သျှမ်းပြည် မြောက်ပိုင်း မူဆယ်ခရိုင် မုံးကိုးဒေသတွင်း အင်အားအများအပြားဖြည့်တင်းပြီး ထိုးစစ်ဆင်နေမှုကြောင့် ဒေသတွင်းလက်နက်ကိုင် တပ်ဖွဲ့ဖြစ်သည့် ကိုးကန့်တပ်မတော် (MNDAA) တို့ဖက်မှ တပ်သား တစ်ဦး ကျဆုံးသွားရကြောင်း သတင်းသိရသည်။
ယနေ့ စက်တင်ဘာလ ၆ ရက်နေ့ နံနက်စောစော ၆ နာရီ ၃၀ မိနစ် အချိန်တွင် မူဆယ်ခရိုင် မုံးကိုးမြို့နယ် အတွင်း ရှိကျိကြတောင်ကြော တစ်လျှောက်တွင် စစ်ကောင်စီတပ်ဖွဲ့နှင့် ကိုးကန့်တပ်မတော်တို့ ပြင်းထန်စွာ တိုက်ပွဲဖြစ်ပွားရာ ကိုးကန့်တပ်မတော်မှ တပ်သား တစ်ဦးကျဆုံးပြီး တစ်ဦးက ပြင်းထန်စွာ ဒဏ်ရာရှိသွား ကြောင်း သတင်း သိရသည်။
“တပ်သား ၂၀၀ လောက်ရှိတဲ့ စစ်ကြောင်း သုံးကြောင်းနဲ့ နံနက် ၅ နာရီဝန်းကျင်ကနေ ၁၁ နာရီအထိ သူတို့ (စစ်ကောင်စီ) က ထိုးစစ်ဆင်တယ်၊ စစ်ကောင်စီတို့က လက်နက်အင်အား လူအင်အား အများအပြား သုံးထားတယ်၊ သူတို့ထိုးစစ်ဆင်မှုမှာ ကျနော်တို့ ကိုးကန့် တပ်မတော်ဖက်က တပ်သား တစ်ဦးကျဆုံး သွားတယ်လို့တော့ သိရပါတယ်” ဟု ကိုးကန့်တပ်မတော်မှ တာဝန်ရှိသူ တစ်ဦးက ကပြောသည်။
စစ်ကောင်စီတို့ဖက်မှ လက်နက်အင်အား လူအင်အား အများအပြား အသုံးပြုပြီး ကိုးကန့်တပ်မတော်တို့ကို လက်နက်ကြီးများဖြင့် မြေပြင်တိုက်ပွဲမှ ပြင်းထန်စွာ ထိုးစစ်ဆင်နေသည့် အပြင် ဒရုန်းများ အသုံးပြုပြီး နေရာများကိုလည်း ထောက်လှမ်းမှုများပြုလုပ်နေကြောင်းသိရသည်။
လက်ရှိအချိန်ထိ နှစ်ဦးနှစ်ဖက် စစ်ရေးတင်းမာမှုများ ရှိနေသည့် အပြင် စစ်ကောင်စီတို့ဖက်မှလည်း အင်အား ထပ်မံဖြည့်တင်းမှုများ အဆက်မပြတ်ရှိနေခြင်းတို့ကြောင့် ကိုးကန့်တပ်မတော်တို့ကို ပြင်းပြင်းထန်းထန် တိုက်ခိုက်ရန် ရည်ရွယ်နေသည့် သဘောရှိကြောင်းလည်း သိရသည်။
လက်ရှိတွင် မုံးကိုးမြို့နယ်အတွင်းတွင် တိုက်ပွဲများ အဆက်မပြတ် ဖြစ်ပွားနေသည့်အတွက် မုံးကိုးမြို့ပေါ်သို့ စစ်ဘေးရှောင် ရောက်လာသည့် ဒေသခံပြည်သူများ ၆၀၀ ခန့်နီးပါးခန့် ရှိနေကြောင်းလည်း သိရသည်။
Leave a Comments