ရှမ်းပြည်တိုးတက်ရေးပါတီ/ ရှမ်းပြည်တပ်မတော် (SSPP/SSA) ထံသို့ စိန်ကျော့ပြည်သူ့စစ် ဉက္ကဋ္ဌ စဝ်လွယ်မောဝ် ခေါင်းဆောင်သည့် တပ်အင်အား အများအပြားသည် လက်နက်အပြည့်အစုံဖြင့် ပြန်လည်ပူးပေါင်းခဲ့ကြောင်း စုံစမ်းသိရသည်။
ယနေ့ (စက်တင်ဘာလ ၅ ရက်) နံနက်ပိုင်းတွင် SSPP ဌာနချုပ် ဝမ်ဟိုင်းသို့ စိန်ကျော့ပြည်သူ့စစ်အဖွဲ့မှ ဥက္ကဋ္ဌ စဝ်လွယ်မောဝ် ဦးဆောင်ပြီး စိန်ကျော့ဌာနေပြည်သူ့စစ်နှင့် ယခင် SSPP မိုင်းခေး တပ်မဟာ (၃) မှ တပ်သားအားလုံးသည် လက်နက်အပြည့်အစုံဖြင့် SSPP/SSA ထံ လာရောက်ပူးပေါင်းခဲ့ကြောင်း စစ်ရေးသတင်းရင်းမြစ်က ပြောသည်။
“ဒီမနက် စဝ်လွယ်မောဝ် ဦးဆောင်တဲ့ စိန်ကျော့ ဌာနချုပ်နဲ့ မိုင်းခေး တပ်မဟာ (၃) ကို ဝမ်ဟိုင်းဌာနချုပ်မှာ ဉက္ကဋ္ဌ စဝ်ပန်ဖ ကိုယ်တိုင် အခမ်းအနားနဲ့ ကြိုတာ။ စိန်ကျော့နဲ့ မိုင်းခေးအဖွဲ့က အင်အားအကုန်လုံး မိခင်အဖွဲ့အစည်းမှာ ပြန်လာပူးပေါင်းတာပေါ့”ဟု စစ်ရေးသတင်းရင်းမြစ်က သျှမ်းသံတော်ဆင့်ကို ပြောသည်။
SSPP ဝမ်ဟိုင်းဌာနချုပ်သို့ လာရောက်ပူးပေါင်းခဲ့သည့် စိန်ကျော့ဌာနေပြည်သူ့စစ်နှင့် မိုင်းခေး တပ်မဟာ (၃) မှ တပ်သားများကို SSPP/SSA ဉက္ကဋ္ဌ ဗိုလ်ချုပ်ကြီးပန်ဖကိုယ်တိုင် အိုးစည်ဗုံမောင်းဖြင့် ကြိုဆိုခဲ့ကြောင်း သိရသည်။
လွန်ခဲ့သည့် ၂၀၁၀ ပြည့်နှစ်ခန့်က စဝ်လွယ်မောဝ် ဦးဆောင်သည့် စိန်ကျော့အဖွဲ့နှင့် SSPP တပ်မဟာ (၃) ဖြစ်ခဲ့သည့် စဝ်လှမြင့် ဦးဆောင်သည့် မိုင်းခေးအဖွဲ့တို့သည် စစ်ကောင်စီလက်အောက်ခံ ပြည်သူ့စစ်အဖြစ် အသွင်ပြောင်းခဲ့ပြီး (၁၄) နှစ်အကြာတွင် မူရင်း SSPP/SSA တပ်ဖွဲ့ထံသို့ ပြန်လည်ပူးပေါင်းလာခြင်း ဖြစ်သည်။
စစ်ကောင်စီလက်အောက်ခံ ပြည်သူ့စစ်အဖွဲ့တွင် ဖွဲ့စည်းပုံအားဖြင့် တပ်အင်အား (၃၀၈) ဦး ရှိခြင်းကြောင့် SSPP/SSA ထံသို့ လာရောက်ပူးပေါင်းခဲ့သည့် ဆင်ကျော့နဲ့ မိုင်းခေး တပ်မဟာ (၃) မှာ အင်အား (၆၀၀) ကျော် အနည်းဆုံး ရှိနိုင်ကြောင်း စစ်ရေးသတင်းရင်းမြစ်က ဆိုသည်။
ပြီးခဲ့သည့် ဩဂုတ်လအတွင်းက သီပေါနှင့် မိုင်းရယ်မြို့နယ်အစပ် စိန်ကျော့ကျေးရွာအုပ်စုအတွင်း စိန်ကျော့ပြည်သူ့စစ်ဌာနချုပ်အနီးရှိ စစ်ကောင်စီတပ် ခလရ-၂၃ ကိုးကန့်တပ်ဖွဲ့ MNDAA မှ ဝင်ရောက်သိမ်းပိုက်ထားသည်။
Leave a Comments