သျှမ်းပြည်မြောက်ပိုင်း နမ့်ခမ်းမြို့တွင် Lock Down  ပြန်ဖြည်ပြီး သွားလာခွင့်ပြုလိုက်သည့်နောက်ပိုင်း ကိုဗစ် -၁၉ ရောဂါကူးစက်မှု ပြန်လည်မြင့်တက်လာပြီး သေဆုံးမှုလည်း ဆက်ရှိလာကြောင်း သတင်းရရှိသည်။

နမ့်ခမ်းမြို့ပေါ် ရပ်ကွက်သူ/သားများ နှင့် ကျေးရွာလူထုအပါဝင် သံသယလူနာ ၇၃ ဦးအား ကိုဗစ် – ၁၉ ပိုးရှိ/ မရှိ စစ်ဆေးရာမှာ ၂၆ ဦး ကိုဗစ်ပိုး စစ်ဆေးတွေ့ရှိကြောင်း၊ ဆေးရုံတွင် ဆေးကုသခံယူနေသည့် ပိုးတွေ့အ တည်ပြုလူနာတစ်ဦးလည်းသေဆုံးသွားကြောင်း အမည်မဖေါ်လိုသည့် နမ့်ခမ်းမြို့ ပရဟိတ အသင်းဝင် တစ်ဦးက သျှမ်းသံတော်ဆင့်ကို ပြောသည်။  

“သွားလာခွင့် ပြုလိုက်တော့ နမ်ခမ်းပြည်သူ့ဆေးရုံမှာ လူနာတွေတဖြည်းဖြည်းပြန်များလာတယ်၊ ကိုဗစ်ကိုအလေးမထားတော့ဘူး။ Mask လဲမတပ်တော့ ပိုကူးစက်လာမှာကို စိုးရိမ်မိတယ်။ Lock Down  ပြန်ဖြည်လိုက်တော့ ကြိတ်ကုနေတဲ့လူတွေ အနံ့အရသာပျောက်တဲ့သူတွေလဲ ဆေးရုံကိုလာကြတယ်” – ဟု အများအကျိုးသယ်ပိုးသည့် နမ့်ခမ်းမြို့ခံ (ပရဟိတအသင်းဝင်) တဉီးက သျှမ်းသံတော်ဆင့်ကို ပြောသည်။

နမ့်ခမ်းမြို့မစျေးကို ပြီးခဲ့သည့် စက်တင်ဘာလ ၂ ရက်နေ့တွင် စတင်ဖွင့်လှစ် ရောင်းချခွင့်ပြု ထားတာဖြစ်ပြီး မြို့မစျေးအတွင်းမှာ စားသောက်ကုန်နဲ့ ဆေးဝါးဆိုင်ရာ ဆိုင်ခန်းများမှအပ ကျန်ဆိုင်ခန်းတွေအားလုံးကို စက်တင်ဘာလ ၉ ရက် နေ့အထိ ဆက်လက်ပိတ်ပင်ထားမည် ဖြစ်ကြောင်း နမ့်ခမ်းမြို့နယ် စည်ပင်သာယာ ရေး ဌာနမှ စက်တင်ဘာလ ၂ ရက်နေ့မှာ ထုတ်ပြန်ထားကြောင်းလည်း တွေ့ရသည်။

နမ့်ခမ်းမြို့နယ်အတွင်းတွင် ကိုဗစ် – ၁၉ တတိယလှိုင်းအတွင်း ရောဂါကူးစက်ခံရသူစုစုပေါင်း ၁၃၄၂ ဦး ရှိပြီး သေဆုံးသူ အတည်ပြုလူနာ ၆၇ ဦးရှိကြောင်း၊ လက်ရှိတွင် အတည်ပြုလူနာ ၂၁၇ ဦး က ဆေးကုသမှု ခံယူနေလျက်ရှိကြောင်း သိရသည်။