သျှမ်းပြည်တောင်ပိုင်း ဟိုပုံးကိုရင်လေး ဘေးတွင် အနီးကပ် ပြုစုစောင့်ရှောက်ပေးသူ (၆) ဦး ကိုဗစ် ၁၉ ပိုးတွေ့ရှိကြောင်းစုံစမ်းသိရှိရသည်။

ထို (၆) ဦးသည် ဟိုပုံးကိုရင်လေး၏ ဘေးအနီးကပ်တွင် စောင့်ရှောက် နေပြီး ယမန့်နေ့ စက်တင်ဘာ (၁) ရက်နေ့က ပိုးစစ်ဆေးကြည့်ရာတွင် ကိုဗစ် -၁၉ ပိုးတွေ့ရှိကြောင်းသိရသည်။

“ သူတို့က ဆရာတော်ရဲ့ဘေးမှာ အနီးကပ်စောင့်ရှောက်ပေးတဲ့သူတွေ။ မနေ့က စစ်ဆေးပေးတာ (၆) ဦးလုံးကတော့ ပိုးတွေ့တယ်။ ဟိုပုံးမြို့နယ်က ဆရာဝန်တွေကိုယ်တိုင်က ကွန့်ဖန်လုပ်ပေးတာ။ ဒါမဲ့ သူတို့တွေက မယုံကြဘူး။” ဟု ဟိုပုံးမြို့ ပအိုဝ်းလူငယ်တဦးကပြောသည်။

ပိုးတွေ့လူနာ (၆) ဦးသည် Quarantine မဝင်သည့်အပြင် ဆေးကုသခံယူမှုလည်း ယနေ့ထိ ပြုလုပ်လျက်မရှိကြောင်းသိရသည်။

ထိုအပြင် ကိုရင်လေး၏ ဆွမ်းများကိုပါ ၎င်းတို့က ပြုလုပ်ရန်လိုအပ်သေးသောကြောင်း၊ မိမိကိုယ့်ကိုယ်တွင် ကိုဗစ် ၁၉ ပိုးမရှိကြောင်း ထို (၆) ဦးက ယူဆနေလျက်ရှိသည်ဟုသိရသည်။

“ သူတို့က Quarantine ဝင်ခိုင်းတာလည်းမဝင်ဘူး။ သူတို့မှာ ပိုးမရှိဘူးလို့ပဲပြောတယ်။ q ဝင်ရင်လည်း (၁၄) ရက်နဲ့ ဆေးကုတာနဲ့ကြာလို့မဝင်ဘူးတဲ့။ ပြီးတော့ သူတို့ ကိုရင်လေးအတွက် လုပ်ပေးစရာတွေရှိသေးတယ်ပြောတယ်။ သူတို့တွေက ကိုရင်လေး ပျံလွန်သွားတာတောင် မယုံနိုင်ကြသေးဘူး” ဟု ဟိုပုံးမြို့ လူငယ်တဦးကပြောသည်။

အလားတူ ယနေ့ ဟိုပုံးကိုရင်လေး ပျံလွန်တော်မှုပြီး ဈာပနာခရီးလမ်းတွင် (Mask) နှာခေါင်းစည်း များ တပ်ထားသည့် သူမရှိသလောက်နည်းပါးကြောင်း လှုမှုကွန်ယက်ပေါ်တွင် ပြန့်နှံနေသည့် live တွင် တွေ့ရှိရသည်။

ထိုသို့ အယုံကြည်လွန်ပြီး ကိုးကွယ်နေခြင်းကြောင့် ပြည်သူတချို့က စိုးရိမ်နေကြရကြောင်း ဟိုပုံမြို့တွင် နေထိုင်သည့် သူတဦးက ဆိုသည်။

“ ကျနော်တို့ကတော့ အရမ်းကို စိုးရိမ်နေပြီ။ ပိုဆိုးတာက အဲဘက်မှာရှိတဲ့ရွာတွေေ။ ကျနော်တို့ မြို့မှာနေတာတောင် အရမ်းကိုကြောက်နေကြပြီ မယုံကြည်တာတော့ မဟုတ်ဘူး။ အယုံကြည်လွန်သွားပြီးဆိုရင်လည်းမကောင်းဘူး။ သတိနဲ့တော့နေစေချင်တယ်။ အခုက ဈာပနာသွားတာတောင်း တယောက်မှ mask မတပ်ကြဘူး။ live မှာကြည့်ရင်လည်း တွေ့ပါတယ်” ဟု ဟိုပုံးနေ ဒေသခံတဦးက ပြောသည်။

ဟိုပုံးကိုရင်လေး ပျံလွန်တော်မူ ကြောင်း ဆရာဝန်များက ပြောဆိုသော်လည်း ဘေးပတ်ဝန်းကျင်တွင် ရှိနေသည့် ပြည်သူ့စစ်တချို့က ဆရာဝန်ကို သေနတ်ထောက်ပြီး ခြိမ်းခြောက်မှုပြုလုပ်ခဲ့သေးကြောင်း ထို လူငယ်က ပြောသည်။

အလားတူ ယနေ့ ကိုရင်လေး ဈာပနာကို သွားရောက်သူတိုင်းသည် ရွာကိုပြန်ရောက်ရှိပါက ရွာသူကြီးထံ စာရင်းပေးပြီး Quarantine ဝင်ကြပါရန် PNO က မေတ္တာရပ်ခံ စာထုတ်ပြန်ခဲ့သည်။

ဟိုပုံးကိုရင်လေး (အရှင်ပေါရိဿ) သည် ယမန့်နေ့ စက်တင်ဘာ (၁) ရက် မနက် ၁၁ နာရီ ၄၅ မိနစ် ဝန်းကျင်က ကိုဗစ် ၁၉ ရောဂါဖြင့် ပျံလွန်တော်မှုသွားခဲ့ကြောင်း မြို့နယ်ဆရာဝန်များကိုယ်တိုင်က အတည်ပြုပြောဆိုထားကြောင်း သိရသည်။