သျှမ်းတောင် လွိုင်လင်ခရိုင် လဲချား မြို့မဈေးအနီး လမ်းမများပေါ်တွင် ယာယီဈေးသတ်မှတ်ပြီး ရောင်းချနေကြကြောင်း သတင်းရရှိသည်။
လဲချား မြို့မဈေး မြောက်ဘက်နှင့် အရှေ့ဘက်ရှိ လမ်းမပေါ်တွင် ယာယီဈေးသတ်မှတ်ထားတာဖြစ်ပြီး အသီးအရွက်သည်များအား ရောင်းချခွင့်ပြုနေကြောင်း သိရသည်။
“အရင်က မိုင်းရှူး၊ လားရှိုးကိုသွားတဲ့ လမ်းမကြီးပေါ်မှာ ရောင်းချခွင့်ပေးထားတာ၊ ဒါပေမယ့် လမ်းကကျဉ်းပြီး အခါကြီးရက်ကြီးဆို လမ်းပိတ်တာတွေဖြစ်တော့ မနေ့က မြို့မဈေး မြောက်ဘက်နဲ့ အရှေ့ဘက် လမ်းမှာ နေရာသတ်မှတ်ပြီး ရောင်းချဖို့တာဝန်ရှိသူတွေ ပြန်လုပ်ထားပေးတယ်” ဟု လဲချားဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
ကိုဗစ်ကာလအတွင်း လဲချားမြို့မဈေးအား ပိတ်ထားသည့်အတွက် မိုင်းရှူး၊ လားရှိုးသွား လမ်းမကြီးပေါ်တွင် ယာယီဈေးရောင်းချခဲ့ကြတာဖြစ်ပြီး စက်တင်ဘာလ (၉)ရက် (ယနေ့)နံနက်ပိုင်းတွင် မြို့မဈေးအနီး လမ်းမပေါ်သို့ ပြောင်းလဲသတ်မှတ်ခဲ့တာဖြစ်ကြောင်း သိရသည်။
ထိုနေရာတွင် နံနက်အစောပိုင်းမှ နံနက်(၁၀)နာရီအချိန်ထိသာ ရောင်းချခွင့်ပြုထားတာဖြစ်ကြောင်း၊ ပန်းခြံအတွင်း ယခင်ယာယီဈေးသတ်မှတ်ထားသည့်နေရာတွင်လည်း ဆက်လက်ရောင်းချနေဆဲ ဖြစ်ကြောင်း ဒေသခံများထံမှ သိရသည်။
“ခုက ဈေးဝယ်တဲ့သူထက် ရောင်းတဲ့သူက ပိုများနေတာ၊ ဒီနေ့မနက်ဆို ဈေးနားက လမ်းမှာ နေရာသတ်မှတ်ပြီး ပေးရောင်းတယ်၊ ဒီပန်းခြံမှာလည်း ရောင်းနေကြတယ်၊ ဝယ်တဲ့သူက မရှိဘူး၊ တစ်ချို့ရက်ဆို ဈေးကောက်ဖိုးတောင် မရဘူး” ဟု ပန်းခြံအတွင်း ဈေးရောင်းနေသည့် အမျိုးသမီးတစ်ဦးက ဆိုသည်။
ထိုပန်းခြံထဲတွင် ကိုဗစ်ပထမလှိုင်းကတည်းက ယာယီဈေးရောင်းချသည့်နေရာအဖြစ် သတ်မှတ်ပေးထားခဲ့တာဖြစ်ပြီး ယနေ့တိုင် ဆက်လက်ရောင်းချနေတာဖြစ်ကြောင်း သိရသည်။
လဲချားမြို့တွင်း စက်တင်ဘာလ (၉)ရက် ယနေ့အထိ ကိုဗစ် − ၁၉ ရောဂါပိုး ကူးစက်ခံရသူ (၁၂၀)ကျော်ရှိပြီး သေဆုံးသူ (၅)ဦးနှင့် ဆေးဆုံဆင်းခွင့်ရသူ (၁၁၀)ကျော် ရှိနေကြောင်း သိရသည်။
