Saturday, July 13, 2024

မိုင်းငေါ့ စစ်ရှောင် ကိုယ်ဝန်သည်အပါအဝင် (၁၂) ဦး ကိုဗစ်ထပ်မံကူးစက်ခံရ

Must read

သျှမ်းမြောက် ကျောက်မဲမြို့နယ် မိုင်းငေါ့မြို့ စစ်ရှောင်စခန်းမှ ကိုယ်ဝန်သည်(၂)ဦးအပါအဝင် စစ်ရှောင် (၁၂)ဦး ကိုဗစ်ပိုး ထပ်မံကူးစက်ခံခဲ့ရကြောင်း သိရသည်။

မိုင်းငေါ့မြို့ တာလုံရပ်ကွက် တာလုံဘုန်းကြီးကျောင်းတွင် ဖွင့်လှစ်ထားသည့် စစ်ရှောင်စခန်းမှ ပြီးခဲ့သည့် ရက်ပိုင်းက ကိုဗစ်ကူးစက်ခံရသူ စတင်တွေ့ရှိခဲ့တာဖြစ်ပြီး စက်တင်ဘာ လ (၃)ရက် (ယနေ့)တွင် ကိုဗစ်ကူးစက်ခံရသူ (၁၂)ဦး ထပ်မံတွေ့ရှိခဲ့ရတာဖြစ်ကြောင်း သိရသည်။

“လားရှိုးကို ပို့ပြီး စစ်ဆေးတဲ့ထဲမှာ တာလုံစစ်ရှောင်စခန်းက (၁၂)ယောက်ထပ်တွေ့တယ်၊ ကိုယ်ဝန်သည် လည်းပါတယ်၊ ကျန်းမာရေးဆိုးရွားတာတွေတော့ မရှိဘူး၊” ဟု မိုင်းငေါ့ ကိုဗစ်စင်တာမှ တာဝန်ရှိသူတစ်ဦးက သျှမ်းသံတော်ဆင့် ကို ပြော သည်။

မိုင်းငေါ့မြို့မှ နှာခေါင်း၊ အာခေါင်တို့ဖတ် (၁၂၄)ခုအား စက်တင်ဘာလ (၁)ရက်နေ့က လားရှို့သို့ ပို့ဆောင်စစ်ဆေးခဲ့ကြောင်း၊ ယနေ့တွင် (၁၉)ဦး ကိုဗစ်ပိုး တွေ့ရှိခဲ့ပြီး တာလုံစစ်ရှောင်စခန်းမှ (၁၂)ဦးထိ ပါဝင်နေတာဖြစ်ကြောင်း သိရသည်။

ထိုကိုဗစ် လူနာ (၁၂)ဦးထဲတွင် ကိုယ်ဝန်သည် (၂)ဦး၊ အသက် (၂)နှစ်အရွယ် ကလေးငယ် (၁)ဦး၊ ကိုရင်ငယ် (၂)ပါးတို့လည်း ပါဝင်ပြီး အများစုမှာ (၁၀)နှစ်ဝန်းကျင်ကလေးငယ်များသာဖြစ်ကြောင်း စုံစမ်းသိရသည်။

တာလုံစစ်ရှောင်စခန်းသည် လူနေရပ်ကွက်အတွင်း တည်ရှိနေတာဖြစ်ပြီး ကိုဗစ်စည်းကမ်းလိုက်နာမှု အားနည်းသည့်အတွက် ကိုဗစ်ကူးစက်ခံရသူ များပြားလာတာဖြစ်ကြောင်း သိရသည်။

“အဓိကတော့ စည်းကမ်းလိုက်နာမှု အားနည်းလို့ ကူးစက်မှုမြင့်သွားတာ၊ ပြီးတော့ လူနေရပ်ကွက်အတွင်းဆိုတော့ ဝင်ထွက်မှုက များတယ်၊ Mask တွေလည်း မတပ်ကြဘူး” ဟု အထက်ပါ တာဝန်ရှိသူက ပြောသည်။

အဆိုပါ ကိုဗစ်ပိုး တွေ့ရှိထားသည့် လူနာများအား မိုင်းငေါ့ အထက (၁)ကျောင်းရှိ ကိုဗစ်ကုသရေးစင်တာသို့ ပို့ဆောင်ကုသပေးမည်ဖြစ်ကြောင်း၊ ထိုစစ်ရှောင်စခန်းကိုလည်း ကန့်သတ်ထားသည့်အတွက် စစ်ရှောင်များ စားနပ်ရိက္ခာခက်ခဲကြောင်း ဒေသခံထံမှ သိရသည်။

“မိုင်းငေါ့က Lock down သတ်မှတ်ထာပြီး စစ်ရှောင်စခန်းကိုလည်း ဝင်ထွက်ကန့်သတ်ထားတော့ စားနပ်ရိက္ခာက ခက်ခဲမှုရှိတယ်၊ အလှူရှင်တွေ လှူထားတာလည်း နည်းပါးနေပြီ၊ ခုက ကိုဗစ်လူနာကလည်း ပိုများလာတော့ သူတို့အတွက် ပိုခက်ခဲတယ်” ဟု စစ်ရှောင်များကို ကူညီနေသည့် ကျောက်မဲ သျှမ်းစာပေနှင့်ယဉ်ကျေးမှုအသင်း ဥက္ကဌ လုင်းလျန်ဟန် က သျှမ်းသံတော်ဆင့်ကို ပြောသည်။

ကျောက်မဲမြို့နယ်တွင် စစ်ရှောင် (၂၅၀၀)ကျော်ထိ ရှိနေပြီး မိုင်းငေါ့မြို့တွင် စစ်ဘေးရှောင် (၅၀၀)ဝန်းကျင်၊ တာလုံစစ်ရှောင်စခန်းတွင် စစ်ရှောင် (၁၀၀)ကျော် ရှိနေကြောင်း သိရသည်။

ကျောက်မဲမြို့နယ် မိုင်းငေါ့မြို့တွင် ယနေ့ မနက်ပိုင်းအထိ ကိုဗစ်ပိုး ကူးစက်ခံရသူ (၅၅)ဦးနှင့် သေဆုံးသူ (၁)ဦး ရှိကြောင်း သိရသည်။

Leave a Comments

- Advertisement -spot_img

Latest article