သျှမ်းပြည်မြောက်ပိုင်း သီပေါမြို့နယ် နမ့်လန်ဒေသတွင် ရေကြီးသဖြင့် နေအိမ်တစ်အိမ် ပျက်စီးပြီး တစ်ချို့နေအိမ်မှာ တစ်ခြားနေရာသို့ ပြောင်းရွေ့ရကြောင်း စုံစမ်းသိရှိရသည်။
ယနေ့ စက်တင်ဘာ (၇) ရက်တွင် နမ့်လန်မြို့ရှိ အနိမ့်ပိုင်း ရပ်ကွက် တစ်ချို့ နှင့် ကျေးရွာ တစ်ချို့ ရေကြီးမှုများ ကြုံတွေ့ခဲ့ရကြောင်း သတင်းရရှိသည်။
“သုံးနှစ်လုံးလုံး ဒီလိုဖြစ်တယ်။ ဒီနှစ်က ပိုဆိုးနေတယ်။ ကျမတို့ အိမ်မှာ အနည်းငယ် ထိသွားတယ။် ခြံစည်းရိုးတွေ ထိသွားတာ ” ဟု ပန်ဟိုက် ရပ်ကွက် ဒေသခံ အမျိုးသမီး တစ်ဦး က သျှမ်းသံတော်ဆင့် ကိုပြောသည်။
လက်ရှိ (၁၀) နာရီချိန်ထိ ရေကြီးနေပြီး ပန်ဟိုက်ရပ်ကွက်က ဒေသခံ တစ်ချို့ ပစ္စည်းများကို တခြားရပ်ကွက်သို့ ပြောင်းရွေ့နေကြောင်း သိရသည်။
“မိုး ၂ ရက်ဆက်တိုက် ရွာသွန်းသဖြင့် အနိမ့်ပိုင်းဒေသမှာ ရေကြီး။ တောင်ကျရေတွေ ချောင်းတွေ က လာတဲ့ ရေတွေဖြစ်တယ်။ ရပ်ကွက်ထဲကပဲဖြစ်တယ်။ နိမ့်တဲ့အပိုင်းတွေ ရေကြီးတာ” ဟု နမ့်လန်ဒေသခံ အမျိုးသား တစ်ဦးကပြောသည်။
မိုးရွာသွန်းမှုကြောင့် နမ့်လန်မြို့ရှိ ပန်ဟိုက်ရပ်ကွက်၊ ကောင်းလန်းရပ်ကွက် နှင့် နမ့်လုတ်ကျေးရွာ တို့သည် ရေကြီးမှုဒဏ် ခံရသည်။
နမ့်လန်ဒေသသည် ပြီးခဲ့သည့် ၂၀၁၈ ခုနှစ်တုန်းကလည်း မိုးအဆက်မပြတ် ရွာသွန်းသဖြင့် ရေကြီးမှုဒဏ် ခံခဲ့ရပြီး ပျက်စီးဆုံးရှုံးမှု များပြားခဲ့သည်။
Leave a Comments