရှင်းပေးရန် CSSU ဥက္ကဌ စိုင်းအိုက်ပေါင်းက တိုက်တွန်းပြောဆိုလိုက်သည်။
ဒီအချိန်ဟာ လယ်တွေယာတွေဆင်းတဲ့အချိန်ဖြစ်တယ်။ စိုက်ပျိုးရေးလုပ်ငန်းခွင်ဝင်ချိန်ဖြစ်တယ်။ သျှမ်းပြည်မြောက်ပိုင်း ဒေသခံလူထုဟာ လယ်ယာလုပ်ငန်းခွင်ကိုပြစ်ပြီး စစ်ဘေးရှောင်နေကြရတယ်။ သူတို့ဒီချိန်မှာ မစိုက်ပျိုးရရင် လာမယ့်နှစ်အတွက် သူတို့အခက်အခဲတွေ့ရပါမယ်။ ဒါကြောင့် စစ်ရေးပဋိပက္ခတွေကြောင့်ဒေသခံလူထု ဒုက္ခရင်ဆိုင်နေရတဲ့အပေါ် သျှမ်းတပ်ဖွဲ့ခေါင်းဆောင် ၂ ဦးဖြစ်တဲ့ ဗိုလ်ချုပ်ကြီးပန်ဖှနဲ့ ဗိုလ်ချုပ်ကြီးယွက်စစ်တို့ကနေလက်တွဲပူးပေါင်းပြီး ကူညီဖြေရှင်းပေးဖို့ ကျနော် CSSU ဥက္ကဌအနေနဲ့မေတ္တာရပ်ခံအပ်ပါတယ်- ဟု ကျားဖြူပါတီဥက္ကဌလည်းဖြစ်သည့် စိုင်းအိုက်ပေါင်းက သျှမ်းသံတော်ဆင့်အားပြောပြသည်။
၎င်းနှင့်ပတ်သက်ပြီး ဇူလိုင်လ ၂၁ ရက်နေ့ရက်စွဲဖြင့်လည်း CSSU က ကြေငြာချက်တစောင်ထုတ်ပြန်ကာ တိုက်တွန်းထားပါသည်။
သျှမ်းပြည်မြောက်ပိုင်း နမ္မတူမြို့နယ်အတွင်း ပြီးခဲ့သည့်အပတ်က တိုက်ပွဲကြောင့် ဒေသခံလူထု ၂၀၀၀ နီးပါး နမ္မတူမြို့ မန်စံဘုန်းကြီးကျောင်းနှင့် သီပေါမြို့နယ် အောင်မင်္ဂလာဘိုးတော်နှင့် မိုးတေဘုန်းကြီး ကျောင်းများသို့စစ်ဘေးရှောင်နေခဲ့ကြသည်။ စစ်ဘေးရှောင်အများစုမှာ အမျိုးသမီးများ၊ ကလေးများ ဖြစ်နေကြောင်းသိရသည်။
စစ်တပ် ၂ ဖွဲ့ ပူးပေါင်းနိုင်ဖို့ ခေါင်းဆောင် ၂ ဦးအချင်းချင်းတွေ့ဆုံသင့်တယ်။ ဝေးကွာရင် ယုံကြည်မှု လျော့ပါးတယ်။ တယောက်တနေရာစီမှာနေနေကြတော့ ရင်းနှီးမှုလျော့ပါးတယ်။ ပြသနာဆိုတာ ဖြေရှင်းရင်ရတဲ့အရာမျိုးလေ။ စစ်တိုက်တယ်ဆိုတာ ပန်းနဲ့ပေါက်တာမဟုတ်ဘူး။ သေစေနိုင်တဲ့ ကျည်ဆံဖြစ်တယ်။ သျှမ်းပြည်သားတွေ စစ်ဘေးရှောင်ရင်း ထိုင်းနိုင်ငံဘက် တရုတ်နိုင်ငံ ဘက်ကိုတိမ်းရှောင်နေရတယ်။ သူများနိုင်ငံမှာသွားအလုပ်လုပ်ကြတယ်။ ကိုယ့်နိုင်ငံသား လျော့လျော့သွားတယ်။ ရှည်ရှည်ဝေးဝေးစဉ်းစားပေးစေချင်ပါတယ်။ ခေါင်းဆောင်တွေမအားလပ်ဘူးဆိုရင် ကော်မတီဖွဲ့ပြီး ဆွေးနွေးကြစေချင်ပါတယ်- ဟု စိုင်းအိုက်ပေါင်းကပြောသည်။
ဇူလိုင်လ ၂၀ ရက်နေ့တွင် စစ်ဘေးရှောင်များနေရပ်သို့အသီးသီး ပြန်ကြပြီဟုဆိုသော်လည်း နယ်မြေစိုးမိုးရေးအားပြိုင်မှုကြောင့် ရွာနားနီးတဝိုက် အချိန်မရွေး တိုက်ပွဲပြန်လည်ဖြစ်ပွါးနိုင်ကြောင်း ဒေသခံများကစိုးရိမ်နေကြသည်။
ဇူလိုင်လ ၂၃ ရက် ယနေ့မနက်ပိုင်းကလည်း နမ္မတူမြို့နယ် ပန်ကွတ်ရွာအနီး ဝမ့်မိုင်းဟွေ့ရွာ၏ တောပိုင်းတွင် ပစ်ခတ်သံများပြန်လည်ကြားရကြောင်း နမ္မတူဒေသခံ စိုင်းစိုင်း ကပြောသည်။
စစ်ရေးပဋိပက္ခတွင် မြောက်ပိုင်းမဟာမိတ်တပ်ဖွဲ့နှင့်အတူ သျှမ်းပြည်တပ်မတော် SSPP/SSA မှ ပါဝင်တိုက်ခိုက်နေသည်ဟု သျှမ်းပြည်တပ်မတော် RCSS/SSA ဘက်မှထုတ်ပြန်ထားသော်လည်း သျှမ်းပြည်တပ်မတော် SSPP/SSA ဘက်မှ တစုံတရာ အတည်ပြုခြင်းမရှိပေ။
