သျှမ်းပြည်အတွင်းရှိ အခြေခံပညာစာသင်ကျောင်းများနှင့် ဘုန်းကြီးကျောင်းတချို့တွင် ကင်းစောင့်ချထား သည့် စစ်ကောင်စီ တပ်သားများကို ပြန်လည် ရုတ်သိမ်းသွားကြောင်း စုံစမ်းသိရှိရသည်။
စက်တင်ဘာလ ၁ရက်နေ့ နံနက် ၉ နာရီ ဝန်းကျင်တွင် တာချီလိတ်မြို့ အခြေခံပညာကျောင်းများတွင် ဝင်ရောက်တပ်ချထားသည့် စစ်ကောင်စီတပ်များ မိခင်တပ်ရင်းသို့ တပ်နှုတ်ပြန်နေကြကြောင်း၊ တောင်ကြီးမြို့တော် တွင်လည်းထို့နည်းတူ တပ်နှုတ်ပြန်မှုရှိကြောင်း၊ စောင့်ကြည့်လေ့လာသူများပြောပြ ချက်အရ စစ်ရေးပဋိပက္ခဖြစ်နေသည့်ဒေသများသို့ ရှေ့တန်းထွက်ရန်ဖြစ်နိုင်ကြောင်း ပြောဆိုကြသည်။
“တာချီလိတ် အထက ကျောင်းမှာ ဒီနေ့ မနက်မှာတော့ သူတို့ အချင်းချင်း ရှေ့တန်းထွက်ရတော့မယ်ဆိုပြီး တော့ ပြောနေကြတယ်၊ လက်ဖက်ရည်လာလာ သောက် တတ်တဲ့ စစ်သားတစ်ဦးကလည်း ရှေ့တန်းမှာ အင်အားမရှိတော့လို့ ရှေ့တန်းထွက်ရတော့မယ်လို့ ပြောနေတာ မိခင်တပ်က ပြန်ခေါ်တာလို့ပြောတယ်” ဟု အထက်ပါ ပုဂ္ဂိုလ်က ပြောသည်။
ကိုဗစ်ကပ်ရောဂါ ပြန့်နှံ့နေသည့်ကြားမှ စစ်ကောင်စီက အတင်းဖွင့်လှစ်ခဲ့သည့် တာချီလိတ်မြို့ရှိ အခြေခံပညာကျောင်း တစ်ကျောင်းလျှင် တပ်သား ၅ ယောက်မှ ၇ ယောက်ထိ ထားရှိပြီး လက်ရှိမှာတော့ ရှေ့တန်းသို့ပို့ရန်ဟုဆိုကာ အဆိုပါ တပ်သားများကို ပြန်လည်ခေါ်ဆောင်သွားကြောင်း သိရသည်။
သျှမ်းပြည် မြို့တော် တောင်ကြီးမြို့မှာလည်း စာသင်ကျောင်းများနှင့် တချို့သော အစိုးရဌာများ တွင် ကင်းစောင့်တာဝန်ကျသည့် စစ်ကောင်စီတပ်သားများလည်း တပ်ထဲ ပြန်သွားကြရကြောင်း သတင်းသိ ရပါသည်။
“တောင်ကြီးမှာက ဒီသြဂုတ်လ နောက်ဆုံးပတ်ထဲကနေစ စစ်သားတွေ စောင့်လေ့စောင့်ထရှိတဲ့နေရာတွေမှာ မစောင့်တော့သူးဗျ၊ ကြားရတာကနေ တပ်ထဲပြန်သွားပြီး လွိုင်လင်လေးဖက် သွားကြရတယ်ပြောနေတယ်၊ အခု မြို့ထဲမှာ ကျောင်းဆိုရင် အထက (၇) နဲ့ ဘဏ်တွေမှာပဲ အစောင့်ထားတာ တွေ့ရတယ်” ဟု တောင်ကြီးမြို့ခံ လူငယ်တစ်ဦးက သျှမ်းသံတော်ဆင့်ကို ပြောသည်။
လက်ရှိတွင် သျှမ်းပြည် နှင့် ကယားပြည် နယ်စပ်ရှိ ကျေးရွာများ ဖြစ်ကြသည့် လွိုင်လင်လေးကျေးရွာတို့တွင် စစ်ကောင်စီတပ်ဖွဲ့နှင့် ပြည်သူ့ကာကွယ်ရေးတပ်ဖွဲ PDF တို့ တိုက်ပွဲ ဖြစ်ပွားနေပြီး စစ်ကောင်စီတို့ဖက်မှ အကျအရှုံးများနေသဖြင့် စစ်ကူပို့ဆောင်ပေးရန်အတွက် ကင်းစောင့်တပ်သားများကို ပြန်ခေါ် ခြင်းဖြစ်နိုင် ကြောင်းလည်း ဒေသခံ ပြည်သူများက သုံးသပ်ကြပါသည်။
ထို့နည်းတူစွာ လားရှိုးမြို့ရှိ အခြေခံ ပညာ စာသင်ကျောင်းနှင့် ဌာနဆိုင်ရာ ရုံးဝင်းများတွင် ချထားသည့် အစောင့် တပ်သားများ တချို့ကိုလည်း အခြေခံ ပညာစာသင်ကျောင်းများကို တရားဝင်ပိတ်ပင်ကြောင်း စစ်ကောင်စီက ထုတ်ပြန်ကြေညာပြီးနောက်တစ်ပတ်ခန့် အကြာတွင် ရုတ်သိမ်းသွားကြောင်း သတင်းသိ ရှိရသည်။
အာဏာသိမ်း စစ်ကောင်စီတို့သည် ပြီးခဲ့သည့် ဇွန်လအတွင်း ကိုဗစ် – ၁၉ တတိယလှိုင်း ကူးစက်မှုနှုန်း မြင့်မားနေသည့် ကြားကပင် စာသင်ကျောင်းများ ဖွင့်လှစ်စေကာ စာသင်ကျောင်းအတွင်း အစောင့်တပ်သား ချထားခြင်း၊ သဲအိတ်ဘန်ကာများ ကာရံခြင်းတို့ ဆောင်ရွက်ခဲ့သည်။
သို့သော် စာသင်ကျောင်းများ ဖွင့်လှစ်ပြီး လဝက်ခန့် အကြာ ကိုဗစ် – ၁၉ ရောဂါ ကူးစက်နှုန်းမြင့်မား၊ သေဆုံးမှုမြင့်တက်လာသောကြောင့် စာသင်ကျောင်းများကို ပြန်ပိတ်ခဲ့သည်မှာ ယခုအထိပင်ဖြစ်ပါသည်။
