သျှမ်းရှေ့ ကျိုင်းတုံမြို့နယ်တွင် ဒေသခံများ ကိုဗစ်စည်းကမ်းလိုက်နာမှု အားနည်းခြင်းကြောင့် ကိုဗစ်ကူးစက်မှုမြင့်တက်နေဆဲဖြစ်ကြောင်း သိရသည်။

ကျိုင်းတုံတွင် ပြီးခဲ့သည့် စက်တင်ဘာလ (၈)ရက် ယမန်နေ့က ကိုဗစ်ကူးစက်ခံရသူ (၈၁)ဦးထိ တွေ့ရှိခဲ့တာဖြစ်ပြီး ကူးစက်ခံရသူ မြင့်တက်နေဆဲဖြစ်ကြောင်း၊ ထို့အပြင် စည်းကမ်းလိုက်နာမှုများ အားနည်းနေကြောင်း သိရသည်။

“ဒီမှာက မကြာခဏ အပြင်ထွက် သွားလာတာတွေများတယ်၊ ပေါ့ပေါ့ဆဆနေကြတာပေါ့၊ ဖြစ်နိုင်ရင်တော့ အပြင်သိပ်မထွက်ကြဖို့လိုတယ်၊ ကိုဗစ်ကူးစက်တာတွေက အရမ်းမြင့်နေတာဆိုတော့ အားလုံး ဂရုစိုက်ဖို့ လိုပါတယ်” ဟု ကျိုင်းတုံ ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

ကျိုင်းတုံမြို့ကို ပြီးခဲ့သည့် သြဂုတ်လ (၂၀)ရက်နေ့ကတည်းက Stay at home သတ်မှတ်ပြီးနောက် အစိုးရဝန်ထမ်းများ၊ စက်သုံးဆီ၊ စားသောက်ကုန်နှင့် ဆေးဝါးရောင်းချသူများမှ အပ ကျန်သည့်သူများ နေအိမ်တွင်းသာ နေထိုင်ကြရန် သက်ဆိုင်ရာမှ ထုတ်ပြန်ထားသည်။

ကျိုင်းတုံတွင် စက်တင်ဘာလ (၉)ရက် ယနေ့နံနက်ပိုင်းတွင်လည်း ကိုဗစ်ကူးစက်ခံရသူ (၅၀)ဦးထိ ထပ်မံတွေ့ရှိခဲ့ပြီး ယနေ့ထိ ကူးစက်ခံရသူ (၂၄၀၀)နီးပါးနှင့် သေဆုံးသူ (၄၃)ဦး၊ ဆေးရုံဆင်းခွင့်ရသူ (၁၅၀၀)ကျော် ရှိနေကြောင်း သိရသည်။