သျှမ်းပြည်မြောက်ပိုင်း နမ့်ခမ်းမြို့နယ်ရှိ ကျေးရွာများတွင် ကိုဗစ် ၁၉ ကာကွယ်ဆေးထိုးရန်အတွက် စိတ်လုံခြုံမှုမရှိကြောင်း ဒေသခံများပြောပြချက်အရသိရသည်။
ထို ထိုးပေးမည့် ကာကွယ်ဆေးသည် တရုတ်နိုင်ငံထုတ် ဆီနိုဖန်း (Sinopharm) ဖြစ်သောကြောင့် ကျေးရွာတွင် နေထိုင်သည့် ပြည်သူများက ထိုးရန် ကြောက်ရွံ့ စိုးရိမ်နေကြောင်းသိရသည်။
“ ကျနော်တို့ ထိုးသင့်လားမထိုးသင့်ဘူးလား မသိဘူးဗျ။ ဒါမဲ့ကျနော်တို့ ရွာဖက်တွေမှာတော့ ကြောက်နေကြတယ်။ မထိုးချင်ဘူး။ ဘာလို့လဲဆို သူက တရုတ်နိုင်ငံထုတ် ကာကွယ်ဆေးလေ။ အခုကသူတို့က စာရင်းတွေ လိုက်ကောက်နေတယ်” ဟု နမ့်ခမ်းမြို့နယ် ဟိုပုံကျေးရွာအုပ်စုတွင် နေထိုင်သည့် အမျိုးသားတဦးက သျှမ်းသံတော်ဆင့်ကိုပြောသည်။
ထိုတရုတ်နိုင်ငံထုတ်ကာကွယ်ဆေးသည် ကိုဗစ် ၁၉ ကို ၅၀ ရာခိုင်နှုန်းသာ ကာကွယ်နိုင်ကြောင်း၊ ထိုးသော်လည်း အမှားမရှိကြောင်း အမည်မဖော်လိုသည့် ဆရာဝန်တဦးက ပြောသည်။
“ သူက အရမ်းကြီးကာကွယ်နိုင်တာတော့မဟုတ်ဘူး။ ထိုးထားတော့လည်း မမှားဘူးပေါ့။ ဘာမှတော့ မဖြစ်ပါဘူး။ ဒါမဲ့သူက ရာနှုန်းပြည့် ကာကွယ်နိုင်တဲ့ ကာကွယ်ဆေးတော့မဟုတ်ဘူးပေါ့။ ၅၀ ၅၀ ပါဘဲ။ ထိုးချင်သူရဲ့ ဆန္ဒရထိုးချင်ထိုးပေါ့နော်” ဟု အမည်မဖောလိုသည့် ဆရာဝန်တဦးက ပြောသည်။
အလားတူ ယခင်က အသက် (၆၅) နှစ် ပြည်သူများကို ကိုဗစ် ၁၉ ကာကွယ်ဆေးထိုးပေးရာတွင် သွားရောက်ထိုးခြင်းမရှိကြောင်းလည်းသိရသည်။
လာမည့် စက်တင်ဘာ (၇) ရက်နေ့တွင် နမ့်ခမ်းမြို့ပေါ်နှင့် ကျေးရွာရှိ အသက် (၁၈) နှစ်အထက် ပြည်သူများကို ကိုဗစ် ၁၉ ကာကွယ်ဆေးကို ထပ်မံထိုးသွင်းမည်ဖြစ်ကြောင်း သိရသည်။
