သျှမ်းပြည်တောင်ပိုင်း ဖယ်ခုံမြို့နယ် ဘီသူ (အထက်)ကျေးရွာတွင် ကောက်လာသည့်မိုင်းပေါက်ကွဲရာ အမျိုးသားတစ်ဉီးသေဆုံးပြီး ကလေးငယ် ၃ဉီး ဒဏ်ရာရရှိကြောင်း စုံစမ်းသိရသည်။
ပြီးခဲ့သည့် မတ် ၂၂ ရက်နေ့ နံနက်ပိုင်းအချိန်တွင် ဖယ်ခုံမြို့နယ် ဘီသူ(အထက်)ရွာရှိ ကလေးငယ်သည် ရွာပြင်တွင် ကျနေသည့် မပေါက်ကွဲသေးသော မိုင်းကို ကောက်ယူလာသဖြင့် နေအိမ်ထဲ ပေါက်ကွဲမှုဖြစ်ပွားခဲ့ကြောင်း စစ်ရေး သတင်းရင်းမြစ်တစ်ဉီးက သျှမ်းသံတော်ဆင့်ကိုပြောသည်။
“ရွာပြင်ကနေ ကလေးက မိုင်းကို ကောက်လာတာ။ မိုင်းကခွက်ပုံစံ ဘူးပုံစံလိုလိုနဲ့ မိုင်းလို့မထင်ရဘူး။ ဒီဘူးကို တစ်ခုခု သုံးလို့ရတယ်ဆိုပြီး ဖွင့်ရင်း ပေါက်ကွဲတာ။ အဖေက ပွဲချင်းပြီးသေဆုံးသွားတယ်။ ကလေးတစ်ဉီးကတော့ စိုးရိမ်ရတယ်” ဟု ၎င်းကပြောသည်။
မိုင်းဒဏ်ရာရရှိသည့် ကလေးငယ်များသည့်အသက် ၁၂နှစ်အရွယ်တစ်ဉီး၊ အသက် ၁၀နှစ်အရွယ်နှင့် အသက် ၅နှစ်အရွယ်ကလေးငယ်ဖြစ်ပြီး၊ ထိုထဲတွင် ကလေးငယ်တစ်ဉီး စိုးရိမ်ရကြောင်းလည်း ၎င်းက ဆက်ပြောသည်။
ထို့အပြင် သျှမ်းပြည်တောင်ပိုင်း ဟိုပုံမြို့နယ် နမ့်ဗော်ဟွန်ကျေးရွာအုပ်စု ပါပင်ဘုန်းကြီးကျောင်းတွင် ပြ မတ် ၂၁ ရက်နေ့ နေ့လယ်ပိုင်း ၂ နာရီ ဝန်းကျင်တွင်လည်း ဗုံးပေါက်ကွဲမှုဖြစ်ပြီး ရွာသားတစ်ဦးနှင့်ကိုရင်တပါး ပွဲချင်းသေဆုံးပြီး ကိုရင် ၅ ပါး ထိခိုက်ဒဏ်ရာရရှိနေကြောင်း သိရသည်။
၎င်းပေါက်ကွဲသော ဗုံးသည် စစ်ကောင်စီ၏ စစ်ရေးလေ့ကျင့်ရေး သင်တန်းကွင်း အနောက်ဘက်တွင် ရွာသားတစ်ဦးက တွေ့ရှိသဖြင့် ဘုန်းကြီးကျောင်းသို့ ကောက်ယူလာရာ ကိုရင်များနှင့် ဆော့ကစားရင်း ပေါက်ကွဲမှုဖြစ်ပွားခဲ့သည်၊
“ဒေသခံတစ်ဦးက ဗုံးကို စစ်ရေးလေ့ကျင့်တဲ့ နေရာမှာတွေ့လို့ ကောက်လာတာ။ ဘုန်းကြီးကျောင်း ယူလာပြီး ကိုရင်တွေနဲ့ ဆော့ရင်းပေါက်ကွဲတာ ကိုရင်တပါးနဲ့ ရွာသားတစ်ဦး ပွဲချင်းသေဆုံးသွားတယ်။ ကိုရင် ၅ ပါးတော့ ထိခိုက်ဒဏ်ရာတွေ ရနေတယ်။ အခုတော့ ဆေးရုံတင်ထားရတယ်”ဟု ဟိုပုံးဒေသခံတစ်ဉီးကပြောသည်။
သျှမ်းပြည် တောင်ပိုင်း ဆီဆိုင်၊ ဟိုပုံး၊ ပင်လောင်း၊ ဖယ်ခုံ၊ မိုးဗြဲတကြောတွင် စစ်ရေး ဆက်လက်ပြင်းထန်နေပြီး ၊မြေမြှုပ်မိုင်းပေါက်ကွဲမှု မကြာခဏဖြစ်ပွားနေသည်။
ထိုမြေမြှုပ်မိုင်း နှင့်ပတ်သက်ပြီး မိုင်းသတိပေးမှု၊ မိုင်းရှင်းလင်းမှုကို မည်သည့်အဖွဲ့အစည်းမှ ပြုလုပ်ပေးခြင်းမရှိသေေးကြောင်း သိရသည်။
Leave a Comments