သျှမ်းပြည်ဟိုပုံးမြို့ရှိ တပ်မတော်ကွန်ပျူတာနှင့် နည်းပညာသိပ္ပံ သင်တန်းကျောင်း (တကန) တွင် ပထမဆုံးအကြိမ် စစ်မှုထမ်းသင်တန်းအခမ်းအနားကျင်းပပြုလုပ်ပြီး ပြည်နယ်ဝန်ကြီးချုပ် ဦးအောင်အောင် ကိုယ်တိုင်တက်ရောက်ခဲ့ကြောင်း စုံစမ်းသိရသည်။
စစ်မှုထမ်းသင်တန်းအခမ်းအနားကို ယနေ့ (ဧပြီလ ၈ )ရက်တွင် ဖွင့်လှစ်ကျင်းပခဲ့ပြီး ပြည်နယ်ဝန်ကြီးချုပ်နှင့် ဝာာဝန်ရှိသူများ တက်ရောက်အားပေးခဲ့ပြီး ဝန်ကြီးချုပ် ဦးအောင်အောင်က အမှာစကားပြောကြားခဲ့ကြောင်း စစ်ကောင်စီဝါဒဖြန့် တယ်ရီဂရမ်များက ဖော်ပြထားသည်။
သင်တန်းဖွင့်ပွဲ မှတ်တမ်းဓာတ်ပုံများ အွန်လိုင်းပေါ်တွင် ဖြန့်ဝေနေကြရာ ရာနှင့်ချီသည့် လူငယ်များကို ပုံတွင် တွေ့ရသည်။
ဧပြီလ ၃ ရက်တွင်လည်း ပြည်သူ့စစ်မှုထမ်းသင်တန်းသားများအား စစ်ဝတ်ပစ္စည်းများ ထုတ်ပေးခြင်း အခမ်းအနား၌စစ်ကောင်စီတပ်ဖွဲ့ဝင် အရာရှိတစ်ဦးက “မင်းတို့ဒီထဲမှာ စာအုပ်ဖတ်လို့ရအောင် လုပ်ပေးမယ်။ ဒီဗီကြည့်လိုရအောင်၊ ဘောလုံးပွဲကြည့်လို့ရအောင်၊ ပျော်ပွဲရွှင်ပွဲတွေ လုပ်ပေးမယ်” ဟု အမှာစကား ပြောကြားခဲ့သည်။
သို့သော် ဆီဆိုင်မြို့နှင့် ဟိုပုံးမြို့နယ်မှာဖြစ်ပွားနေသည့် တိုက်ပွဲအတွင်း စစ်ကောင်စီတပ်ဖွဲ့ဘက်က သေဆုံးမှုများ ရှိပြီး စစ်ရေးရှုံးနိမ့်နေကာ ပြည်သူ့စစ်မှုထမ်း သင်တန်းသားများကို ရှေ့တန်းသို့ ပို့ဆောင်ခံရမည်ကို စိုးရိမ်နေသည်ဟု ဟိုပုံးမြို့လူငယ်တစ်ဦးက ပြောသည်။
“တချို့ကတော့ ကြောက်လို့ ပြေးကုန်ပြီ။ တချို့ကျတော့လည်း မတတ်နိုင်လို့ လုပ်ရတာ။ မဖြစ်မနေ အတင်းအကျပ် ရှေ့တန်းသွားရမယ်ဆိုရင်တော့ မသိတော့ဘူး၊ သွားရမှာပဲ။ ဒါပေမဲ့ ဘယ်သူမှတော့ မသွားချင်ဘူးလေ” ဟု ၎င်းကပြောသည်။
ပြီးခဲ့သည့် မတ်လ ၁၁ တွင်လည်း ပင်လောင်းမြို့ တောင်ဘက်ရှိ ကျေးရွားများတွင် စစ်သင်တန်းတက်ပြီး သူများအပြင် မတက်ရသေးသည့် သူများကိုပါ စစ်ကောင်စီနှင့် ပအိုဝ်းပြည်သူ့စစ် PNOက လက်နက်နှင့် စစ်ဝတ်စုံအပြည့်တပ်ဆင်ပေးပြီး တိုက်ပွဲဖြစ်ပွားရာ ဖယ်ခုံ-ပင်လောင်းနယ်စပ် ရှေ့တန်းသို့ ပို့ဆောင်ခဲ့ကြောင်း သိရသည်။
ကနဦး စစ်မှုထမ်း ပထမအသုတ်ကို သင်္ကြန် ကာလပြီးမှ ခေါ်ယူမည်ဟု စစ်ကောင်စီက ကြေညာထား သော်လည်း ယခုအခါ နည်းဥပဒေ ပြဌာန်းနိုင်ခြင်း မရှိသေးစဥ် စတင်ခေါ်ယူနေပြီဖြစ်ပြီး လစဥ် အနည်းဆုံး လူငယ် ၅,၀၀၀ မှ ၁၀,၀၀၀ အထိ ခေါ်ယူမည် ဖြစ်ကြောင်း သိရသည်။
Leave a Comments