အမျိုးသားညီညွတ်ရေးအစိုးရ (NUG) ယနေ့ (စက်တင်ဘာ ၇)ရက် စစ်အာဏာရှင် ချေမှုန်းရေး အတွက် အရေးပေါ်အခြေအနေ ထုတ်ပြန်ကြေညာလိုက်လိုက်ပြီးနောက် စစ်ကောင်စီတပ်ဖွဲ့ မှ သျှမ်းပြည်မြို့ကြီး တချို့တွင် စစ်ဆေးမှုများ တင်းကြပ်စွာ ပြုလုပ်နေကြောင်း စုံစမ်းသိရသည်။
စစ်ကောင်စီ၏ စစ်သားနှင့် ရဲများသည် ယနေ့ (စက်တင်ဘာ ၇) ရက် မနက်ပိုင်းတွင် တောင်ကြီးမြို့ ပြည်သူများ၊ ဈေးရောင်း၊ဈေးဝယ်သူများ ယာဉ်များကို အတင်းအကြပ်တားပြီး စစ်ဆေးမှုများ ပြုလုပ်ခဲ့ကြောင်း တောင်ကြီးမြို့ခံတစ်ဦးက ပြောသည်။
“ဒီနေ့ မနက်မှာ ဈေးဝယ်တဲ့သူတွေကလည်း များတော့ လမ်းသွားလမ်းလာတွေကလည်း များတယ်၊ NUG ကလည်း အရေးပေါ် အခြေအနေ ကြေညာချက် ထုတ်ပြန်ထားတယ်ဆိုတော့ ပစ္စည်းလုဝယ်ကြတာ၊ အဲ့မှာ ရဲ နဲ့ စစ်သားတွေက လာစစ်နေကြတယ်၊ ကားဆို မှန်ချခိုင်းရုံမဟုတ်ပဲ လူကိုပါ အောက်ဆင်းခိုင်းပြီးတော့စစ် တာ” ဟု တောင်ကြီးမြို့ခံ လူငယ်တစ်ဦးက သျှမ်းသံတော်ဆင့်ကို ပြောသည်။
တောင်ကြီးမြို့ ယနေ့ မွန်းလွဲပိုင်း ၃နာရီခန့် ရွှေတောင်ရပ်ကွက်တွင် အပေါင်ဆိုင်အိမ်ထဲကို ဝင်ရောက် သောင်းကြမ်းကာ ဆိုင်ကယ်အပေါင်ဆိုင်မှ အခွန်မဆောင်ထားသည့် ဆိုင်ကယ် (၁၇)စီး စစ်ကောင်စီမှ သိမ်းဆည်းသွားခဲ့ကြောင်း တောင်ကြီး ဒေသခံများ သတင်းပေးပို့ချက် အရသိရသည်။
“အခွန်မဆောင်လို့ဆိုပြီးတော့ ဝန်းထဲကို အတင်းဝင်စီးတာ အဲ့အိမ်က ကောင်လေးတွေကိုတောင် ထိုးရိုက်သွားတာတွေရှိတယ်၊ စုစုပေါင်း ဆိုင်ကယ် ၁၇ စီးပါသွားတယ်တဲ့”ဟု ကိုယ်တိုင်ကြုံတွေ့ရသည့် သူတစ်ဦးက ပြောသည်။
ထို့အပြင် သျှမ်းပြည် အရှေ့ပိုင်းတာချီလိတ်မြို့ ဆန်ဆိုင်း(က)ရပ်ကွက် နှင့် မယ်ခေါင်ရပ်ကွက် ကြား သွားလာသည့်လမ်းပေါ် အာဏာသိမ်းစစ်ကောင်စီသည် လက်နက်အပြည့်အစုံဖြင့် စစ်ဆေးမှုများ လုပ်ဆောင်နေကြောင်း သတင်းရရှိသည်။
ယနေ့ စက်တင်ဘာလ(၇)နေ့တွင် အာဏာသိမ်းစစ်ကောင်စီတို့သည် မြို့အဝင်အထွက်များကို တင်းကြပ်စွာ ထားရှိသည့် အပြင် ၎င်းတို့၏ လေတပ်မှ လေကြောင်းစစ်ဆင်ရေးများကိုပါ စတင်လှုပ်ရှားလာပြီး လေတပ် စခန်းတည်ရှိရာ မြို့များတွင် မြို့တွင်းနှင့် အနီးအနားများအထိ ဝဲပျံမှုများ လုပ်ဆောင်နေသည် ဟုလည်း သိရသည်။
