မူဆယ်မြို့နယ် စိန်ကျော့ပြည်သူ့စစ်စခန်း မီးရှို့ခံရ

0

သျှမ်းပြည်မြောက်ပိုင်း မူဆယ်မြို့နယ် စယ်လန့်ကျေးရွာအုပ်စု မိုင်းမိုင်စခန်း (စိန်ကျော့ပြည်သူ့စစ်စခန်း) မီးရှို့ခံရကြောင်းစုံစမ်းသိရှိရသည်။

ယနေ့ စက်တင်ဘာ (၉ ) ရက် မနက် ၈ နာရီခန့်က တိုင်းရင်းသား လက်နက်ကိုင် တပ်ဖွဲ့ က လာရောက် မီးရှို့ကြောင်း စုံစမ်းသိရှိရသည်။

“ခုလက်ရှိချိန်ထိ ရှို့နေတုန်းပဲ။ ဘယ်သူမှ အနီးမသွားရဘူး။ ဘယ်သူလဲဆိုတာတော့ ကျနော်တို့တော့ မပြောရဲဘူး။ အဲ့အနီးနားနေတဲ့ သူတွေတော့ TNLA စစ်သားတွေကိုမြင်တယ်လို့ပြောတယ်” ဟု စယ်လန့်ဒေသခံ တစ်ဦး သျှမ်းသံတော်ဆင့် ကိုပြောသည်။

ထိုတပ်စခန်းအတွင်း စစ်ကောင်စီ နှင့် ပြည်သူ့စစ်များ အတူနေထိုင်ပြီး လက်ရှိ သတင်းရေးသားနေသည့်အချိန်ထိ စခန်းများ ရှို့နေကြောင်း ဒေသခံများက ပြောဆိုကြသည်။

“တစ်ပတ်လောက်ရှိပြီ အဲ့ဘက်က တောင်ယာတွေ မသွားရတာ။ TNLA က မပေးတက်သွားဘူး” ဟု စယ်လန့်ဒေသခံ တစ်ဦး က ပြောသည်။

အဆိုပါ မီးရှို့သည့် ကိစ္စနှင့် ပတသက်ပြီး TNLA ပြောရေးဆိုခွင့်ရှိသူ ဗိုလ်မှူး မိုင်းအိုက်ကျော် က “ ကျနော်တို့လဲ မေးကြည့်နေတုန်းပဲ။ ဘယ်အဖွဲ့ဆိုတာတော့ မသိရသေးဘူး။ ကျနော်တို့ အဖွဲ့ကို မေးကြည့်တော့ ဒီနေ့ မနက်မှာ တိုက်ပွဲဖြစ်တာတော့ မရှိဘူး။ ကျနော်တို့ လှုပ်ရှားနယ်မြေအတွင်းတော့ ဖြစ်တာပေါ့နော်။ အရင်ကတည်းက ကျနော်တို့ လှုပ်ရှားမှု ရှိပါတယ်” ဟု သျှမ်းသံတော်ဆင့် ကိုပြောသည်။

စိန်ကျော့ပြည်သူ့စစ်တပ်ဖွဲ့ခေါင်းဆောင်သည် ၁၉၈၉ ခုနှစ်က စစ်တပ် နှင့် အပစ်ရပ်ငြိမ်းချမ်းရေးယူထားသည့် သျှမ်းလက်နက်ကိုင်တပ်တစ်ခု၏ ဥကဋ္ဌ ဗိုလ်ချုပ်လွယ်မော ဆိုသူဖြစ်သည်။

၂၀၀၉ ခုနှစ်တွင် တပ်မဟာ သုံးခု ဦးဆောင်ပြီး စစ်အစိုးရလက်အောက်ခံ ပြည်သူ့စစ်တပ်အဖြစ် အသွင်ပြောင်းထားသည်။

Leave a Comments